不能愛上的星級女神2: 獨寵妳一人

「咯咯咯…」我差不多睡著，忽然有人敲我車窗。我正嚇得準備開車走人，卻望見窗外的不是警員或保安，而是朱浩婷。我拉低車窗，她偷偷笑著說：「先生，呢度唔停得車架喎！熄匙、車牌、身份證！」她對我攤開手掌。
「比你唔係唔得，我而家去泊好車先。」她開門坐到副駕，爽快地戴好安全帶：「咁行啦！」我笑了笑便開車。

我和她並肩走回她家，我拿過她的手袋放自己肩上提。「Sorry啊，我頭先手機冇電，收工同唔到你講。」她溫柔地說。
「咁論盡㗎你？冇尿袋咩？May姐做咩唔幫你叉電啊？」
「你唔好話May姐啦，頭先做嘢做到一半，佢比電影公司叫咗去處理我份新電影嘅合約，所以咪冇得差電囉…」她解釋。
「你乜都擺晒喺May姐個袋度梗係啦！你d手袋又放唔到…」我把我那個很薄的快充遞給她：「我比咗我果個你，我呢個好薄架咋。你自己袋住一個好冇？」
她挽著我手臂，一臉甜絲絲烘近我耳邊：「你送比我我驚我唔捨得用喎～」
「懶得拎就話懶啦朱浩婷！」
「咩喎…」她搶過充電放進手袋：「我男朋友比我架！送咗比我就係我架啦！」我心中高興，摸摸她的頭：「傻瓜～點呀你肚唔肚餓啊？」




「你煮野我食呀？」
「煮比你啊！你屋企有咩先？」我點點頭。
「你煮你自己俾我食～」
「咁恐怖嘅你！」她吐吐舌頭，牽著我手進屋。

「意粉、白汁、parma ham…」我把食材拿出來，拉高手袖便開始煮飯。她換好衣服放回手袋，走到我身後擁著我撒嬌：「瑾瑜，我覺得好幸福啊～」
「點呀Candice姐？今日拍戲攰唔攰啊？」
「喺廠拍輕鬆過外景啦，不過今日場戲有啲打鬥，所以而家少少攰。」她靠在我身上，再捏我臉頰：「我知今日係你第一套電視劇首播，仲要第一套就係男主角，巴閉啦你～」
「不過你都唔係度…」
「而家陪你再睇返第一集好唔好啊？」




「又睇？而且你又未出場，要你睇住我同若嵐攬攬錫錫，我會怕羞㗎喎。」我微微回首與她靠得很近，二人的心跳再次交織出急速的二重奏。她吻上來，輕輕與我吻了數回後，我還是要優先處理她的夜宵。

她坐在廚房吧桌吃著，我貼近她身邊坐著，安靜、近距離地望著她吃意粉。
「啊？」她捲起一圈意粉放在我嘴前，我一口吃下去，輕輕摸著她臉上的粉底，含著笑說：「你唔化仲靚啦～」
「我邊有你咁麗質啊？你如果留長頭髮，一定搶曬我同萬若嵐風頭！」她打量了我一番，意味深長地說。
「喂！咩料啊你朱浩婷！我冇波架啦！」我有點自嘲地笑。
「我…幫你加兩個橙…喺度。」她也忍不住取笑我，在我胸前比劃。
「你d橙…留返比張星凡啦！」我們相望捧腹大笑，我又想起有什麼想告訴她：「係喎，Mark哥幫我開咗個YouTube Channel，而家暫時淨係放咗啲幕後花絮或者我地幾個私底下搞笑玩嘅片。我同程心plan咗黎緊想加兩個系列，第一個就係我用娛樂少少嘅方式去表達下Marketing d好玩野，一嚟我又可以掂返自己嘅興趣同專業，二嚟又有啲gimmick。另外一個系列可能就我搵下唔同artist或者名人之類合作拍下d吃喝玩樂、煮飯仔之類，等d八卦觀眾睇多啲我哋之間嘅互動。有R到產品sponsor當然最好，如果唔係我當玩下新野。拍片影廣告相我以前marketing都做唔少，不過而家揸住product果個人變咗做我自己，真係有啲壓力！」
「我哋而家仲後生，試多啲都好呀。」她邊吃邊回應。
「咁…你會唔會拍拖都仲想試多啲先架？」我有些醋意。




「拍拖我淨係想搵到個我愛嘅、佢又愛我嘅人，我反而冇乜興趣好似張星凡咁個個都想試吓。我而家已經搵到啦！我淨係想可以一世痴住你、同你好sweet好sweet，有你一個就夠～」她雙手繞住我頸，情深又可愛地對着我撒嬌。
「我都係～」我摟緊她腰，吻走她嘴角的白汁，含著笑對望。