《等那一天我們在操場上接吻》（2025新版）: 救贖
30 救贖
華爾滋與其他舞蹈最大的差別，是你的視點無法移動，只能盯在舞伴身上。
世界在轉動，而靜止的只有你眼中的對方。
「跳窗？」阿北說。
「依度三樓喎，係咪 you jump I jump 先。」許愛悠回答。
「上次林強男扮女裝，今次試下妳女扮男裝，我借套老西俾妳扮男人出去。」
「依個叫變裝，唔係叫易容喎，依度N咁多風紀望實，我換咩衫都俾人周到啦。」
阿北隨著許愛悠的腳步，許愛悠隨著阿北的腳步。一步又一步。
許愛悠的長裙染上由電子燭光與吊燈幻化而成的眩光，他與她在漩渦的中心漫舞。
「撕爛曬佢，然後塞係禮堂唔同角落？」
「做到嘅話我一個人做咗啦，啲假選票大大話話有十幾張，撕得嚟我俾地佢捉住咗囉。」
「咁……無辦法啦，學妳話齋，一人一半食咗佢？」
許愛悠美豔的面容縱聲大笑，說：「哈哈哈，如果食得切或者都okay嘅，但依家我諗風紀唔止係禮堂出面，禮堂入面都有唔少望緊我地，應該都係嚟唔切啦。」
阿北微笑說：「原來依家有風紀望緊我地？」
「梗係啦，風紀無樣睇嫁嘛，可能隔離個pair就係風紀嚟啦。」
「咁我地要跳好啲啦。」阿北挽緊許愛悠的腰。
「你都知呢～」許愛悠搭緊阿北的肩膀。
圓舞曲的旋律輕快寫意，音符像在河溪間奔流傾瀉。華爾滋自然難不到許愛悠，阿北是新手，也放心跟著許愛悠，與她踏著步伐，圍繞著舞池中心公轉。
「結果，」阿北說「到最後都係無辦法。」
「無嫁啦，」許愛悠嬌笑著「我連後台電箱都望過，已經俾尤天勇鎖咗，我想玩多次大停電都唔得，走唔到嚕。」
「咁結果會點？」
「我都真係唔知，」許愛悠呶了呶嘴「尤天勇嘅指控，係我意圖用假選票操作社團滿意度投票，社團滿意度投票亦可以話係會長選舉前期投票，如果訓導主任同校董會覺得我蓄意破壞會長選舉，都應該無好下場？你唔洗咁嘅表情喎，我收咗檔嘅，你唔係終於可以甩身啦咩，死仔。」
許愛悠說得輕描淡寫，阿北卻只是把她的腰挽得更緊：「但我無諗過……要咁樣結束。」
許愛悠幾乎要貼到阿北身上：「咁你想點結束呀？」
「或者……我係等緊有一日，妳終於承認『校規修訂』係唔可行，妳會同我講：『喂，我都係唔搞啦～咩愛與勇氣，由佢啦』，咁樣囉。」
阿北注視著許愛悠映著舞會燈光的燦爛雙眸，許愛悠卻勾起圓滿的笑容：「你覺得……我會有咁嘅一日咩？」
阿北回答說：「我覺得……妳一直都係等緊依一日。愛悠——話時話，我應該點叫妳？小悠？阿悠？愛悠？」
許愛悠咯咯鶯笑：「無所謂啦，你知我唔care依啲，你叫番我『許大小姐』都可以呀，我真係無所謂喎。我都打算以後永遠都叫你『阿北』或姐『死仔北』嫁啦～」
「妳明明一早就知我真名——」
「因為你個真名真係唔多好聽，啊哈哈哈哈哈哈哈哈哈哈！」
許愛悠昂頭大笑，作為前學生會秘書，她當然有處理過橋牌學會的文件，而得悉阿北的真名與生日。
這時候一曲既盡，華爾滋的音樂徐徐消逝。
「跳完啦喎。」阿北問道「都仲未諗到點算，咁點搞呀？」
舞台上的交響樂手稍為停歇，又開始奏起下一首樂曲。
輕盈清麗的鋼琴伴同著優美的小提琴，那是印象派風格的抒情曲。
「咁呀，跳多隻丫。」許愛悠回答。
「好呀。」
