係同屋室友?定係同居密友?: (S4)26. 過堂

梁氏一家人依照檢控通知上嘅日子同時間，準時去到東區裁判法院
 
裁判處門口嘅大水牌，例明當日每一庭會有咩案開審
 
梁奮成不停係到搵佢地單案嘅編號，奇怪係咩都搵唔到
 
「你係新案，水牌上唔會有你案件編號」
 
梁奮成轉頭一睇，係法院嘅外判保安，得知佢地係去第一法庭，保安就指示佢地去五樓
 




佢地一出電梯，就見到好多人坐係到等，有律師同客戶傾緊，亦有人好似佢地咁樣，一個人坐低
 
乜都唔識嘅梁老太就以為一陣會好似電視劇咁，有律師幫佢地打
 
「一陣入到去呀，咩都唔好認!我地根本咩都冇做過」
 
接近9點，開始有律師、大狀同被告一齊進入庭內
 
係梁奮成同梁老太想入去前，有法庭書記叫一叫停佢地
 




「請問有冇梁奮成同梁曾妹?」
 
「係…有!!」
 
法庭書記望一望佢地就知道情況，不過循例上都會問一問
 
「有冇代表律師?自已處唔處理到問題?」
 
冇上法庭經驗嘅佢地，立即開口話唔識，冇律師之類
 




「你地而家去7樓，搵今日嘅當值律師會面，咁佢會係你地今日嘅代表律師，今日係免費提供服務」
 
如是事，梁氏一家去到當值律師辦事處到等律師黎
 
通常當值大律師係會成為同一日內大量被告嘅法律代表
 
是日大狀坐係梁氏一家面前，睇緊律政署嘅檢控資料
 
「梁生梁老太，咁律政署而家告你地對看管兒童實施襲擊，即係虐兒啦」
 
未等到大狀講哂，梁老太就已經連株砲發
 
「邊有打佢呀!!!係個丫頭片子自己扮野咋!!!!」
 
「拿，梁老太，妳有冇做過呢，個官就會根據證據去判案，我嘅責任呢，係幫妳地幾位做法律代表，咁我同妳地解釋返呢條罪啦。係裁判署審呢，最高就入獄三年，但係如果個官覺得嚴重嘅話，係可以轉去地院或者高院審。呢條罪最高係會判入獄十年」




 
一聽到有機會坐十碌，梁奮成都打左個突，佢以為只係罰下錢就算
 
「咁我地一陣上庭就唔認罪?」梁奮成問
 
「如果認罪，就立即判刑，咁會有刑期1/3減免，但係唔認罪，打打下官司先認呢，就唔會再有減免」
 
「通常做法係點?」
 
「你地第一堂，我地俗稱過堂，通常我地可以同控方商討，用簽保守行為代替受刑」
 
「即係點?」
 
「即係你同意控方對你嘅指控同案情，但控方基於背景同小朋友將來成長關係，提出不提證據起訴，如果個官接納的話，就會簽守行為令，咁樣就唔會留案底」
 




一聽到要認自己有打過小祺，梁老太非常唔滿意
 
「如果唔批又點?」
 
「唔批嘅話，我地會下押後一次，直到辯方準備好哂，就會同控方就住證據而上庭。但我解議都係同控方商討先」
 
黎到梁氏一家最擔心嘅問題，收費
 
因為梁奮成係出現金，冇咩銀行紀錄，再加埋梁老太，所以佢地好輕易就可以得到法律援助。處理好今日問題後，梁氏一家再入庭內
 
由於佢地係新案件，所以等候時間比較耐，大約45分鐘後，到佢地案件
 
「下一單係新案件，案件編號EC/3369，第一被告人梁奮成，第二被告人梁曾妹」
 
法庭書記讀出案件編號後，梁奮成同梁老太企出被告位置




 
「我係今日被告嘅法律代表，裁判官閣下，辯方要求將案件押後4星期，以便資詢法律意見」
 
「控方?」「控方同意辯方要求」
 
「案件押後4星期，於本庭續審」
 
第一堂過堂，梁氏一家就完左