係同屋室友?定係同居密友?: (S4)35. 首次登門

「同妳家姐大伯食飯?」學翹夾住餸同小祺講
 
「係呀，家姐話好耐都冇見過我，咪叫我返去食飯囉」
 
學翹諗一諗都係嘅，小祺一拍拖冇耐就同自己去出席家庭聚會，所以自己都要拜訪下小祺屋企人
 
第一次去女朋友屋企食飯，呀….其實苗學翹都唔係第一次去嘅，正確講休第一次去同梁小祺屋企人食飯，總唔可以兩手空空咁上去
 
「妳屋企幾多人?」
 




「呀….家姐前幾年結左婚，生左個女，計埋姐夫….大伯同伯娘…5個人」
 
「妳外甥女幾多歲?」  「兩歲半左右」
 
於是苗學翹係晚餐後打開電腦，開始搵送禮嘅野
 
不過送之前，佢都要搞清楚場合先，去酒樓丫定係去佢大伯屋企
 
「我地果日會去大伯屋企，之後去酒樓」
 




「妳大伯飲唔飲酒?」 「佢唔煙唔酒，成日去跑步，剛剛先跑完渣馬個全馬」
 
「全……..馬……..」你而家叫苗學翹跑全馬唔係唔得，可能會咁到死咁
 
「咁妳姐夫呢?」
 
「姐夫係家姐D同事，心臟專科醫生」
 
小祺覺得奇怪，學翹問咁多黎做咩
 




「咁第一次見妳屋企人，都要買D野架嘛」
 
「下?!唔洗啦!!!你知道要買D咩?」
 
「估下啦，估下啦」
 
就係果日，佢就打俾黎大狀問意見
 
「來來去去都係果D架啦，小祺大伯咁養生，你咪送D健康野俾佢比較好」
 
「偉哥?」  「喂你咁樣會害死人喎」
 
經過同黎大狀商量後，佢都係決定買新鮮生果去
 
既然要買新鮮生果，就要去最新鮮嘅地方到買




 
係食飯當日下午，學翹一早就捉左小祺出黎，關上車門，右腳俾油，部車直去油麻地果欄
 
「我都話左唔好買野囉」 「禮貌上都要買架嘛」
 
小祺心中一甜，學翹咁緊張佢同屋企第一次會面
 
係果欄內，佢地兩個好細心咁揀生果，不過有一樣生果，學翹同小祺屋企人一定唔會食，榴槤!!
 
學翹揀左幾盒塔斯曼尼亞車厘子同埋日本淡雪士多啤梨，因為小朋友一定鍾意
 
揀好生果後，學翹同小祺直去太古城
 
「好好好，搵位泊車先」
 




「你泊呢到呀?太古會唔會好貴呀?」
 
「咁唔係可以泊邊?」
 
「唔….泊返我以前劏房果度?」
 
「泊太古啦，安全D好」
 
泊好車後，小祺帶學翹上去大伯屋企。第一次見小祺屋企人，難免有少許緊張
 
「你放鬆D喎」「我冇緊張呀，冇」
 
佢地行到去大伯住果一座，比較近鰂魚涌公園，行到去單位門口，已經見到梁小柔一家嘅鞋放係外邊，單位中傳出小朋友嘅笑聲
 
「唔知瑤瑤鍾唔鍾意同你玩呢?」




 
「佢讀書未?」  「讀緊N班啦，日日返學都好開心」
 
「叮噹!!」小祺撳響左大伯屋企門鐘
 
「咔察」一聲，木門打開，門後的正是小祺伯娘，然後就見到個小朋友，係伯娘身後用力鑽出黎，雙手捉住鐵閘對住小祺講
 
「姨姨啊~~~~~~~」
 
「好啦瑤瑤，唔好阻住婆婆開門俾姨姨先啦」梁小柔係單位中對自己女兒講
 
不過瑤瑤一見到小祺後就立即有所要求「著鞋，去街街」
 
睇黎平時小祺都係寵慣呢個外甥女