阿北雙手圈起許愛悠的腰肢，許愛悠也抱起阿北的肩頭。
█
19：58。
Mimi 獨自在女更衣室中換好了晚禮服，她選了一件珍珠色配亮片的皺褶長裙，配有輕盈上臂小寬袖。她知道自己平常的形象比較樸素，又總是陪著絕不會亂出風頭的尤天勇，她決定今天晚上要趁聖誕晚會嘗試一點突破。
反正許愛悠逃不出天羅地網，鄭雪蕾大有可能重新向尤天勇投誠。這一仗可說是學生會大獲全勝，作為尤天勇的身邊人，稍為花枝招展一點，也無所謂吧。
她知道尤天勇不太喜歡這種玩樂的場合，所以大概會在開場後晚十數分鐘才到。Mimi 也等其他女生都離開了更衣室，才獨自認真地化好了妝，整理長裙，準備最佳狀態。
Mimi 收好化妝品，走到個人儲物櫃前，扭動密碼鎖。
「0508？依個就係妳儲物櫃嘅密碼？唔會就係尤天勇生日吓話？唔……金牛座，都似佢嘅。」
Mimi 吃了一驚，她迅速轉頭。
鄭雪蕾站在女更衣室的後方，抱著雙手，明明比 Mimi 矮小的她，卻用高高在上的眼神望向 Mimi。
「妳……妳係度做咩？」Mimi 問道。
「點講好呢，」鄭雪蕾臉上收不到得意的笑容「如果妳問點解會咁，諗番轉頭，其實都係因為我，不過……我都唔知應唔應該讚自己。」
「吓……？」Mimi 完全不明所以。
「人真係好奇妙嘅生物，明明每個人為咗自己想要野、或者想逃避嘅野，就應該乜都做得出先係嫁。所謂人不為己，天誅地滅，但原來我地嚟到最後，最難逃避嘅……係我地會有愛，我地會愛其他人。好似妳愛尤天勇，許愛悠曾經愛林之年，楊希杰愛方潔海。愛是恆久忍耐，又有恩慈。唉，我始終覺得依段說話，其實係對我地人類嘅反諷。」
晚上的更衣室中只有通風抽氣扇轉動的沉響，Mimi 無法理解鄭雪蕾的話，但內心的直覺不斷沉落。
「妳、妳……到底想講乜？」
鄭雪蕾舉起食指：「妳打開妳嘅儲物櫃，睇下入面有咩。」
Mimi 伸出手莫名顛抖的手，解下密碼鎖，打開她的儲物櫃——
█
阿北第一次深刻感受到許愛悠的體溫。
他回想學期初的那天，戴著眼鏡的她一個人走進橋牌學會的社團室，毫無預兆地要他合作推動校規修訂。
再到在天台上，她用林強聚賭的罪證要脅阿北；再到萬聖節精靈之夜，那充滿變故的晚上，她突如其來那自責般的擁抱。
不知從何開始，許愛悠在他心中的印象由一位難以捉摸的惡作劇女神，變成此刻他懷中如此普通、如此平凡的女生。
「原來妳攬起上嚟，比平常望落去仲要瘦。」
「係咩？」許愛悠抱著阿北，把頭埋在他的頸間，淡然地說「依期成日要練舞嘛，所以再瘦咗掛。」
許愛悠的身體從來都是纖巧型，但此刻阿北抱在懷中，才覺得她也只是一位尋常的女高中生。
清麗的管弦樂像晨間的薄霧，兩人相擁的身影在暖黃的燈光下搖曳著。
「愛悠，我唔知我咁講有無錯，但我今日我知妳出事之後，我終於覺得妳所做嘅所有野，從來都唔係為咗咩愛與勇氣或者自由，而係純粹為咗妳自己。」
許愛悠沒有回答，只是把阿北抱得更緊。
