係同屋室友?定係同居密友?: (S4)47. 打算改變

洗衣機中傳出完成洗衫程序嘅音樂，學翹依舊去打開洗衣機門，將佢同小祺兩個人嘅衫拎出黎晾
 
而小祺就係廳，將收落黎嘅衫摺好放好，兩個人非常之有默契
 
小祺望住學翹，佢好慶幸打風果時肯跟學翹黎暫住，如果唔係果一星期，佢地兩個關係都唔會升溫、唔會變到咁熟絡
 
而自己都唔會鍾意左人
 
學翹晾好衫後坐低係梳化上，小祺亦坐係佢身邊
 




「你擔心個妹呀?」小祺好快睇穿學翹(自以為)
 
「傻啦，我係擔心個男仔咋」
 
小祺聽到學翹咁講法，顯得有點不知所措，點會有人唔係擔心自己妹妹?
 
「點解你唔係擔心個妹先嘅?」
 
「佢綽號新加坡第一猛獸，有咩好擔心，我係怕個妹會蝦人地者」
 




「你放心啦，阿妹唔會嘅」
 
「係就好囉」學翹起身行去書房，再拎data出黎睇
 
「老細想點?繼續渣乾你地?」其實小祺一早就知道答案，老細想將所有dirty job duties都推哂俾學翹佢地，呢樣野一直令佢地樓下呢個subunit非常不滿
 
人又唔加，工作量不停加，反觀小祺果到，要人有人，要helper有helper，所以最近即使部門有飯食，學翹都已經耍手擰頭唔再出席，以作無聲抗議
 
而且小祺仲聽到上司之間說話，認為應該再加重樓下工作量，因為佢地工作效率好高，仍然有再進步空間
 




小祺知道因為學翹嘅部門並唔係總部嘅親生仔，所以有好多同事都睇佢地唔起，更甚者有同事根本唔知道呢個subunit嘅存在，亦唔知道佢地樓下嘅師傅同埋TO們嘅能力遠比佢地樓上齋坐齋talking嘅同事高得多
 
基本上，同小祺學翹同Grade嘅同事，甚至於其他部門同事都知道，學翹佢地為各部門幫左好多手，奈何老鈿們總係唔滿意
 
每次有升職機會，老細寧願請外人，仲要係幫唔到手嘅外人，都唔俾機會樓下同事，所以先令樓下非常心淡
 
但小祺望住學翹時，佢又冇表現出大不滿，所以小祺都打算問一問佢意見
 
「阿翹呀….其實呢……」小祺欲言又止
 
已經一早摸清自己女朋友心意嘅學翹都知道小祺想問d咩
 
「工作量增唔增加，升唔升職我都冇所謂。只不過我地樓下係覺得點解咩都要我地食呢?明明有時出意外唔關我地事，樓上就第一時間落黎問責」
 
「我都明嘅…..」




 
「樓上果d以為自己係經理級就真係咩都識嘛，佢地都忘記左我都係Ph.D，實戰經驗比佢地多更多」
 
小祺聽到學翹咁講，係百分百同意，佢自己second落去嘅日子，自己都有眼睇
 
好多時唔係樓下同事盡心盡力咁做，邊可能會令學校運作咁順暢呢?
 
小祺係學翹身後攪一攪佢「不如我申請調落黎幫你地手丫，反正你地仲欠一個文員」
 
聽到小祺想調落黎，佢立即耍手擰頭
 
「千祈唔好，妳落到黎會好辛苦，妳而家係上邊咪幾好，而且我地呢到好多都係體力勞動，妳一個女仔唔太方便」
 
「但係我都想陪下你丫嘛」
 




「放工返到黎咪有得陪囉」
 
小祺聽到學翹咁講，都覺得有佢嘅道理
 
而學翹就覺得「嘩，妳坐埋落黎，我咪連少少私人空間都冇?我先冇咁ON9呀」