係同屋室友?定係同居密友?: (S4)54. 母親的對話

終於到左下晝三點，連麗琴換好衫就離開工作嘅超市，準備去買餸，當佢踏出超市嘅時候，佢電話響起
 
一睇，係一個不知名號碼
 
「喂，邊位?」
 
電話傳出左一個男子嘅聲音
 
「連女士，妳同我係唔認識」
 




「我唔識你，但係你點會有我電話?你係唔係打黎呃人?我話你知我唔會上當架!?」
 
「或者我調轉咁講，妳先會明」
 
「我唔會咁蠢信你呢D騙徒」
 
苗學翹心諗「我唔講出D野，佢都係唔會相信」
 
「或者咁講丫，妳做咩一星期之內打幾次電話俾自己個女而唔出聲?」
 




連麗琴聽到對方咁講後，靜靜咁企左係到
 
苗學翹再對住電話講「我而家係妳返工附近果間starbucks，如果妳想見下我嘅話，妳可以黎，我會等妳」
 
說罷，苗學翹就收線，自己一個人坐低等連麗琴黎
 
學翹知道，小祺媽媽一定會黎見佢
 
不出十分鐘後，連麗琴就去到starbucks，而且，佢仲識立即行到學翹張檯到，坐係佢對面
 




好明顯，連麗琴係認得苗學翹
 
連麗琴同小祺非常似樣，可能佢後生果時，同小祺係一模一樣
 
佢坐低後，四處張望，心想可以見下小祺，了解下佢近況
 
「梁太….呀…應該係auntie，小祺今日約左朋友去食飯，佢唔會出現，佢都唔知我黎搵妳」
 
連麗琴望住苗學翹，正想開口問野，但學翹已經早佢一步介紹自己
 
「Auntie我叫苗學翹，妳可以叫我阿翹就得，我係小祺同事，亦係佢同居男朋友」
 
連麗琴見苗學翹有禮貌，又好斯文，加上小柔對學翹讚口不絕，頓時放心小祺同佢同居
 
「你的確好似小柔所形容咁，斯文有禮貌，而且對人非常好，怪不得瑤瑤會鍾意你」




 
「伯有妳太過獎」
 
「你今日….做咩黎搵我??」
 
苗學翹望一望連麗琴，反問佢「我想知道，點解妳要打俾小祺，但係又唔出聲?」
 
連麗琴低頭不語一陣，再次慢慢開口「你覺得…我仲有資格同小祺傾計或者見佢?你應該知道，佢以前嘅事」
 
苗學翹望一望窗邊「好難會唔知道，而家小祺身上…..仲有當年嘅傷痕係到，d傷痕，會跟佢一世」
 
「我只需要….遠遠望住佢，見佢開心咁笑就可以」
 
「auntie，小祺小學中學畢業果時，妳都有去睇佢?」
 




「個女嘅畢業典禮，我全部都有去，包括佢大學同頊士畢業。所以我先認得你，再加上…..」
 
「再加上電視爭樓果段八掛新聞」
 
連麗琴微微苦笑「有邊個媽媽唔想睇住自己個女畢業?，當日我見到你，就覺得你會對小祺好好，所以我好放心將個女交俾你照顧，可能佢會有d脾氣，希望你可以接受佢」
 
「Auntie妳放心，我揀得小祺，我自然會好好對佢」
 
「係呢…..你地一齊住幾耐?」
 
「我地呀…唔…..第一次佢去我宿舍到留宿，係同事退休晚餐。果晚小祺飲左幾杯酒就瞓左，於是我叫佢同學陪佢去我宿舍到過一晚，第二日我就車佢返黎睇醫生。第二次就係果日太多野做，大約11點幾先完成哂D野，於是我叫佢去我到，果晚我瞓佢瞓房」
 
學翹飲一啖水
 
「之後10號風球果次，周圍塞車水浸，佢又上唔到校巴小巴，於是就去左我宿舍暫住一星期」




 
「之後你地就拍拖?」
 
「唔係啦，最後果次，Auntie妳仲記唔記得幾時見小祺?」
 
連麗琴聽到學翹咁問，又再諗起上一次嘅事