係同屋室友?定係同居密友?: (S4)28. 小學畢業

係法庭內，收到判決嘅梁奮成呆左坐低，佢萬萬估唔到自己會因為教訓個女而要面臨牢獄之災
 
而梁老太就更深深不忿，佢一直認為自己冇做錯，教訓小祺係好平常嘅事
 
佢仲係庭上不停稱小祺為丫頭片子、蝕錢貨之類
 
果日嘅裁判官正正係一名女性，如果梁老太唔咁樣話小祺嘅話，個官仲應該會念左佢年紀大(其實都只係50幾)，同埋佢出手唔重而輕判
 
不過佢咁講法，裁判官就決定順手罰埋佢錢，因為梁老太作供時完全係偏向梁國柱，所以引致裁判官反感
 




另外令裁判官另眼雙開嘅係，佢地竟然對個細佬係學校公開襲擊家姐嘅事視而不睹
 
為左保護小祺，裁判官決意將兩姊弟分開
 
初時梁老太都認為一定係小祺要轉校，佢覺得梁國柱係而家間小學到讀比起家姐讀更有前途
 
不過校方依據兩個人嘅成績同行為，多方面考慮下，佢地要小祺留校
 
一黎小祺係受害者，二黎小祺成績同操行比起梁國柱要好得多
 




所以，教育局好快安排左梁國柱係東區一間小學插班，不過立即有位俾你插班入去讀嘅學校，校風同成績一定唔會比原先間學校好
 
當梁老太知道自己個孫被迫轉校時，佢又差D大鬧學校。可幸嘅係，今次有小祺嘅大伯同姑媽係到
 
原先佢地想見下小祺，提出由佢地照顧小祺，總比住保良局好
 
可惜小祺拒絕左大伯同姑媽嘅建議，因為佢地始終同梁老太有連繫，係大時大節總會有機會見面
 
而且小祺真係唔想連累到其他人，伯娘生左家姐後，已經唔受到夫家重視，如果仲收留埋麻麻眼中嘅「罪人」，大伯一家壓力有幾大，可想而知
 




同樣道理，姑媽細個時都已經唔受屋企重視，如果仲同麻麻作對，佢都會比較辛苦
 
所以佢都係決定留係保良局就算
 
轉眼間，小祺即將小學畢業，以佢嘅成績，成功考入左一間band 1中學，雖然唔係傳統名校，但係佢自己都已經好開心
 
係小學畢業典禮上，所有同學都一齊上台唱歌行禮，大家好開心咁一齊影相
 
一張張大合照之中，所有同學都非常開心
 
有賴而家科技同互聯網嘅發達，即係畢業後，大家都可以用電話電腦保持聯絡，唔似以前咁，寫完嘅紀念冊都唔知會飛左去邊
 
係校長嘅勉勵下，大家一齊小學畢業。小祺順理成章，成為左全年全級第一，獲取獎學金
 
係小祺上台之時，受到全級企起身拍掌支持及鼓勵




 
因為台下所有嘉賓、同學、家長，教職員都知道，呢幾年小祺過得有幾難幾辛苦
 
不過眼望住其他同學有屋企人黎睇佢畢業典禮，孤身一人嘅小祺顯得有點孤單
 
不過，佢仍然有屋企人的
 
「小祺!!!」小柔係佢身後出現
 
「家姐!!表姐!!」
 
「我地一放學就立即趕過黎啦」
 
梁小柔同埋王雪伶嘅到來，令到原本覺得孤單嘅小祺，增添左不少溫暖
 




其實小祺，仍然有屋企人的
 
 
係會場一角，連麗琴係遠處偷偷望住自己個女，佢有d為8年前所做嘅事而後悔，但係唔咁做的話，佢會俾人趕出呢個家，萬般無奈下，佢只可以犧牲小祺
 
佢只希望，呢個秘密永遠唔會俾人揭發，同埋個女終有一日會原諒佢