係同屋室友?定係同居密友?: (S4)21. 同學探訪

「我再問多你一次，偷錢果個係你，係唔係?」Miss HO再一次問
 
梁國柱低頭咁點左一點，承認偷錢
 
梁老太見到個孫仔認左，就同老師講「咁佢認左啦，無謂罰佢啦」
 
「梁老太，既然唔係小祺偷錢，但係你地屋企又將佢打到入醫院，學校唔會就咁樣算數」
 
「咁妳地學校想點丫!!!我個孫仔都認左偷錢啦!!!果個丫頭片子邊度有事呀!!!佢自己發脾氣架咋!!!佢知道妳地學校會幫佢出頭!!一定係!!!唔洗講!!!我嫌打得佢少添呀!!!」
 




班主任轉身同梁奮成同連麗琴講「梁生梁太，小祺而家係瑪麗醫院兒科病房留醫，情況嚴重。而家社會福利署已經介入左，暫時你地唔可以見小祺」
 
「咁我個女點解唔可以帶返屋企呀?佢邊到有受傷呀?」
 
「梁生，總之而家你去到醫院，院方都係唔會俾你地屋企人入去探小祺，我地根據小祺要求，幫佢帶野入去病房俾佢」
 
「咁學校都要俾個交代我地架!」
 
「校長嘅意思係，校方會根據教育局指引去處理事件，至於警方會唔會介入，就要睇社署嘅決定」
 




班主任幫小祺執好哂所有野後，連同兩位同事一齊離開。佢地拎住小祺所有野，係所有野，包括所有校服同書，仲有為數不多嘅便服離開
 
佢地去到醫院果時，已經有幾個CID係到幫小祺落口供，另外仲同學校約好錄影會面時間
 
因為警方同律政署會根據小祺嘅口供同醫療報告再決定告唔告，而小祺亦唔需要上庭
 
班主任將小祺嘅行裝放低，再拎出功課開始幫佢補習，令Miss LEE出奇嘅係，小祺已經一早備好課
 
佢好快完成哂所有功課後，班主任同佢講，剛才家訪嘅事
 




小祺聽完後好平靜，好似已經一早知道結果一般
 
「頭先…我已經將所有野一字不缺咁同警察講左，佢地話遲D會有一個正式嘅會面錄影」
 
班主任問一問小祺「妳真係唔想再返屋企?去兒童之家?」
 
小祺擰一擰頭「Miss LEE妳頭先去過我屋企，妳都知道我嘅情況」
 
Miss LEE靜靜不語，佢想像唔到小祺點解可以忍受到咁耐
 
第二日放學， 兩名同學代表同埋家長一齊去到病房探小祺
 
臨入病房之前，Miss LEE同兩名同學講，小祺受嘅傷唔輕，大家要忍住唔好喊出黎
 
同學一入到病房，就見到身上貼滿紗布同繃帶嘅小祺




 
對於有同學黎探佢，佢非常開心，三個小朋友傾計傾得好高興，相反，兩名家長見到小祺身上傷勢，佢地個鼻都酸一酸
 
「Miss LEE，係佢屋企人打到咁?」
 
班主任點一點頭「佢係北角街頭暈低，由途人送入醫院，果日仲要落住雨」
 
三個學生傾左陣計，有護士入黎幫小祺換紗布消毒，班主任想兩位同學離開後，兩名家長堅持留低陪小祺
 
當小祺件病人衫一除低，佢背後傷勢出現係各人眼前
 
小祺背上好多滕條印，有D仲要未埋口，係傷口上撕落嘅紗布有D仲痴住少少肉
 
見到呢個情況，即使兩名家長人生閱覽有幾多都好，佢地都忍唔住落淚
 




小祺嘅傷，唔單止令佢自己痛苦，仲令其他人心如刀割