係同屋室友?定係同居密友?: (S4)53. 獨自出發

「喂…喂?」
 
電話中又一次冇回應，已經係今個星期內第三次收到呢種電話
 
梁小祺放低電話，都係估到有人打錯電話，或者係D無聊電話。始終所有電話資料都會有機會俾人拎到
 
「呼~」佢嘆一嘆氣後就繼續拎起已經洗好嘅衫係客廳到，一件件咁掛係焗衫神器之中
 
「回南天嘅春天真係好麻煩」小祺自言自語咁講
 




係四季中，小祺同學翹一樣，最唔鍾意春天。回南天果種又焗又濕、乍暖還寒，今日熱聽日凍，搞到人唔知點著衫嘅日子真係令人好討厭
 
特別係學翹所住嘅宿舍，春天果時，屋企要開三部抽濕機先會乾爽
 
學翹遞一份佢係廚房切好嘅蘋果去小祺咀邊，「又係無聲電話?」
 
「係呀，我打返去，又冇人聽，真係奇怪」小祺唔為意咁繼續係到晾衫
 
「會唔會係妳屋企人?佢地想搵下妳?」
 




「點會呢?得家姐同大伯同姑媽佢地有我電話，我父母絕對搵唔到我」小祺邊晾衫邊講
 
學翹望住小祺，佢心中覺得小祺屋企俾佢嘅傷害真係好大
 
「咁遲D我地結婚嘅話，妳都唔打算搵屋企人黎?要證婚人喎」
 
「果時可以搵大伯佢地囉，佢都係我屋企人嘛…喂….等陣先，做咩無啦啦話結婚呀?我幾時話嫁俾你呀?」小祺笑住咁用件衫扔去學翹到
 
佢口中說不，但係自己又笑得好甜，話佢唔想嫁俾學翹，就係呃人
 




「咁佢地始終係妳親生父母…」
 
「唔….到果日再算啦，而家點講都好，佢地搵我都只係為左錢錢錢同埋錢」
 
說罷，小祺拎住個吉盤返去洗衣機騎樓
 
其時，學翹拎起小祺電話，睇一睇個來電後，抄低落黎
 
「喂!!!晾哂衫啦!!!仲唔快D刷牙?」
 
第二日，苗學翹將個電話號碼交左俾游律師，拜託佢搵一搵呢個電話嘅來歷
 
因為呢個號碼並唔係由太空咭打出
 
「叮咚」一聲，苗學翹電話已經收到哂所有資料，不愧係游律師，姐夫打贏咁多官司，都係因為有呢個咁好嘅拍檔係到幫佢手




 
苗學翹睇住電話中嘅資料，手指不停敲下張檯，呢個係佢用腦諗野係動作
 
「喂」
 
小祺突然係佢後邊出現
 
「唔？咩事呀?」「冇呀，見你諗野諗到咁入神，咪入黎睇下你做咩囉」
 
苗學翹攪住小祺「諗緊妳呀」
 
「咸濕鬼」小祺笑住講
 
「我星期六約左人食飯呀，你果晚自己搞掂喎」
 




「全日都出去呀?」 「係呀」
 
「咁我自己搵節目囉」
 
「你有咩節目先?」
 
「睇下係幾多級啦」
 
「你扮咩丫，最多咪又係屋企瞓覺」
 
的確，苗學翹係一個非常鍾意瞓覺嘅人，佢每日食完晏之後，總要係自已個位到補眠
 
星期六，苗學翹車住梁小祺去到尖沙咀附近
 
「妳差唔多走果陣記住打俾我喎」




 
「知啦，你小心d渣車呀」
 
苗學翹目送小祺之後，開車經由紅隧過海，直上東區走廊，去到太古城附近CUT線離開，轉入西灣河一帶
 
佢係小祺以前住嘅附近泊好架車，向住間超市行過去
 
佢坐係超市對面一間café，叫左杯咖啡之後，就望住超市
 
望住某個人嘅一舉一動