係同屋室友?定係同居密友?: (S4)36. 被收服

小祺伯娘先打開門同閘，閘後嘅小朋友已經急不及待咁衝出黎，小祺一手抱起佢
 
「姨姨，街街」
 
小祺個外甥女非常可愛，塊面肥嘟嘟好可愛。不過佢地連野都未放入屋，而且瑤瑤都未著鞋，佢地又點去街呢?所以，小祺抱住瑤瑤行返入屋先
 
放低瑤瑤後，小祺捉實學翹隻手，向伯娘介紹
 
「伯娘…佢係我…男朋友….」
 




其實大伯同伯娘一早就知道學翹全名，仲有佢好多野，真係多得東張閪望唔少
 
「得啦小祺，妳家姐講哂我知架啦，呀學翹，你入黎坐低先啦」
 
學翹拎出一埋生果「伯娘，我唔知買咩俾妳地好，所以係果欄買左D新鮮生果送俾妳地
 
「哎呀~唔洗咁破費啦，你平時已經要照顧小祺起居飲食」
 
小祺鼓成泡腮表示不滿「咩呀伯娘….我都有幫手做家務架」
 




伯娘拎D生果入廚房，再洗好淡雪出黎俾瑤瑤食，小朋友的確好鍾意食甜野，與其俾佢地食糖，例不如俾D甜嘅生果佢食，有益又健康
 
學翹見到小祺大伯，一如小祺所講，佢成個身型都係運動型，完全唔似60歲以上
 
大伯行到學翹身邊，拍一拍佢身上肌肉
 
「唔錯唔錯，全馬跑幾多?」大伯好開心咁講
 
「好耐冇跑，大約…4個鐘」
 




「我都係差唔多啦，隨便坐」
 
不過，學翹應該連坐嘅機會都唔會有，因為瑤瑤已經食好士多啤梨，拎住對鞋行出黎
 
「姨姨，著鞋，街街」
 
學翹彎低身望住瑤瑤「妳係唔係想去街街?」
 
瑤瑤第一次見學翹，所有感得有D生保，佢望住學翹唔出聲，但又想去街
 
當小祺行近佢時，佢走到小祺身後
 
「姨姨，著鞋，街街」
 
「妳叫哥哥帶妳去街街好唔好?」小祺笑住咁同瑤瑤講




 
「哥哥，著鞋，街街」
 
瑤瑤拎住對鞋俾學翹
 
「好啦，我同姨姨帶妳去街街啦」
 
瑤瑤聽到後非常開心，佢立即自己著鞋襪準備出發，著好鞋襪後，佢仲自己去拎佢自己個玉桂狗背嚢同水樽
 
「街街」瑤瑤好快企係小祺面前準備好
 
「瑤瑤妳想去邊到先?」大伯樓下就係公園遊樂場，通常瑤瑤返親黎，佢都會落去玩
 
瑤瑤拉住小祺出門口時，小柔出黎同囡囡講
 




「要聽姨姨同哥哥話，知唔知道?」
 
瑤瑤點頭知道後，佢就拖起小祺同學翹一齊出門口，不過今日有學翹係到，佢就有另一個要求
 
「唔公園，唔公園」
 
佢地三個人好似一家三口咁係商場到行，瑤瑤拖住佢地，覺得好開心
 
估唔到瑤瑤要去嘅，真係唔係去公園玩，佢帶住學翹同小祺，係太古城嘅商場到行
 
一直行，行到去賣玩具嘅連鎖店
 
小祺彎低身問「妳想去呢到呀?」
 
瑤瑤點頭稱是，於是佢地一行三人一齊行入店內




 
小祺拖住瑤瑤邊行邊睇野，然後去到賣公仔嘅地方，瑤瑤一邊睇一邊揀，佢最後揀左隻玉桂狗公仔
 
佢拎起之後對小祺講「姨姨買」
 
學翹見瑤瑤拎住公仔唔想放手，佢就彎低腰問
 
「瑤瑤想要公仔係唔係?」「係」
 
「咁瑤瑤乖唔乖?」「乖」
 
「咁哥哥買俾妳好唔好?」「好」
 
於是，精明一世、綽號獎金獵人嘅苗學翹，就咁俾個兩歲半左右嘅小妹妹收服左