係同屋室友?定係同居密友?: (S4)45. 表白成功

苗學嬛一聽到李文灝咁講，頓時覺得佢心中嘅女仔並唔係自己，一直以黎都係自己會錯意、自作多情，佢自己心情立即低落，但又唔可以表現出黎
 
「識左幾耐呀?」 「大約半年左右啦」
 
「咁你咪直接同佢講囉，唔洗太擔心架」苗學嬛有D唔想回覆李文灝
 
「我係怕俾人拒絕者」
 
「拒絕?你應該拍過拖架喎」
 




「咁都會怕俾人拒絕架」
 
「放鬆d，冇事嘅」心中不是味兒嘅苗學嬛，想睇下果個女仔係咩樣
 
「喂，你俾人地張相我睇睇先啦」
 
「妳想睇?」
 
「當然啦!好兄弟黎架嘛」
 




李文灝拎出電話，苗學嬛同時一手搶左去
 
佢望個部電話，撳極都冇反應，成個mon只有黑色一片，mon中哪有美女?有嘅就只有佢自己嘅倒影
 
苗學嬛忍唔住同李文灝講「喂你個野壞左呀….」
 
「係咩?」「係呀!你睇!!黑mon嘅，乜都冇，只係見到…..咦?」
 
當刻苗學嬛再認真諗一諗，李文灝講電話mon中有佢鍾意女仔嘅樣係到，而電話黑mon，只有佢自己嘅倒影，瞬間，苗學嬛就知道，李文灝用咁嘅方法同佢自己表白
 




佢地兩個人心諗，終於到最重要嘅時刻啦
 
「我….應該點呀?」
 
「應該點?」
 
李文灝點點頭
 
「你同佢表白左啦….」  「真係?」
 
「係呀」  「咁我係咪成功左啦?」
 
「唔….唔知呢」苗學嬛微笑撓埋雙手係身後，抬頭望住李文灝
 
「你真係鍾意佢?」




 
李文灝點點頭「我係認真架，唔係外貌協會、唔係身材同好會，我係鍾意佢樂天嘅性格同埋對朋友嘅真誠」
 
苗學嬛聽到李文灝咁樣讚佢自己，立即覺得有D怕羞，面紅紅咁，一時間唔知點俾反應好
 
佢自己靜靜企係到，雙眼微微向上望住李文灝，佢呢個動作已經同李文灝講「你已經成功啦，我應承左你啦」
 
「呀…Marni呀……」傻傻嘅李文灝仍然唔知道苗學嬛已經答應左佢自己，所以佢企係苗學嬛面前呆企
 
兩個人傻傻咁企係到，終於，苗學嬛發現眼前呢個男仔真係傻到一個點，於是佢主動開口
 
「你仲係到等咩呀?」
 
「下?」李文灝不明所以
 




聽到李文灝咁嘅反應，苗學嬛立刻唔知好嬲定好笑，嬲又嬲唔落，但又唔知點俾提示佢好
 
「你…..真係唔明呀?」「呀……即係點?」
 
「我頭先咪講過，你都已經同人地表白左囉…..」
 
李文灝果刻知道，苗學嬛已經知道自己對佢嘅心意，佢心跳突然間跳得好快，完全唔知道下一步應該要做咩
 
苗學嬛見狀，忍唔住提佢「人地都應承左你啦，咁你下一步應該做d咩呀?」
 
李文灝係苗學嬛提完佢之下，雙手捉住苗學嬛雙手，慢慢錫向苗學嬛，苗學嬛並冇反對呢個行為，佢合上雙眼等待
 
不過最重要嘅時刻，永遠都係有人會出黎阻住
 
兩個咀愈來愈近，差唔到掂到之時，有一本書擋左係佢地面前




 
佢地兩個人同時打開眼，苗學嬛見到面前嘅野，不禁身體震起上黎
 
「阿….阿哥…..」
 
冇錯，阻住佢地兩個嘅人，正係苗學翹，仲有佢身邊嘅梁小祺