係同屋室友?定係同居密友?: (S4)55. 媽媽的坦白

回想起果一晚，連麗琴都靜默片刻
 
「唉…我記得，果晚佢係粥舖出黎之後，俾我地見到。佢爸爸就咁打咗佢幾巴，問佢拎錢」
 
「妳知道，佢自己儲落嘅錢，要交學費、還學債，仲要交租?」
 
連麗琴冇諗過原來小祺洗費咁多「乜佢唔係只要交租咩?」
 
學翹嘆一口氣「果陣佢仲孭住學士學位同碩士學位嘅學債，仲有佢進修緊嘅學債。當時大約……200000萬左右」
 




連麗琴萬萬都估唔到會係咁
 
「咁….小祺佢點呀….」
 
「果晚，佢漏左部電腦係學校，佢同學托我拎俾佢，於是我就渣車過黎搵佢。我一上到佢間劏房，佢一開門就攬住我喊，而地上仲有把染有血跡嘅刀，小祺手上有傷口，果晚….佢試圖自殺」
 
連麗琴聽到個女想自殺，立即緊張起上黎
 
「咁佢…」
 




苗學翹安撫連麗琴「佢只係受左少少傷，當晚我幫佢執好哂所有行李，漏夜退租後，佢搬去宿舍同我住，因為要避開妳地一家」
 
連麗琴估唔到，原來小祺仍然孭住咁多債務，佢嘅行為真係枉為人母
 
「咁佢d錢冇哂….咁樣….」
 
「放心啦auntie，佢所有學債我已經幫佢還左。學校幫佢出左讀緊個專業文憑嘅錢。佢而家自己開始儲到錢」
 
「真係好多謝你地…..咁多人幫我照顧個女….」說話間麗琴有嗚咽聲
 




苗學翹望住小祺媽咪，睇得出佢心中其實好錫小祺，好想補償返小祺失去嘅童年
 
天下間所有父母都係緊張同埋疼愛自己嘅小朋友，連麗琴都唔例外
 
佢打從心底係好錫小祺
 
但係唔知點解，佢要成為虐待小祺嘅幫兇
 
於是，苗學翹下決心問落去
 
「auntie，我睇得出妳係打從心底係好錫小祺，妳比起我更加關心佢愛佢錫佢。」
 
連麗琴點一點頭
 
「但係點解妳地要咁對佢?妳身為佢媽媽，應該係保護佢照顧佢，而唔係做幫兇去虐打佢。係妳唔幫佢果一刻，妳令自己個女非常心寒，究竟發生咩事?要令妳咁做?可唔可以講我知?」




 
連麗琴低頭諗一諗，佢再拎出小祺K1嘅小手工望一望
 
學翹望到果份小手工
 
「係小祺整俾妳嘅?」
 
連麗琴點一點頭「係佢K1時係學校整嘅勞作」佢遞俾學翹睇
 
學翹拎上手就見到小祺細個時好努力寫嘅字「媽媽我愛妳」
 
其實小祺都好錫好愛佢媽媽
 
「既然妳知道小祺咁錫妳，妳懷胎十月咁辛苦生佢出黎，點解妳仲要做幫兇?」
 




連麗琴一臉無奈「你知道，我地係咩人嘛?」
 
「我同妳一樣係客家人」(客家話)
 
「講得幾好丫」(客家話)
 
「auntie妳過獎啦」
 
「所以你一定知道我地屋企係重男輕女」
 
「但係都唔需要咁對小祺嘛」
 
「唉…..」連麗琴捉實隻手
 
「以下我同你講嘅野，我唔希望俾小祺知道。因為你好大機會娶我個女，所以有d野我要俾你知道先，可唔可以?」




 
「冇問題」
 
連麗琴開始講出黎，估唔到第一句就令苗學翹呆左係到
 
真係好睇過電視劇，果刻佢好想將呢件事包成一套劇集再賣俾大台