係同屋室友?定係同居密友?: (S4)20. 家訪

「叮噹」小祺屋企嘅大門打開，如果仲可以算係小祺屋企嘅話
 
果度係一幢三十幾年嘅舊樓，大約三房兩廳左右，係當年黎講係非常實用，即使放係而家，都係非常實用
 
單位有三間房，梁奮成夫婦一間、梁老太一間，而小祺細佬就一間
 
梁老太見到兩位班主任黎到家訪，非常開心，佢認為係個孫仔會受到表揚
 
「呀，幾位，歡迎哂呀，係咪我孫仔受到學校表揚呀?」
 




「係囉，我個仔做左咩事咁呀?」
 
兩位班主任唔出聲，交俾社工處理
 
「係咁嘅梁生梁太，我地係星期五收到瑪麗醫院通知，令嬡梁小祺係北角街頭暈倒，由途人送院留醫」
 
梁老太一聽到學校唔係黎表揚個孫仔，而家為小祺而黎，立即黑起塊面
 
「哎呀~唔好提呢個丫頭片子，果個衰女扮野架咋!!佢星期五就係偷左屋企600蚊，俾我地發現，鬧左佢幾下佢就離家出走!!!而家仲扮野去醫院!!」
 




「呀社工呀，唔洗理果個衰女架啦，佢竟然偷屋企錢去買佢自己嘅野，果晚我打佢幾下就離家出走扮哂野!!唔洗理佢架啦!!!」梁奮成跟住梁老太講到
 
「梁生，你剛剛話打左小祺幾下係唔係?」
 
「係呀!!我用家傳嘅滕條黎打佢添架」
 
社工同兩位班主任用筆記錄低佢地所講嘅野
 
「我地想睇一睇小祺瞓嘅地方可以嘛?」
 




連麗琴指一指客廳嘅一角「個女就係瞓果到」
 
佢所指嘅，係客廳地下一個角落，果到有張檯仔，隨近有張小床褥，相信就係小祺用黎瞓覺嘅地方
 
「點解小祺唔係房到瞓而要瞓廳?細佬可以同佢同房喎」班主任問
 
「嘿!D丫頭片子有咩用?又唔可以繼後香火，對佢咁好做咩?我地屋企應該以個孫仔為中心，所有野都應該以我個孫仔行先」
 
班主任Miss LEE開始慢慢影低小祺生活嘅地方，而社工亦開始問梁老太關於上星期五佢銀包失竊嘅事由
 
「呀梁老太，妳話小祺上星期五係妳銀包偷左600蚊左右，我想知成件事嘅緣由」
 
一提起小祺，梁老太就一面不滿
 
「果個丫頭片子!!!我朝早出去前呢，銀包仲有600蚊係到，丫!!!我下晝接完孫仔想去買野食俾佢，一打開銀包睇下有幾多錢果時，就發現冇哂D錢!!佢仲有新文具係書包，所以D錢一定係個死女包偷嘅!!」




 
「梁老太，請問係唔係呢D文具?」Miss LEE拎出佢送俾學生嘅文具出黎
 
「係啦!!!就係呢D啦!!!妳沒收左佢啱架啦!!!書又讀唔成又學人偷錢!!!」
 
Miss LEE忍住怒火「梁老太，妳係星期五帶梁國柱返學係唔係?」
 
「當然啦，我孫仔一向我親自照顧」
 
「但係妳出門口前，錢仲係妳銀包，果時小祺已經出左門口。到妳接左細佬，先發現唔見左錢，果時妳應該仲未見到小祺，所以，小祺係完全冇可能偷到野喎」
 
梁老太聽到班Miss LEE咁講，先發現左呢個事實。係時間上，小祺根本係冇可能偷到錢
 
然後梁國柱班主任Miss HO出聲「梁國柱，有幾個同學同我地講，你係上星期五，帶左600蚊左右返學校，係唔係?」
 




梁國柱俾班主任咁問一問，立即呆左，仲開始有D畏縮
 
「偷錢嘅係唔係你?」
 
梁國柱嘅班主任係一個好溫柔嘅老師，但係當佢嚴肅起上黎果時，係有一種令人不慄而寒嘅氣勢
 
如今，梁老太同梁國柱都俾Miss HO呢一個氣勢壓得貼貼服服