係同屋室友?定係同居密友?: (S4)43. 互有意思

係圖書館內，苗學嬛係到用力咁伸懶腰，係今日，佢只有上晝一堂要上，落堂後佢就去到圖書館內溫習，為即將來臨嘅mid-term做準備
 
佢將自己條頸同腰鬆一鬆後，就轉身望向身後嘅同學
 
一個同佢自己唔同學系嘅男同學
 
李文灝Edan
 
自從佢地交換左電話之後，基本上每日有時間的話，佢地兩個都會wts傾計，由一開始簡單對話，都乜都講一餐，學系內嘅是非，hall內嘅花邊新聞之類都傾一餐，佢地兩個愈傾愈多，之後索性每日都一齊出黎食飯，當面傾一餐
 




對於朋友唔多嘅苗學嬛黎講，Edan嘅出現正好俾左d歡樂佢
 
「咔….咔….」苗學嬛溫書溫到條頸同條腰都非常彊硬，佢睇一睇電話，原來不知不覺，佢由12點半左右溫到而家7點，外邊天色都已經變暗變黑，怪不得圖書館嘅書檯燈會咁光
 
佢企起身，將佢條幼幼纖腰左扭右扭後，再伸個頭去後邊書檯格
 
當時，就讀數學系嘅Edan正係到瘋狂咁計數，而且仲計得好入迷
 
苗學嬛頓時覺得，認真做事嘅男仔，係非常吸引
 




Edan係到對住pure maths不停解答，終於10分鐘後，佢完成哂所有問題
 
「妳望左我10分鐘啦喎，仲未望夠?」
 
苗學嬛聽到李文灝咁講，心跳不自然咁加速，原來佢一直都有留意到自己
 
「你攰唔攰呀?你都差唔多溫左成個下晝」
 
李文灝放低枝筆抬頭望一望佢面前嘅語文系之花，忍唔住手搣下佢塊面
 




「妳係唔係想食飯啦，係就執野行啦」
 
「一陣仲返唔返黎溫先?」
 
「食埋飯就返hall休息下啦，溫太多會攰死」
 
兩係canteen中，兩個人面對面坐，佢地兩個已經唔知連續幾多晚一齊撐檯腳，仿佛就似一對小情侶一般
 
其實近來，苗學嬛落堂時，總會wts問下李文灝落堂未，如果對方已經落堂的話，佢地就會約定一個地方等候
 
如果未的話，就會去對方學系到等
 
李文灝切一切塊牛扒，再遞去苗學嬛個口中，佢毫不客氣咁咬走塊牛扒
 
「mid-term之後，妳有咩做呀?」




 
苗學嬛聽到李文灝咁問，心中立即諗到，佢想約自己去街
 
「冇架，可能去打搞下我阿哥掛，但係如果你想約我去街嘅話，我都可以陪你嘅」
 
李文灝聽到苗學嬛咁答自己，立即精神為之一振
 
佢個心已經立即計劃緊節目，睇咩戲好?去邊到食飯好?
 
所以話，李文灝對苗學嬛冇意思嘅話，就肯定係呃人。但係佢一直都唔知苗學嬛對自己嘅態度係點
 
一直佢曾經以為，自己俾苗學嬛收左做兵，不過相處耐左，就發現苗學嬛唔似係果種，持住自己有樣有身材，就四圍收兵嘅女仔
 
相反，佢會同唔太熟，唔太啱傾嘅男仔保持距離。係sem初佢俾人傳同單身Professor拍拖時，佢自己都唔想反駁
 




「咁….妳想睇咩戲?」 「你唔會帶我睇三級片掛?」
 
「最近都冇三級片上畫，妳好想睇咩?」
 
「點知你地d男仔呀…約親女仔都係睇三級呀、恐怖呀之類，搏d女仔攬住你地架啦」
 
「下?我冇d咁嘅意圖喎」
 
「考完mid-term先啦，考埋後日之嘛」
 
雖然佢地兩個話要專心考mid-term，其實個心早就飛左去同對方玩了
 
即係可以咁講，苗學嬛對李文灝冇意思，都係呃人的