係同屋室友?定係同居密友?: (S4)52. 痛心

一提到自己奶奶，連麗琴面有難色
 
「細嬸，上星期新聞都播哂出黎，我地屋企會俾市建局收樓重建。如果我冇估錯，嫲嫲應該係想立即要返層樓再轉名俾細佬係唔係?」
 
「真不愧係小柔，我諗咩佢都清楚知道」連麗琴心中暗自講道
 
「既然小柔妳都知道，我都唔再講，而家妳嫲嫲一定會想盡方法拎錢」
 
「細嬸妳係怕嫲嫲又會對小祺不利?」
 




連麗琴點頭稱是
 
「細嬸妳真係唔洗擔心小祺，佢男朋友一直非常保護佢，而且屋企背後仲有大量人力物力，以嫲嫲得把聲嘅性格，佢真係冇咩作為」
 
「最好係咁啦，我最怕妳嫲嫲亂咁黎」
 
其時，連麗琴嘅藥黎到，梁小柔循例上睇 一睇
 
「降血壓、抗敏感、擴氣管噴劑…D藥齊哂架啦細嬸，記得準時食藥呀」
 




「知啦，唔該哂妳小柔」
 
連麗琴係袋中拎出兩封利是，遞俾小柔
 
「呢兩封係我同細叔俾瑤瑤嘅生日利是，要佢乖乖地聽教聽話」
 
「多謝哂細嬸」
 
「佢差唔多三歲，就快返幼稚園啦?」
 




梁小柔有時都俾個女激親「佢返緊N班….不過成日係學校蝦其他同學，又有時瀨下尿，又牙簽咀利」
 
「個女似妳，小朋友要慢慢教慢慢氹」
 
「知道啦細嬸」
 
「小祺果，妳幫我同佢講啦，叫佢自己留意下，好好保護自己」
 
連麗琴講完，正想離開之際，梁小柔叫停左佢「細嬸」
 
「咩事?」
 
梁小柔低頭諗一諗「妳想唔想見下小祺?」
 
連麗琴聽到梁小柔咁講，心中都爭扎左一下，不過佢都係怕小祺唔肯原諒佢自己，始終自己都係幫兇之一




 
「唔好啦小柔，而家小祺生活得咁開心，我唔想….突然間出現打擾到佢生活」
 
講呢番話時，連麗琴個樣係一臉後悔，梁小柔見到之後，再對連麗琴講
 
「我將妳電話…不過小祺都應該有，我同佢講一講，妳問過佢近況」
 
「嗯，唔該哂妳啦，時間唔早，我要返去啦」
 
「路上小心呀細嬸」

連麗琴上小巴後，望住窗外街景，回想小祺由出世，到一步步長大嘅日子，以前不論屋企對佢點差都好，小祺面上總係掛住笑容，從小到大都生生性性嘅佢，同細佬相比，完全係兩個人，不論係學業同行為上，其他人都係對小祺有讚冇彈
 
聽到梁小柔講，個女而家同男同事拍緊拖，而且仲要同居
 




「個女終於大個，要拍拖啦….」連麗琴心中暗道
 
佢打開銀包，佢仍然保存一張全家幅，而銀包中，仲有一張佢抱住小祺，同埋小祺幼稚園時嘅相
 
另外仲有小祺幼稚園時嘅母親節手工，勞作上，當年小祺用細細嘅小手，好努力咁寫字上手工上送俾連麗琴
 
「媽媽，我愛妳」
 
每次連麗琴見到呢份手工，佢都會忍唔住喊出黎
 
「街口有落唔該!!!」
 
係今日，佢專登落早一個站，行去小祺以前就讀果間幼稚園望一望
 
小祺年幼時嘅身影不斷出現係連麗琴腦海中，佢非常怪責自己，個女咁可愛，當年為左自己，甘心做幫兇




 
其實單親家庭，自己都可以養大個女，但係就係自己嘅自私，而令到個女受到不必要嘅傷害，令到佢喪失左一個快樂嘅童年
 
要佢一早離開家庭，自己生活

小祺小學畢業時，連麗琴身為媽媽，唔可以親身參加畢業典禮、小祺中學畢業時，大學畢業時，甚至碩士畢業時，每一次佢都只可以係遠遠偷望小祺
 
佢地連一張畢業合照都冇

 
當刻，佢好想立即打俾小祺，好想立即同小祺會面，好想親口同小祺講一句
 
對唔住