係同屋室友?定係同居密友?: (S4)42. 問題

「乞嗤!!!」係供應部嘅學翹對住電腦打左個乞嗤，一向好少病嘅佢，基本上唔會太打乞嗤
 
「又係樓上係到講緊我呀?」學翹捽一捽個鼻後，繼續係份report上打野
 
時間黎到大約5點20分，好多同事都趁呢個時間去清洗今日係office用過嘅水杯，去埋個洗手間，準備放工
 
小祺同其他同事一樣，去完洗手間、清洗完水杯後就等待5點33分嘅一刻
 
「喂Suki，會唔會一齊去搭校巴呀?」Stephy走到去小祺身邊問。因為好多未婚嘅女同事都係搭校巴，放工後出旺角、銅鑼灣等地行下街，所以Stephy就覺得，未婚嘅小祺都會同其他未婚嘅女同事一樣，會出去行下街，而且佢都好似未同過小祺一齊搭校巴同食飯，所以佢想趁呢個機會同小祺認識下
 




「下….呀….其實….我住得好近，唔搭校巴」小祺吞吞吐吐咁講
 
其實點止近，仲可以話係學校範圍之內，不過車程都大約有兩分鐘咁多左右
 
「住得近真好，咁唔阻妳啦」Stephy開心地彈開
 
「呼~~差d俾人知道添」小祺一直都好怕俾唔太熟嘅同事知道佢住邊，但係其實佢自己唔講，全個部門都知道佢而家住嘅地方、返工放工嘅方法
 
準時5點33分，各同事連同老細都一齊魚貫咁離開office
 




「契弟走得麼呀~~~~」一眾男同事永遠都係行樓梯，應該係話跑樓梯跑落去，因為佢地有時會約埋去打波，而女同事就慢慢好斯文咁搭lift落樓
 
小祺同平時一樣，出lift後行去廣場到等學翹部車，而Stephy亦望到呢一幕
 
「咦?Suki佢唔係去搭巴士咩?佢企係廣場做咩野呀?」
 
「呀……呢層呢….」其他女同事都唔知點解答好
 
「順風車~順風車~」穎雯係到幫小祺解圍
 




「順風車?」
 
「係呀!!有同事住Suki附近，咁佢又有渣車，咪車埋囉，好平常者」
 
Stephy聽到咁樣，就唔再追問落去
 
學翹部車準時駛到廣場，小祺就好似平時一樣上車
 
「呼~我地今日有冇野出去買呀?」小祺上車後立即問
 
「冇啦，今個星期都唔洗出去買野，做咩呀?妳想去街?」
 
「唔係啦」
 
車程兩分鐘，佢地就返到宿舍，兩個人上樓後，各自去忙自己嘅野




 
學翹去忙煮晚餐，小祺就收返尋晚晾嘅衫落黎，兩個人默契非常好
 
食飯果時，學翹就問起小祺
 
「今日妳地係樓上講我呀?」  「下?你點知架?」
 
「我打左幾個乞嗤」
 
「哦，我地有講嘅」
 
「關於d咩架」
 
「我地部門黎左幾個student helper，有一個畢左業後轉正式員工，咁我地又月8起阿妹，講講下就講到你囉」
 




「我有咩好講呀?」
 
「有d UG傳阿妹同未婚Professor拍拖嘛，但係佢身邊就只有你一個，我地咪解釋下囉，你邊忽似Professor呀?」
 
「可能係一眾少女面前，我就好似湯川學咁，一個又高大英俊嘅Professor呢?」
 
小祺頓時反一反白眼，有時候，佢真係想殺死佢自己男朋友，點解佢可以咁自戀狂?但係，個男朋友又係自己揀嘅

「係喎，有冇發現近來阿妹少左搵我地呀?」小祺坐係梳化上邊問
 
小祺唔講，學翹都唔覺，的確個妹係少左搵自己，佢自己都不意為意
 
「妳咁講又係喎，通常佢一定係走黎痴住我地，近個月佢都少左黎」
 
「會唔會因為mid term?好似就到study break」




 
「佢study break都會照黎架啦，下星期睇下佢咩事先」