係同屋室友?定係同居密友?: (S4)16. 校內緊急會議

「嚓….嚓…嚓…」一幅幅小祺嘅相係學校會議室嘅Projector上顯示出黎
 
大部入女教師忍唔住喊，男教師都俾相中小祺身上嘅傷勢嚇到目定口呆
 
「校..校長，而家小祺傷勢點?」教小祺嘅教師問到
 
「我地尋晚都係隔住門嘅玻璃窗望入去，果時佢休息緊。今日我會再去睇一睇佢」
 
「校長我地下一步係做咩?」有老師舉手發問
 




校長嘆左口氣「根據教育局指引，我地尋晚已經係醫院報警，社署已經有社工跟進個案，另外社署嘅保護兒童組星期一會聯同我地學校社工一齊去家訪。相信下星期初小祺可以俾口供果時，佢屋企人會俾警方拘捕」
 
「有冇了解過小祺俾人虐打嘅原因?」
 
校長當刻都未能回答問題，因為佢都未可以同小祺傾計
 
係大家仍然估緊果時，有老師講出原因
 
「傳統思想，一定係」有同時教小祺兩姊弟嘅老師講
 




「Miss HO，妳清楚佢地屋企?」
 
「唔…都曾經了解過，中文科老師應該記得，小祺三年級果時篇文『我的家庭』佢係寧願冇分都唔交」
 
有老師同意Miss HO
 
「當時我曾經問過佢同佢媽媽，小祺就話寫唔出任何關於自己屋企嘅野，而佢媽媽就只係話佢懶唔想作。但係懶肯定唔係一個原因，小祺係每一科都會準時交齊功課」
 
Miss HO繼續講落去「到左今年開學果時，我就開始了解小祺屋企，佢父母同麻麻對話有時用客家話，我識聽少少，所以佢地一定係重男輕女」
 




「今年….佢細佬升小一」
 
「冇錯，開學果日…我係見到佢地一家人全家送佢細佬返學，但唯獨小祺係自己一個返到學校」
 
「重男輕女…一定係」有女老師開始明白成件事
 
「所以，小祺一定係長期係屋企受到不公平對待，果時佢先寫唔出任何野」
 
「有邊個同佢同住?」校長問
 
曾經做過小祺班主任嘅老師開始數「父母….加埋細佬…呀…佢麻麻好似都係同佢地一齊住」
 
校長諗一諗「相信小祺唔會咁易開口，我想搵幾位老師去陪佢，睇下佢有咩講，總有一日佢要落口供，另外其他學生方面，要解釋下點解小祺會長時間缺席，另外學業方邊，準備定D教材，我地可以輪流去病房同小祺上堂」
 
學校方面工作不停準備，而第二日雖然係假期，但係班主任仍然去醫院探望受傷嘅學生，可能係出於自責，身為班主任，竟然冇了解到自己學生嘅處境




 
小祺班主任Miss LEE同另外一男一女教師一齊入去病房，果時小祺自己坐係病床上，檯上係已經一餐佢完成嘅醫院餐，雖然味道一般，但比起平時小祺嘅飯餸好得多，無法啦，有邊間飯商嘅飯真係可以放入口?
 
不過即使，平日小祺總係會食哂所有飯餸，佢身體有營養不良，同佢非常肥，接近三高嘅細佬相比，可想而知小祺平時係屋企嘅飯餸係好差，只因佢唔係男仔
 
每餐佢麻麻同父母總係將最好最靚嘅肉放係細佬面前，而小祺只可以食雞背、湯渣中嘅肉之類，可想而知，佢地屋企偏心嘅程度