係同屋室友?定係同居密友?: (S4)40. 轉手

兩星期左右後，小祺同學翹拎住張支票去到大伯屋企，將張支票交俾大伯同伯娘，一齊還返錢俾銀行
 
再過一段日子，就收到律師樓電話，可以去拎返樓契
 
佢地四個人上到律師樓，齊齊坐低，當然，佢地又係去左游律師間firm
 
搞轉名手續係好快，而且佢地仲一早準備好哂所有野
 
小祺轉名手續費同律師費，全部由學翹包哂
 




當佢地離開律師樓時，果一層舊樓已經係屬於小祺，其實所有redeem嘅錢係由學翹出，所以係法律上，學翹都係有份
 
梁偉成唔知道點解翹學要幫自己同小祺還錢同拎返層舊樓，所以佢都要問下學翹
 
「阿翹呀，做咩你要幫小祺同我還清d錢?」
 
學翹笑一笑，佢唔出聲咁指一指小祺背脊，俾衫冚實嘅疤痕
 
梁偉成睇一睇學翹指住嘅地方，瞬間明白佢嘅用意
 




學翹係要幫小祺向佢細佬一家拎返佢咁多年黎失去嘅野同埋補償
 
但係梁偉成諗緊都唔明，點解係要呢一層咁舊嘅樓呢?
 
然而，當學翹車佢地返大古城之前，佢地順路去一去海味街買d野，兜過堅尼地城果時，梁偉成終於知道點解
 
學翹部車由卑路乍街右轉去吉席街時，小祺伯娘講左d野
 
「呀，我細個時住呢到，已經變成咁，條街都冇埋囉」
 




「伯娘，點解條街會冇左呀?」小祺問
 
伯娘指一指泓都三座果到「以前呢條叫建文街，係一大堆好舊嘅唐樓，2002年左右因為起新樓，包左入去，條街就冇左啦。以前後邊仲係焚化爐同埋屠場」
 
心水清嘅大伯係車頭就問左學翹一句
 
「就係咁?」
 
學翹微笑咁回覆「冇錯」
 
「真係好叻仔，一凍結嘅話，咩都冇得改。但係你點解咁肯定會發生?短期內?」
 
「似係囉，你見附近交通唔差，校網又唔錯，所以我膽敢推斷者」
 
「你有冇落釘?」大伯問學翹




 
學翹微笑回應「大伯你認為呢?」
 
學翹咁答，好明顯係有
 
坐係後座嘅兩名女乘客，完全唔知佢地講咩，所以佢地可以繼續話題
 
「如果真係發生，佢地可以能會不惜一切搶返黎喎，你準備好?」
 
「大伯，你應該都知道，我曾經俾前女友一家人搶樓單野」
 
「我當然知啦」
 
「我身後有一大堆法律界人士可以幫到我，我一d都唔怕」
 




到左太古城，佢地一行四人一齊落車，因為伯娘點都要佢地留低食飯
 
係大伯屋企內，學翹睇住大伯嘅獎狀，好多都係馬拉松完成證書
 
仲有毅行者嘅證書

睇黎小祺大伯嘅生活真係好健康
 
係返宿舍嘅途中，小祺忍唔住問學翹
 
「你頭先係車到同大伯講d咩野呀?我都唔明」
 
「如果妳有大伯咁聰明就好囉」  「你即係話我蠢呀?」
 
「少少咁啦」  「咁你地講左咩者」




 
「大伯知道點解我要幫佢redeem層樓再轉妳名」
 
小祺聽一聽後「係喎，我都未知喎，點解呀?」
 
學翹笑一笑「記唔記得我地今日離開律師樓後去左邊?」
 
「咪去左買海味囉，做咩呀?」
 
「之後呢?」
 
「之後….去左堅尼地城」
 
「伯娘講左咩?」
 




「咪話以前d舊樓俾人收購重建囉」
 
「所以咪咁囉」
 
學翹提一提後，小祺仿然大悟
 
「而家樓契上只有我個名…..咁如果真係收購的話….」
 
「冇錯!妳父母細佬阿嫲會一蚊都拎唔到，全部賠償歸妳一個所有」
 
「點解….」
 
「就係要佢地為以前咁對妳，付出代價」