係同屋室友?定係同居密友?: (S4)38. 「成功」人士

由於係小祺屋企自己內部嘅事，所以學翹並冇多口，係小祺一家人討論之間，佢同小祺姐夫都冇出聲評論。小祺嘅姐夫張醫生，雖然唔係上門女婿，但係外家嘅事，佢都係少理
 
係佢地屋企討論期間得知，小祺細佬話投資旅遊會藉，入左會之後，幫你係某酒店以優惠價錢供間房，有人入住時可以同酒店分返錢之類
 
苗學翹一聽就知道，係多年前盧押道賣旅遊會藉嘅公司把戲，雖然冇LB咁出名，但係都唔少人受昆。絕對有理由相信，小祺細佬一聽到好快有錢賺，就乜都唔理，科左水先
 
係晚飯中，小祺大伯好細心咁留意學翹，學翹同佢女婿係同一類人，冇咩事唔會插咀，而且仲好照顧身邊嘅人
 
晚飯過後，苗學翹先去停車場拎車，等小祺同屋企人相處耐少少，其實真係少少
 




好快部車就去到小祺等待嘅地方，由於瑤瑤都住係太古城，所以佢地亦送埋小祺上車先返屋企
 
「拜拜姨姨，拜拜哥哥」瑤瑤好開心咁同佢地揮手
 
「瑤瑤要聽話，下次姨姨再黎同妳玩好唔好?」 「好」
 
「呼」一聲，學翹部車上東區走廊，準備返學校宿舍
 
車上，小祺問學翹，同瑤瑤玩得開唔開心
 




「有個咁得意嘅小妹妹同我玩，當然開心」
 
學翹乘機問下小祺「妳細佬學人做生意?」
 
小祺嘆口氣再答「生咩意丫，我覺得佢係俾人呃錢居多，咩旅遊會藉….之前佢試過賣健康食品架啦，仲有語文課程」
 
「睇黎佢都好易受昆喎」呢條一定係大水魚，可惜學翹唔係千門中人，否則一定係小祺細佬身上大撈一筆
 
「佢自細受屋企追奉捧，盲目咁捧到佢天上有地下無咁，令佢覺得自己高人一等，呢樣野冇得救」小祺嘆氣咁講
 




「似乎妳仲好著緊屋企」
 
「我係擔心大伯者，無啦啦孭左200萬上身。阿嫲就係咁，成日話佢自己係一家之主，屋企所有野要以我細佬為中心，咩都要就哂佢」
 
「妳屋企重男輕女好嚴重喎，咁妳嫲嫲又係睇唔起妳家姐?」
 
「我家姐自細讀書游水好叻，小學未畢業已經俾女拔拉左入去讀，仲直升中學部，又以極好成績畢業入中大藥劑系。即使係咁，嫲嫲都覺得家姐冇咩用，嫁出去就係外姓人。相反我細佬讀書讀到一pat野咁，DSE唔合格都好，都要為佢辯護，話係課程問題」
 
「咁佢DSE都唔合格，佢之後讀左D咩呀?」學翹有D興趣了解下佢細佬
 
「佢係街上收傳單，去左二三流商業大廈到聽講座，話係咩美國大學在港修讀學位果D」
 
「即係讀學店咁啦」「佢應該都係啦」
 
「係唔係咩美國博立頓大學呀?定印第安納大學呀?」學翹對小祺細佬中左邊間學店已經胸有成竹




 
小祺諗一諗「聽大伯講好似係博立頓大學」
 
「係唔係銅鑼灣後巷商業大廈上堂?」
 
「咦?你點知嘅?」
 
學翹當然知道，因為當年肖翠君就係係呢D學店畢業出黎後，當正自己真係大學生
 
學翹一五一十咁講哂俾小祺知道
 
「即係佢讀左D咩呀?」
 
「香港持續教育書院，即係好似國力書院果D咁，掛羊頭賣狗肉。但係好過國力少少，用美國嘅大學黎昆人，好過國力用菲律賓比立勤國立大學，即係同屋企姐姐做校友咁囉」
 




睇黎小祺個細佬，真係做乜都咁「成功」