係同屋室友?定係同居密友?: (S4)37. 會面原因

瑤瑤好開心咁拎將隻跣你磨轆公仔，放係背囊之中，然後一隻手拖住小祺，一隻手拖住學翹咁行，十足十一家三口咁
 
望住可愛嘅瑤瑤，學翹諗極都諗唔到，其實生女有咩唔好呢?
 
生女，細個果時非常可愛，又會痴實屋企。生仔，佢地唔俾麻煩，唔炸左屋企已經當贏
 
因為學翹仲記得，佢細個係屋企嘅偉績，例如：將雞蛋扔落街、將D橙扔入冰箱到雪到硬
 
仲有係小學時，同老師句句頂到行哂但學翹又冇錯，激到老師生蝦咁跳，見哂家長，又唔可以話佢錯咁。班主任講一句，苗學翹就駁返五句，仲要句句精警咁樣
 




原本瑤瑤想去食雪糕，但係頭先食左淡雪關係，小祺就話唔可以食。瑤瑤果然好聽話，小祺姨姨話唔食，佢就唔食
 
當佢地去到酒樓時，瑤瑤好乖咁自動去返父母身邊坐低，梁小柔幫佢拎出瑤瑤嘅專用餐具，準備大口大口咁食飯
 
其他大人都一齊坐低食飯，其實今日小祺大伯叫小祺返黎，除左食飯同見下苗學翹之外，仲有D野要同小祺講，小祺知道返黎食飯嘅時候，佢都知道應該有D新野要update一下
 
「大伯，係唔係果d人又有新搞作出黎?」
 
小祺大伯聽到個侄女咁講，都幾佩服佢，估唔到小祺咁快就估到其中嘅原因。一黎佢真係幾耐冇見過小祺，二來，佢阿媽，梁老太又真係搞左d野出黎俾佢地
 




「小祺妳仲記唔記得我地屋企有間唐樓，好舊果間」
 
小祺load一load「我記得，行樓梯行三層樓果間嘛」
 
「冇錯就係果間」
 
「層樓應該係佢地手上，唔關大伯你事喎」
 
「小祺，妳大伯拎得出黎講，會唔關事咩?妳應該估到係咩事呢」
 




「咩事呀….」小祺用腦諗
 
「而家層樓係大伯你手上?」小祺問
 
大伯苦笑咁點一點頭，而聰明嘅獎金獵人嘅觸鬚，再一次豎一豎起
 
「唔……..」小祺絞盡腦汁都諗唔到，然後學翹係佢耳邊講
 
「九成係關於妳細佬」  「你肯定?」學翹點一點頭
 
小祺問一問大伯「係唔係關於細佬?佢又搞d咩出黎?」
 
大伯嘆一嘆氣「唉，妳細佬囉，話做咩生意有投資，想要錢，於是就同妳嫲嫲講，妳阿嫲一聽到就立即想搵錢出黎，不過佢手上又邊狠有咁多現金?於是佢就押左層樓拎左200萬左右俾妳細佬」
 
「200萬!?大伯而家層樓係你手上，即係你夾硬幫佢地還錢架喎!」小祺好不滿咁講




 
而同時，苗學翹已經拎部電話出黎撳機計數
 
「有咩辦法?你細佬話想要乜，妳阿嫲就會立即俾佢」大伯一臉無奈
 
「但係佢冇理由要大伯你地幫佢架嘛!佢邊識做生意投資?」
 
「妳阿嫲話，妳細佬搵嘅野一定賺緊，佢會為家族增光，所以點都要拎錢俾佢去投資」
 
「世界上邊會有必賺嘅生意?阿嫲係睇中我會幫妳大伯還錢，所以先夾硬要轉層樓俾大伯，遲d層樓又話要維修等等，佢正好將個波踢黎我地到，阿嫲個算盤就係咁樣打」小柔一臉不滿咁講
 
「2球…..如果市建局收……唔….果個位唔差，近地鐵…..如果出手嘅話…..點都唔會輸」坐係小祺身邊嘅學翹，睇位住地圖，拎住計數機不停咁計
 
結果，佢得出一個結論。獎金獵人，再次出手。