係同屋室友?定係同居密友?: (S4)27. 判決

六個星期後，小祺基本上已經完全康復，可以正常上體育課之類
 
雖然身體上嘅傷已經好返哂，但係心理上嘅創傷依然存在，而且身上仲有疤痕，所以小祺係宿舍時，永遠係趁冇人嘅時段先去沖涼梳洗
 
有時晚上瞓覺，佢會夢見自己俾屋企人追打嘅惡夢，會俾惡夢嚇醒
 
佢瞓覺時會用張被緊緊咁包實自己，以免受到傷害
 
今日係學校時候，小祺俾班主任叫左去會客室，當小祺去到果時，社署嘅社工、仲有班主任同學校社工都已經係到
 




小祺當刻就知道，應該又係關於佢屋企嘅問題
 
每當諗起屋企人嘅事，小祺就會有驚慌嘅情緒，當然學校都發現到個問題，所以一直都有社工為小祺跟進
 
「小祺妳而家係宿舍生活點樣?有冇唔慣?」社工開始問D例行問題
 
小祺都係答返，開始習慣之類嘅答案
 
幾句問題之後，社工都進入正題，不出小祺所料，係佢屋企人嘅官司完左
 




「小祺，係上星期，妳屋企人打妳嘅官司已經完左，我地社署同學校都收到裁判官嘅指示」
 
「係…」小祺有D驚要返屋企繼續同屋企人住
 
「原先妳屋企人嘅代表律師，去信律政署，想商討有冇其他方法去代替檢控，例如簽保守行為咁樣」
 
「係..」
 
「但係律政署嘅檢控官詳細睇過妳主診醫生、仲有其他人嘅口供、同埋妳嘅醫療報告」
 




「係..」
 
「檢控官睇完之後，決定唔放過妳屋企人，唔批准佢地嘅簽保守行為要求，另外佢地上到庭果時都否認控罪」
 
「係…」
 
「經過左一場官司，唔係好多，妳爸爸同嫲嫲罪名成立」
 
「咁佢地…要坐監?」
 
社工點一點頭「如果妳爸爸唔係打到妳太傷，佢都可能只係判社會服務令，但係妳送院果日係全身血受傷，連校服同成績表都係血，所以裁判官決定要監禁」
 
「咁…佢點?」
 
「妳爸爸被判監禁半年同埋罰款$20000，而妳嫲嫲，就被罰款$10000，兩個人都留有案底」




 
小祺聽到咁嘅消息，唔知開心定唔開心
 
「另外，因為妳細佬曾經係學校襲擊妳，而當日又有多人做證，以及妳屋企默許佢嘅行為，所以裁判官下令要將妳同細佬分開」
 
「即係…我要轉校?」小祺覺得因為佢係家姐，所以要遷就細佬，由佢轉校離開
 
社工擰一擰頭
 
「裁判官交俾學校決定，而學校所有老師同職員、連同家長教師會一致通過，決定將妳留係學校，而妳細佬梁國柱就要立即執行法院命令，下星期一轉去新學校就讀，所以妳唔會再係學校遇上佢」
 
「嗯…」
 
「另外妳嘅監護人會依據法律，由社署署長委任一名人士為妳監護人。署長委任左學校現任校長及班主任成為妳監護人，如果妳小學畢業後，監護人可以由小學校長轉到中學嘅校長，直到妳18歲為止，明唔明?」
 




小祺點頭稱明
 
「而妳所有開支，都會由學校提供，包括妳嘅零用洗費，而妳嘅書簿費、校服之類，所有費用已經豁免左」
 
「知道…」