係同屋室友?定係同居密友?: (S4)22. 拘捕

係一間屬於警方嘅安全屋內，小祺係社工陪同下黎到，現場除左有社署為工、警方之外、仲有教育心理學家
 
教育心理學家拎出要問嘅問題問小祺，例如知唔知咩係講大話之類
 
不過小祺已經係4年級，所以教育心理學家都好快輕輕咁帶過呢D問題，佢一黎就問小祺家庭狀況，同咩人同住，同屋企關係如何
 
亦慢慢深入咁問到當日發生咩事，小祺亦都如實作答
 
錄影後，社工陪同小祺返到醫院，將佢自己嘅物品都收拾好後，直接坐非緊急救護車去到兒童之家
 




入到去，係一個大廳，每一個小朋友都有一個屬於佢地自己嘅空間，即係每人有間類似老人院嘅板間房一般，有張床、書檯書櫃同埋家櫃鞋架等等
 
係兒童之家，小祺感到有少許嘅安全，佢知道，即使自己係兒童之家，都一定比係自己嘅屋企更好，至少，唔會有人虐打佢
 
另一方面，警方錄影完後，第二朝就去小祺屋企到，迎接梁奮成同梁老太
 
係警署內，梁奮成同梁老太均唔承認自己有打過小祺，反指警方冤枉好人、打橫黎講，警字兩個口等等
 
其實點止兩個口，佢地而家鍾意話乜就乜架啦
 




即使係咁，佢地兩人仍然俾警方拘捕，罪名係「對看管之兒童及青少年襲擊」即係虐兒，兩個各准以現金$1000保釋，每個月返警署報到
 
返到屋企，佢地兩個都好氣憤，特別係梁老太，佢覺得學校完全偏袒小祺
 
「果個丫頭片子!!!咁樣話大話都有人信!!!你仲唔快D去搵佢叫佢同警察話係佢自己跌傷!!!」梁老太對住連麗琴講
 
「奶奶，而家個女去左邊到住我都唔知，點去搵佢?」
 
「妳用下腦啦!!!佢終有一日會返學架嘛!!!咪去學校搵佢囉!!!」
 




大約兩星期後，小祺終於可以返學，呢幾個星期，都係小祺同學幫佢抄手冊同筆記、每日都有老師去幫佢補課上堂等等，小祺都等返學嘅日子等左好耐
 
學校方面，之前已經出左通告俾四年級家長，通知學校有同學受到虐待。愈來愈近小祺重返校園日子，學校都做足準備工作
 
因為小祺暫居保良局，每日都會有局方嘅校車送佢地去保良局嘅小學或者原有學校返學，所以小祺返學就唔成問題。最大問題係佢同細佬同一學校，就有機會同佢屋企接觸到，所以學校做左行政措施，去令佢地兩姊弟減少見面
 
小祺每日返到學校，會立即有當值老師陪同下去到教員室，而小息同午飯時候，小祺都會留係教員室，對於學校呢個安排，小祺完全明白同理解
 
小祺一踏入課室，就受到同學熱烈嘅歡迎，過左幾星期嘅醫院生活後，小祺終於返到學校見返一大班同學，可以大家一齊走走跳跳上堂讀書、做功課搞破壞
 
但係，雖然校方做足行政措施，但係兩姊弟總有機會係學校見面
 
係小祺復課後無耐，佢同梁國柱就係學校到見到對方
 
而且，仲展示出梁國柱一直以黎對家姐嘅輕視同暴力