係同屋室友?定係同居密友?: (S4)19. 4E班

係小祺所就讀嘅4E班，今日暫時一切如常，因為小祺係第一日缺課，有好多同學都以為小祺只係病左冇返，直到下午嘅班主任課，Miss LEE叫所有同學坐好，同時社工同校長都入埋黎課室
 
所有學生見到校長入黎就立即坐好，生怕校長係黎同佢地秋後算帳，好明顯，小祺呢班同學，除左讀書唔差之外，佢地嘅破壞力亦都屬於一流水平
 
「各位4E班嘅同學，校長有一個唔係太好嘅消息向大家宣佈嘅….」
 
4E班聽到校長咁講後，不忘四處張望，佢地認為自己平時係課室收埋嘅野，一次過會俾校長發掘出黎同沒收哂
 
「本來呢個消息呢，應該由Miss LEE同大家宣佈，但係Miss LEE仍然未平伏到心情，所以就由我向大家宣佈，當然，校方會通知所有同學家長，如果有同學需要輔導，可以黎搵社工」
 




校長咁樣講法，有幾位比較有創意嘅同學已經洗乾淨條頸，做好必死嘅決心
 
「我地班上其中一位女同學，梁小祺，係上星期懷疑受到虐打，係北角街頭上暈低，由途人報警後送院」
 
4E班聽到校長宣佈呢個消息後，全班一片死寂
 
「小祺身上多處受傷，而家係醫院兒科病房留醫，應該要一段長時間後先可以復課。至於小祺身上嘅傷勢，我唔方便透露俾大家知，因為一定會引起不安。所以，校長希望各位同學，而家大家幫到小祺嘅係，幫佢抄家課冊，抄筆記，如果大家諗到有咩關於小祺平時生活嘅事，可以同班主任講」
 
校長講完後，班主任拎出一張慰問卡出黎，俾各個同學簽名祝願小祺可以早日返學
 




有同學見全班都簽好名後，就拎起張慰問卡，拎過隔離課室俾隔離班同學簽名
 
當同學遞張慰問卡俾隔離班嘅班主任時，對方已經知道發生咩事，亦都準備同隔離班嘅同學解釋
 
慰問卡亦都係四年級各班中傳遞後，卡上簽滿左四年級全體同學嘅名，仲有另一張係簽滿全校教職員名嘅慰問卡
 
係4E課室內，有同學舉手問班主任，可唔可以代表全體同學去醫院探小祺
 
班主任Miss LEE回覆果位同學「我知道大家都想探小祺，亦選出代表，但係去探小祺嘅話，可能需要同學家長嘅陪同及同意」
 




係兩位代表同意下，Miss LEE都分別打左電話俾兩位同學嘅家長，佢地都同意第二日陪同自己小朋友去醫院探小祺
 
校務處亦準備好哂通告，通知全校學生家長，學校最近發生嘅情況，希望家長可以多加留意子女情況
 
係放學後，有同學去搵班主任
 
「Miss LEE，我上星期見到D野，唔知關唔關小祺事，不過都想同妳講左先」
 
「係，妳見到D咩?」
 
「我見到….小祺個細佬，書包入邊有好多錢」
 
「好多錢?」
 
「係呀，大約有五至六張100蚊紙左右」




 
「一個一年級學生，點會有咁多錢帶返學?」Miss LEE心諗
 
「係唔係上星期五?」
 
同學點點頭「係呀，果日我去佢果班到幫手派飯，見到佢好高調咁炫耀，話係屋企人俾佢嘅」
 
「嗯，唔該哂妳，我會處理架啦」
 
轉頭Miss LEE就將呢個資訊同左社工講，而今晚，兩姊弟班主任連同社工會去家訪