係同屋室友?定係同居密友?: (S4)32. 相見

校長去到校務處，心諗聞名不如見面，梁老太一如小祺小學校長所講，個勢係傳統老一輩嘅樣子，霸權，蠻不講理之類
 
而梁國柱就係果款，俾屋企寵到非常有自信，自以為事嘅一款人
 
梁老太見到校長時，亦都好唔客氣咁同校長講野
 
「呀校長呀嘛?你話得事啦!!而家就幫我孫仔搞入學手續」
 
「呀….嫲嫲呀，我地呢，需要睇下佢成績表先，」
 




「洗乜睇呀!我孫仔讀書一向好叻!!係佢小學D老師唔識教佢咋!!」
 
校長一拎起梁國柱份成績表黎睇，大量冷汗由佢稀疏嘅頭髮中流出
 
因為梁國柱跁成績真係「好」到一個點，佢好佩服梁老太可以講出D咁嘅說話
 
梁國柱嘅成績，除左中文勉強合格，仲要係超低空果隻
 
而英文同數學就更加唔洗講
 




校長回想起小祺當年嘅成績表，中英數有A不特止，仲有好多優點等等
 
「咁我詳細睇過梁國柱同學嘅成績…」
 
「咁得啦，佢可以入學啦」梁老太搶先一步講
 
「好遺憾通知妳，梁國柱同學成績未達到我地學校入學要求」
 
梁老太聽到校長咁講，就有D不滿
 




「咩唔到要求呀?佢讀書咁叻!係佢學校老師同佢夾唔到咋!!」
 
校長同睇一睇佢而家嘅中學後再講
 
「梁老太，好老實講……梁國柱成績基本上係入唔到我地學校，唔係差少少，距離係差好多。我地係band 1A中學，而梁國柱係band3C成績，就算學校收佢，佢都係會離校收場」
 
「點會呀!!!佢個丫頭片子家姐咪又係到讀!點解佢又得呀!」
 
「梁小祺成績，係band1A入讀我地學校，所以學校收佢係正常。而且中學係冇世襲制度，唔係話家姐阿哥係我地學校讀，個細佬妹就可以入讀」
 
「我覺得係你地偏心唔收我孫仔!!!你地同我趕個丫頭片子出校!!!然後收我孫仔讀!!!」
 
經梁老太咁樣一鬧，有好多學生都伸個頭黎望，當中包括小祺
 
「梁老太，我再次聲明一次，梁國柱嘅成績未達到入讀本校標準，另外，法庭有指示，梁國柱唔可以同梁小祺係同一間學校或場所出現，原因妳地屋企應該好清楚。如果妳地再係咁，我唯有報警」




 
梁老太一聽到校長要報警，佢怕又要俾人罰錢，所以好快帶走梁國柱
 
小祺係一角望見整個過程，以往俾屋企人虐待嘅回憶又再一次湧上心頭。隨即心跳、仲有呼吸加快，小祺開始手腳冇力，終於佢體力不支坐左係地上
 
係果一刻，佢同連麗琴目光對上左，係自主求生嘅直覺，佢用盡全力企起身，向相反方向走過去
 
連麗琴見到自己嘅女，下意識咁叫左小祺
 
聽到自己媽媽叫聲，正常嘅人都會朝住叫聲行過去，但係小祺就係相反，佢想有幾遠走到幾遠，佢想避開佢父母
 
小祺不停跑，其實佢只不過係行左幾步左右，就體力不支坐左係地上
 
連麗琴見狀，想上前扶起小祺，不過，佢好快就俾小祺班主任阻止左
 




「梁太太，法庭判左妳地唔可以接觸小祺」
 
「果個係我個女，點解我唔可以見佢?」
 
「妳地以前對小祺倣左D咩?妳已經唔記得左??」
 
聽到小祺班主任咁講，連麗琴冇再上前
 
其他同學見到有老帥阻止小祺屋企接近佢，依依覺得有事發生過，所以有幾個男同學走到小祺面前保護佢，而女同學就扶起小祺
 
小祺用一個幽怨眼神望一望連麗琴後，就轉身，由同學相扶下去左sick room
 
果一日，係佢地6-7年黎第一次見面