係同屋室友?定係同居密友?: (S4)29. 中學時代的姊弟

「即係妳18歲前都冇見過父母?」學翹問攬住坐係佢大髀上嘅小祺
 
「冇呀，最多係大伯姑媽佢地黎探我果時，俾我睇下佢地D相，講下佢地近況」
 
「妳細佬最後點?」
 
「下?佢呀?由轉校開始，佢人生都係咁，飯來張口果D」
 
「即係好似妳而家咁?」學翹拎起粒士多啤梨遞去小祺咀邊
 




「畢竟佢係男孫，屋企又咁傳統」小祺咬左粒士多啤梨後講
 
「不過寵到佢目中無人、極度自大呢」小祺撳出左佢細佬一張相出黎俾學翹睇
 
「嘩!!肥宅黎嘅!?」
 
「係呀，仲引發左好多笑料」
 
「有冇D可以分享下咁呀?」  「嘩!!!你個人咁八掛嘅!!」
 




「笑下都好呀」
 
「唔…根據我家姐同表姐同我講，佢係五六年級呈分試果時，懶叻，以為老師改好嘅作業、功課簿等等都係冇用，一次過當廢紙咁扔左，話考完試啦，冇哂煩惱之類」
 
「然後呢?」
 
「然後第二日學校話要收返，叫同學準時交返哂」
 
「下?燒哂囉，咁佢點呀?」
 




「佢咪同麻麻返學校大鬧一場，話學校冇提佢地。不過學期初已經提哂，俾哂佢地簽通告，要留返5同6年級所有功課、試卷用黎呈分用」
 
「就係咁佢就入唔到好學校啦?」
 
小祺擰擰頭「佢D試卷同功課都幫唔到佢咩手，每次都係唔合格，最叻先得果70分，佢仲點入好嘅中學?」
 
學翹聽到後問「妳屋企冇幫佢搵補習咩?」
 
「有都冇用啦，麻麻成日話細佬好叻，讀咩中學都一樣，所以放縱佢」
 
同所有客家人，應該係話重男輕女嘅客家人一樣，永遠都覺得D仔係叻過女，不論讀書定做野
 
所有女最好就留係屋企照顧家庭就算，唔需要讀書多
 
「妳細佬去左間咩中學?」




 
「寶馬山五嶽之一囉」
 
「woo!」學翹聽到小祺細佬係寶馬山中人，少不了有點肅然起敬，但係諗清楚d，佢呢d肥宅，係果度又點樣生存呢，所以學翹又再追問
 
「妳細佬係充當沙包定係練拳份子架?」
 
「呢層呀….佢似乎係沙包多」
 
「但係妳中學果時有冇見過妳細佬?」
 
學翹咁問都有d多餘，小祺係Band 1B中學嘅學生，佢細佬係band 3C嘅學生，兩間學校通常唔會有任何聯校活動，最多可能係街上相遇之類
 
小祺坐好後再講「見過嘅，之後佢地咪又俾麻煩我囉」
 




學翹根據小祺一直以黎俾佢屋企人嘅印象，作出推斷
 
「等我估下先，佢地一定以為中學有世襲，所以自行去妳學校話返學，係唔係呢?」
 
小祺望一望學翹「點解你會知道架?」
 
「例牌啦」
 
「就係因為咁，果時我D中學同學先知我唔係同屋企住，而係住保良局」
 
小祺撳一撳中學時代張相出黎。中學時代嘅小祺，同而家已經冇分別，一樣係扎住條馬尾，一樣咁瘦，一副楚楚可憐嘅樣
 
「妳睇下妳幾得意」  「邊係喎，係嘅話就已經有人追啦」
 
「你好想我有人追咩?」小祺好甜咁問




 
「咁咪代表我眼光好囉」
 
「你呀!!懶叻!!!!食飯啦!!!」