情人節那天，我在衣櫃中找到我生命中的天使: 第十一章：我中意咩人關你呢個天使咩事呀？

第十一章：我中意咩人關你呢個天使咩事呀？

 
  「唔好呀…… 咦，點解我一啲事都冇既？唔係要打我咩？」
 
  我抬起個頭望一望，原來羨婷用佢隻左手擋住咗佢地既拳頭。呢個時候我真係O曬嘴，仲等我一直以為呢個淨係識挨喺我膀頭訓既天使係一個弱質女流，但點知原來係一個隱世春麗，就算跌低左都可以擋住人地既攻擊。如果冇佢喺身邊既話一定比佢地打死都似。
 
  之後羨婷將我推開，輕輕一個轉身就避開曬佢地既連續攻擊，再等佢地露出左破綻之後嚟一招百裂腳，不過呢招百裂腳認真利害，每一下都只喺踢到佢地面前就收腳，完全冇踢中佢地，但係咁已經足以嚇到佢地跌落地下，最後佢地好似見勢色唔對路就急急腳道歉之後走左。唉，呢鋪真係風水輪流轉囉。
 
  啲呀叔嚇到走左之後，羨婷捉住左我隻手，然後好驚青咁望住我。
 
  「主…主人，你冇事呀嘛？有冇跌損邊到呀？」


 
  「冇…冇事。」
 
  「呼，咁我都放心啲……」
 
  「咁你點呀？頭先你幫我擋左嗰一拳，隻手應該好痛架喎，你有冇事呀？」
 
  呢個時候我見到羨婷好刻意咁收埋佢頭先幫我擋住既左手，對眼不停咁望住個地下，唔敢好似之前咁正視我對眼。
 
  之後我諗都唔諗就捉住佢隻左手拎過嚟我身邊，我揭開佢個衫袖一睇，點知發現佢隻手紅曬不特止仲要係咁震，好明顯剛才嗰下攻擊真係好重手，痛到佢自己都唔係好頂得順。羨婷見我望到隻手紅曬之後就立即拉番埋個衫袖，好用力咁縮返埋隻手，但係可能因為我捉住左佢擋拳頭個位，佢痛得滯縮到一半就停左。


 
  「冇事？紅到咁又點會叫冇事呀？」
 
  「咁……」
 
  「仲『咁』咩呀，我宜家就去便利店到買啲需要既藥物，你同我乖乖地喺到等我，知唔知呀！」
 
  老實講，今次係我全日見到佢咁耐以嚟最大聲咁同佢講野。不過其實我都唔知點解要咁做，因為就算我唔用咁既語氣佢都一定會聽我講留喺呢到。
 
  之後我用左自己史無前例咁快既速度跑左去便利店到，但係點知原來去到之後先發現我根本唔知道要買啲乜野先至啱，所以最後都係求其買左啲藥膏咁樣。


 
  我買完要用既野之後話咁快就返翻去海邊到揾左張長凳坐低幫羨婷佢搽藥膏。海邊其實都有其他情侶坐左喺到，之不過全部情侶唔係喺到Kiss 就喺到親熱，再唔係就喺到……唉，好心你地喺出面就控制下自己既聲量啦。其實某程度我同羨婷都算係異類，當所有情侶都喺到做緊啲似係情侶做既野既時候，我就居然喺到幫人搽藥膏，真係唔知講好。
 
  搽完藥膏之後，我同羨婷都冇話諗之後要行去邊，只係靜靜咁坐喺到傾下計。我地乜都傾一餐，一時講下天堂有咩特別野，一時又講下凡間最近興啲乜咁，總之我地就傾得好開心啦，但係直至佢唔小心問左呢個問題……
 
  「話時話，其實主人你有冇中意既人架？」
 
  「中意既人？你問嚟做咩呀？」
 
  「冇，雖然我冇幾耐就要返翻上天堂到，但係主人你到宜家為止都仲係我主人，就算得少少時間我都想了解主人啲。」
 
  「我…我既野關你鬼事呀，你只不過係一個天使喳！知我咁多野想點呀？我係有中意既人又點呀？你係唔係想笑我正一毒男唔夠膽去追呀！」
 
  「唔係呀，我都冇咁既意思……」
 


  「夠啦你！你接近我都係為左啲天使點數啫！賺完你要既天使點數就好同我快啲走呀！」
 
  到底點解我會無啦啦痴左線咁講野架？不過我諗大慨都係因為平時比班朋友笑得多我冇膽去識女朋友，所以每次一比人問到我有冇中意既人嗰時我就會立即成個人變得好激動，乜野都講得出，總之變到好似第二個人咁。
 
  「太…太過分啦，主人居然咁講，之不過既然做得主人既天使，咁我……」
 
  羨婷佢愈講愈細聲，直到最後我只係見到佢個口開下合下，完全聽唔到佢想講乜。
 
  其實我都知自己頭先係過分左，所以我本來以為佢咁講完之後會狠狠咁打我一巴，但係真係估唔到羨婷佢冇咁做到，反而喺錫左我一啖之後喊住咁跑走左，而我就呆左咁繼續坐喺到，除左後悔自己頭先激動得滯之外就咩都做唔到。
 
  喺羨婷走左冇幾耐之後我個電話就響起左，邊個咁唔識做宜家打嚟呀？等我睇下個來電顯示先吓……係我女神阿怡？！點解我阿怡無啦啦喺情人節晚打比我架？