係同屋室友?定係同居密友?: (S4)17. 監護人

病床上嘅小祺，身上仍然帶有傷口，可幸嘅係，傷口開始自己埋口。小祺見到傷口嘅情況，用紙筆記錄起佢
 
一向專心向學嘅小祺，竟然受到屋企人虐打，在場老師都鼻子一酸
 
「小祺，妳今日有冇好D呀?」Miss LEE行去小祺身邊問
 
小祺估唔到自己班主任同埋其他老師會黎探佢，佢自己都呆左一呆
 
既然老師黎到，佢要做嘅野，就係交功課，因為佢自己都知道，星期一肯定會缺席
 




班主任見到小祺即使係受傷住院，佢仍然負傷完成所有功課
 
「呀…Miss LEE，功課我做好哂架啦」
 
班主任接過小祺嘅功課「妳乖啦，傷口仲痛唔痛呀?」
 
小祺擰擰頭，向班主任表示「傷口開始埋口，開始冇咁痛」
 
「另外….我張成績表……..」小祺雙手遞上佢果張充滿血跡嘅成績表出黎
 




「屋企冇人肯幫我簽名….會唔會當欠交…….」小祺細細聲咁講
 
班主任望見小祺失望嘅樣，亦都唔知點樣去安慰佢，自己考獲全級第一，而屋企竟然少少讚賞都冇，換黎只有毒打
 
「唔簽唔緊要，我地會同校長講，不過老師要知道，妳發生左咩事，俾人送入黎醫院」
 
「因為…我前日返屋企時…..麻麻話佢唔見左錢，而我書包又有新文具，所以….」
 
「妳冇解釋，文具係學校送嘅?」
 




小祺點點頭「有呀，不過爸爸都係照打」
 
「咁妳臉上傷痕呢?」
 
「俾麻麻打嘅」
 
「佢地就係咁就打妳?」
 
小祺點點頭「佢地仲認為我係出貓先會有全級第一，因為細佬冇，所以佢地就話我出貓」
 
有老師jot低小祺所講嘅說話，然後出去同校長報告
 
「咁小祺，妳有冇諗過，出左院後妳會唔會返屋企?」
 
小祺擰擰頭「佢地眼中只有我細佬，我係最多餘果個」




                                                                                                               
「但係妳有咩打算?妳得9歲，有冇屋企人可以收留妳?」
 
小祺諗一諗「我有一個大伯同姑媽，不過我唔想增加佢地負擔，家姐剛升大學，表姐又準備考試，佢地屋企負擔太大，我唔想影響到佢地」
 
班主任聽到小祺咁講，頓時更加想好好保護佢，一個9歲嘅小妹妹，識得為自己家姐同表姐一家人著想
 
其時，醫務社工入到黎向小祺詢問
 
「小祺妳係唔係唔想再返屋企?」小祺點一點頭
 
「既然係咁，我地安排妳去保良局嘅兒童之家到住，妳有冇問題?」
 
小祺擰擰頭表示冇
 




社工轉身同校長講「校長，暫時小祺嘅CASE未去到警方手上，所以社署署長暫時唔可以成為佢監護人，或者可唔可以請學校成為佢監護人，所有開支會比由社署發放更好」
 
「我地校方冇問題，我地學校老師可以成為小祺監護人」
 
就係呢個情況下，小祺一出院後，就會直接去保良局總局到居住
 
處理左小祺嘅事之後，學校就要準備同全校學生解釋，另外仲要同小祺屋企人會面
 
因為涉及埋小祺細佬，教育局同社署有機會要佢地兩姐弟分開讀書，以免再有磨擦