𣎴能愛上的星級女神: 星夜（上）

「希望嚟緊出街收視節節上升！」「希望第二季都順順利利！」「長做長有！」「好！！…」…

入夜開始著涼，趁他們在分蛋糕，我拿出外套，偷偷披在若嵐肩上，她頓時耳朵也紅了。若嵐留意到我的舉動，只是和我互相點頭微笑。主角們都坐在正中間，若嵐正與導演監製聊天，Candice見我坐在一旁，把我拉到她和若嵐中間。
「你件蛋糕呢？」Candice問我。
「唔洗啦，我冇你同若嵐咁鍾意食cheesecake。」
「你又知我鍾意cheesecake ？」我笑了笑，沒回答她。她多拿了一件蛋糕，切了一囗遞給我：「呢隻唔甜又唔膩，好好味㗎，你試咗先啦…」
「真唔真啊？」我半信半疑，接過她的叉吃了口：「都係唔好搞我…」我搖搖頭，把叉還給她。
「唔識食…」她暗暗吐嘈我，接回叉便直吃了。
「你頭先唔係食咗件啦咩？因住食肥你！」我回懟她，她怒得放低蛋糕睨住我：「好啦喎你…」我邊偷笑，邊拿走她的蛋糕重新吃著。她見我吃了，露出滿意的表情。





大家飯後各自喝酒各自聊天，我和若嵐、Candice、Paco和Mark哥玩著撲克，輸的一方需要喝酒。若嵐已經輸了三杯啤酒，「又係你輸，點呀嵐姐？你呃酒飲喎！」Mark哥取笑她。
「你飲咗好多，我幫你飲啦。」我按住若嵐的手，接過酒。
「唔啱規矩喎瑜哥！你要飲就要飲兩杯！」Mark哥興奮地斟多一杯給我。
「Mark哥你咁架…」有點醉意的若嵐真的很可愛，「唔緊要，開心下姐～」我一口氣把兩杯酒喝完。
「瑜哥果然係瑜哥！我哋繼續！」…玩了一小時左右，大家也喝了不少，我也有點兒醺醉。此時監製走了過來：「你哋咁快飲到醉晒嘅？諗住講個好消息比你哋知。」若嵐已經伏在桌上，Mark哥和Candice耳朵也泛紅，應該只有Paco喝得比較少。「向瑾瑜，你最近就上曬封面。總經理kevin同我講，有三個廣告商想搵你拍電視廣告，佢想約你下個禮拜一去佢Office傾。你到時同若嵐同詩姐去，佢哋應該會幫到你。」
「哇！恭喜你喎瑜哥！」Mark哥走過來大力拍我肩，醉着對我笑，很興奮地說：「我哋慶祝瑜哥出道，飲杯！」Paco和Candice也舉杯恭喜我，伏在桌上的若嵐也帶着醉眼望向我，微笑著說：「恭喜你呀瑾瑜…」「若嵐，你醉啦，我叫詩姐同你返房先。」詩姐過了來，和我一起幫忙把她先拱回房間。

我坐在若嵐床邊，為她蓋好被她拉低了的被子，有點惋惜她居然這麼快便醉睡了，還打算與她看看外面的星星。

不久後他們各自回營休息、其他人也各自回家，我沒有回去，反而走到營前的躺椅上，邊抽著Mark哥的電子果煙邊躺下觀星。





「自己一個睇星星咁慘啊？」Candice走了過來我身邊，躺在我身邊的椅上，相信她和我一樣，酒氣散了不少。「你咁夜都唔返去？」她喝了些檸檬水，問我。
「呢度睇星星好靚架！本來諗住同若嵐睇一陣星星我先返去，點知佢咁快就醉咗…」我吸了口煙，再慢慢吐出來。
「你個人有咁浪漫嘅咩？」她裝作一副不相信的語氣，望向我。