不能愛上的星級女神2: 不止過路人（上）

「瑜哥！」Mark哥、Paco和Terris在一家酒店海景酒吧坐著等我，李思晴真的就跟着我上來酒吧。不過她一直躲在我身後，似乎有些害羞。
「原來你都識怕羞？」我問，她望了我一眼：「咁呢啲係你同朋友私下嘅聚會，仲要全男班喎，點同？」
「你都知係我同朋友，咁你都好意思跟上嚟？」
「我都想做你朋友。」自從在Hilary身上學了看眼神，我仿佛也看上癮。而李思晴的眼神確實很誠懇，而且很堅定。

「做朋友嘅話，就唔好成日亂寫瑜哥喇小妹妹！」Mark哥走近為她拉椅請她坐下，她坐下來，Mark哥向她示好：「我地開咗Champagne、Brandy，叫咗幾款special cocktail，order咗啲芝士同parma ham拼盤，你睇吓啱唔啱？」
「我冇所謂啊，你地…唔洗理我架。」她放下手袋，他們三人望向她，又望向我。
「之前都冇見過你打扮得咁女仔，如果你想識下新朋友，Mark哥可以介紹喎～」我打破話匣子。
「下…我淨係想同你做朋友炸喎。」她望向我的感覺，居然和貓仔看著我的一樣。
「呃…其實呢，明星都係人嚟架姐～瑜哥都有啲私隱唔想人人知，你…明唔明呀？」Mark哥又開始發功。




「當然～」她望向我偷笑，我有點害怕，Paco亦和應：「我哋平時其實都成日一齊玩，都係玩你同朋友玩開嗰啲。所以呢…其實真係冇咩特別野。」
「特別啊！D人就係中意睇你地平時做咩～」他們似乎也快要被她氣死。食物和飲品也到了，Mark哥似乎又開始他的計劃。

「同你做朋友都得！咁，你係咪應該show啲誠意先？」他為她斟了半杯白蘭地。
「咁啃？」她看呆了，望向我求救。張星凡向我打眼色，「其實我第一次埋堆果陣做嘅嘢仲啃。」我告訴她。
「你講真架？」
「真啊。」
「咁好啦。」她一口氣乾掉半杯白蘭地，口鼻也皺起來，用手在臉旁上下煽動着。
「得唔得呀你？唔得唔好夾硬嚟喎。」我真心關心她。
「你睇死我？」她耳朵紅了，與我有點曖昧的距離對望。




「唔係啊…」
「咁我的確係中意寫衰你…」Mark哥為她斟了杯Champagn，她問也不問便喝了三分一杯，再對我說：「咁你想唔想知點解？」我看見她這個樣子，也不想再耍她。
「收到你嘅誠意啦。不如你走先啦？」Mark他們聽到我開始心軟，立刻睨向我。她搖搖頭，休息了－刻，把剩餘的酒也乾下，對我說：「其實我只係想…想你留意到我。」
「瑜哥！…」Mark哥坐不住，想開口，Paco按住他肩，搖搖頭。
「你咁大份，點會留意唔到啊？」我說。
「我話過，我會影到你冇女埋身…」她呷了口水，但似乎酒精也開始上腦，烘近我：「其實我只係……」她伏在我肩膀上醉倒。

Terris和Paco紳士地過來幫我扶起她到他們那邊的沙發靠著，Mark哥坐到我旁邊，把她寫的那篇報道展示給我，關心地問我：「點先？你諗住點同Candice解釋？借位？你咁怕個妹妹仔，唔會係仲有啲再爆啲嘅相喺佢手上面吖嘛？」
「你講中晒。但係我可以發誓，我淨係鍾意Candice 一個，同佢哋三個真係冇嘢、冇發生過d咩…」我緊張地澄清，Mark哥拍拍我肩打岔：「冇野喎，大家男人，有女埋身好正常。不過你個粉絲團長同埋呢個記者妹易搞，關語芯唔係咁簡單，我都未必夠佢玩。你搵佢對戲還對戲，小心啲佢啲手段。Candice而家喺屋企，我哋幫你睇住個記者，你快啲去搵佢去，佢好燥底啊而家。」
「咁唔該晒你地…」我沒有猶豫，站起來便離開。





我爭取時間飛車到Candice家，直接跑去大堂，腦海中一直預演Candice生氣又呷醋時，我該說些什麼解釋，讓她知道我心中只有她，腦中也只有她，無時無刻也只想和她一起。