係同屋室友?定係同居密友?: (S4)31. 要求入學

梁奮成返到屋企，沖涼後就坐低係飯檯準備食飯
 
「阿成呀!今日我地食晏果時見到個丫頭片子呀!!原來佢係附近間中學讀書」
 
梁奮成聽到之後，冇咩反應「咁又點呀?佢會返屋企咩?」
 
「果間係好好嘅中學黎架，俾佢讀咪嘥哂!個丫頭片子將來都係人地屋企嘅，倒不如送我個孫仔入去讀仲好啦」
 
「係咪一定得先得架!?」
 




「唏!有咩唔得呀!!!小學果時都係咁啦!!如果唔係個衰女，我個孫仔一定會更高成就!!」
 
梁奮成對述書返學呢D野都唔係太熟，所以佢都係冇咩所謂，但係佢都想清楚知道，個仔係唔係一定轉到校先
 
「洗唔洗打俾小柔問下先?佢應該會熟D」
 
梁老太一聽到梁奮成想問個長孫女野，就一臉不屑
 
「問佢有咩用呀?佢而家咩都識咩!?佢呀!只不過讀得下書咋!!有咩咁叻呀!!咪又係一個丫頭片子!!點都唔夠我孫仔咁有前途架啦!!」
 




梁小柔讀書的確唔太叻，女拔萃全級頭五名，升讀CUHK藥劑系咁解者
 
梁老太命令連麗琴將梁國柱嘅文件執出黎，聽日去搞轉校手續
 
第二日，係星期六，梁老太趾高氣揚咁走去小祺間學校到，要求辦理入學手續
 
學校文員頭上一舊雲，因為學校基本上已經冇多餘學額，何來有插班生?
 
「呀，唔好意思呀家長，我地學校中一基本上已經係滿額，唔會有位俾插班生」
 




梁老太聽到咁樣，當然不滿，佢又一貫佢嘅態度，佢惡哂咁
 
「咩冇位呀!!而家我孫仔要轉校黎讀唔得呀?點會安排唔到呀!!佢家姐係到讀，點解唔可以收佢呀!!」
 
學校文員再向梁老太解釋，教育局俾佢地學校學額已滿，冇位俾人插班
 
梁老太見話唔掂文員，就要求見校長，期間引黎不少星期六返黎參與課外嘅學生圍觀
 
學校有見及此，就派出當值老師黎會一會梁老太
 
文員拎住梁國柱填嘅資料俾老師睇後，當值老師都停左一停，佢立即叫文員通知校長
 
因為文員順手將小祺file拎埋出黎，而file上有特別標記
 
上邊寫住「不能與其弟同校及與家人見面」再加上法庭案件編號




 
校長望一望個file嘆左口氣，因為要黎嘅始終要黎
 
係小祺中一入學前，小學果邊已經同中學打左招呼，詳細講左小祺件事出黎，而中學校長亦都義不容辭，呢幾年好好咁保護小祺
 
但係仍然俾小祺家人搵到佢
 
校長飲一飲水，做足熱身後，就準備出去會一會梁老太
 
依校長記憶，小祺中一入學時，小校校長同社署社工專登黎同中學開左次會，會上所有中學老師都俾小祺當年嘅傷勢嚇親
 
小學俾梁老太嘅評價係「重男輕女，蠻不講理等等負面評價」
 
中學校長再一次確認哂所有資料冇錯，所以報告再睇一次之後，就行出校長室
 




佢一行到校務處果時，已經見到梁老太帶住梁國柱不停吵吵鬧鬧，內容包括「點解唔收佢?、「點解冇位?」
 
不過校長發現到，梁小祺同梁小柱之間，係完全唔似樣