不能愛上的星級女神2: 各施其職

這段時間若嵐、Candice和我三人一直也是流量和關鍵字第一位，所以我們也知道其他明星也開始暗施手段重新提高自己名字的曝光率。特別是女明星，廣告都被若嵐和Candice包攬了不少，她們自然不想「坐冷板凳」。

近乎每次離開廠或電視城，甚至是完成casting新戲之後，也會有些同場女星刻意來找我搭訕。其中一個也是一線的女星Hilary，身材比Candice更爆，工作最近多了與我的身體接觸，而她亦很大可能是Gary找我casting的新戲的女一。所以面對她有意無意的接觸和聊天，我亦只能盡量避免和小心，始終不容易分辨她是為了工作還是也想傳個假緋聞增加曝光率。但今天還是避免不了，下班碰上與她同路。

「瑜哥，Gary頭先同我講，覺得我地演男女主角嘅火花應該好特別。希望角色會快啲定到，期待同你合作！」她面向我時胸部又擦到我手臂，不是第一次，但她似乎都不太在意，令我每次也很尷尬。雖然說她本來就出名36E女優身材，但也不能老是這樣碰觸男同事吧？「嗯。」我心中尷尬地點頭。如果拍戲時也因為她胸太大而經常碰到我，那我真的要及早跟Candice報備。
「你而家有咩做？係咪自己一個食飯啊？」Hilary問我。我正打算婉轉地拒絕，忽然閃過一下閃光燈，我心裡知道又是她。
「Sorry啊Hilary你等我一陣。」我朝着閃光燈的方向，找到一直跟在我身後的那位記者小妹妹，把她一手抓緊拉到Hilary面前，刻意對Hilary說：「Sorry啊Hilary，我女朋友佢有少少問題，除咗會偷拍跟蹤，之前試過恐嚇我身邊啲女人。希望佢冇騷擾到你。」那位記者小妹妹瞪大雙眼望向我，彷彿有點震怒想大罵我，還想拿出她的記者證。我看見她的衝動對她奸笑，她眉頭皺起，還是沒有把記者證拿出。
「唔緊要。咁一係我走先，我地下次見…」Hilary有點猶豫地打量著她，帶點風度地揚長離去。

那位記者小妹妹掙脫開我握緊她的手，指著我生氣地罵：「有冇搞錯啊痴線架你借我過橋！邊個係你女朋友啊？我唔係萬若嵐都唔係朱浩婷！」




「咁你都跟咗我成個禮拜啦？就算唔借你過橋，你明知我都係會推咗佢哋，你唔會睇到你想要嘅嘢㗎啦！」我好言相勸。
「我唔信有貓係唔食魚！我一定會搵到你把柄！」「你有冇諗過其實我唔係貓呢？」
「你呢啲一黎就靠萬若嵐，之後仲搵我寫你同朱浩婷，話唔係博出位我都唔會信！有女埋身你會咁有風度？」她蓋好相機鏡頭，邊吐嘈。
「你中意啦～」我淡淡地取笑她，心中亦因為擺脫了Hilary而感到輕鬆，手插褲袋打算走開，卻看到貓仔在不遠處目擊著我們。

我走向貓仔，記者小妺妹也跟住我。
「喂！你邊間報館㗎？你信唔信我報警投訴你騷擾我偶像？」貓仔一見到她便像炸了毛的貓一樣。
「好心你睇清楚你偶像係啲咩男人啦！出道到而家都係靠女人上位，會好得去邊？…」她拓一拓圓形的鏡框，盯了我一眼。
「你d記者寫嘢淨係識炒作博流量、以偏概全！你跟咗咁耐，有咩證據啊？」貓仔挺起胸膛壓向她，語氣也很堅硬。
「我有佢同萬若嵐、朱浩婷嘅相！」




「廢話！咁即係冇證據啦？」
「你同你偶像都一擔擔嘅…」
「而家邊個一擔擔啊？」…

「停！！！！！」我用盡力氣拉長大聲喊停，－手拍一個人的肩：「鬧咗咁耐攰唔攰啊？食唔食甜品呀？我請啦。」「你要影你就隨便影啦，我唔會再阻止你。」我對記者小妹妹說，又語氣溫柔地對貓仔講：「你同一班團員嘅關心我知道啦，多謝你～唔洗咁擔心我喎。」她們也靜了下來。
「真係請食甜品？」記者小妹妹淡淡又有點不相信地問，又補充：「成個幾禮拜食白果，食返你一筆、食窮你都好！」
「佢去我都去。」貓仔盯着記者小妹妹。
「咁行啦！」我笑了笑。