「以下只係我嘅假設……妳要推動校規修訂，會唔會只係因為舊年林之年唔聽妳講，妳始終想要成功推一次，去證明係有可能做到；妳相信尤天勇會造假票，係因妳放唔低林之年當年為左妳去造票；妳幫小型社團上位，重新投身舞蹈社，會唔會只係妳脫離咗學生會，一個人覺得寂寞；妳接受何子晉幫妳，係因為妳明知佢鍾意妳，而妳對佢無意思，可以藉依樣野操縱佢；妳對抗鄭雪蕾，會唔會因為操場校園祭，本來就係妳舊年嘅計劃；妳叫我睇住程芳靈，係因為妳驚范震升可能係尤天勇嘅秘密盟友；妳唔想面對尤天勇，係因為妳知道，錯嘅可能係妳自己……」
「可能妳所做嘅一切，從頭到尾，都只係為滿足妳自己一個人。」
許愛悠抬起頭看著阿北，雙眼如寒夜的湖水般平靜。
「如果我話係呢？」許愛悠說。
「係就好啦，」阿北說「咁樣妳同我都係一樣，愛悠。我地都係為咗我地自己，我地一啲都唔偉大。妳或者只係等緊一個人，可以叫妳放棄依一切。愛、勇氣、自由、平等、權利——依一切從來都唔重要，愛悠，無咗林之年嘅妳，其實唔需要擔任拯救世界依個角色，去證明自己係有價值，仍然值得被愛。」
「死仔⋯⋯」
許愛悠眉頭驟皺，深棕色的瞳孔突然盪樣無盡的淚水，她緊抿著嘴唇忍住喉間的乾澀。
「我都係一樣，」阿北說「我唔係為咗保護林強、我唔係怕被妳要脅，我無興趣校規修訂嘅結果，我純粹只係鍾意有妳陪我。做咗咁多年學生，做咗六年死毒撚，終於有又聰明又靚囡嘅妳，為我依個一事無成嘅校園生活帶嚟樂趣。我想妳得閒無事就叫我幫手搞事，我想妳成日鬧我係『死仔』，我可以得閒同妳互串，我想妳繼續對抗學生會、對抗鄭雪蕾，咁樣，我就可以一直陪住妳……」
許愛悠眼眶透紅，雙手緊緊抓住阿北的肩頭，粉頰帶著圓滿的微笑，貼著他的臉旁。
「你唔係想乜都唔做，淨係匿係屋企睇電視咩？」許愛悠用脆弱的聲線說。
「想嫁，」阿北撫著她的背說「好想呀，如果妳之後得閒嘅，有無興趣一齊睇？」
音樂緩板行進，兩人輕踱舞步，像墜入萬暗的海底，在無端的洪流裡依偎相擁。
「阿北，多謝你……我知道依一切未必係你想要，係我一意孤行，係我拖你落水，你隨時可以出賣我、背叛我、唔理我，但你依一刻仲係我身邊……學你話齋，依個世界可能從來唔需要我去救，但依刻有你係度，已經係我許愛悠最大嘅幸運。」
阿北撫起許愛悠的髮絲，也在她耳邊說：「我都係，愛悠。我到依家都唔知，到底妳係善定係惡，係女神定係惡魔，但依一刻嘅我，絕對係心甘情願係妳身邊，或者妳每一步都係錯，或者我只係傻下傻下咁陪妳錯落去，無論之後會點，無論妳俾我揀幾多次，依個都會係我嘅選擇。至少今晚，我一定會入嚟陪妳跳依隻舞，一定會陪係妳身邊。」
許愛悠噙住淚水，勾起抖動的嘴角：「原來我嘅世界係咁細，真係好啦。」
「係嫁，我地嘅世界，一啲都唔大。」阿北說道「我地可以拯救嘅，可能從來都只有我地自己。」
阿北說完，卻突然伸手摸向許愛悠的背後，摸向她拉鏈上方的衣緣。
許愛悠大吃一驚，停下腳步，抓緊阿北的手：「你做咩，果度——」
阿北剛才抱住許愛悠的時候，就摸到她露肩長裙的背封上，有一處特別疆硬的質感，她全身上下可以穩妥收藏一疊選票的位置，大概就是背部。
「所以我為咗妳，為咗我自己，」阿北說「我都做咗一個決定。」
「唔得！」許愛悠立刻急嚷道，壓緊阿北的手「唔可以咁做！我話過，唔可以將選票再嫁禍俾其他人！」
「今個學期我都聽妳任性咗咁多次啦，今次係時候到我任性——」
「唔得呀！」許愛悠慌忙叫嚷著「我話唔得就係唔得！你再嚟我喊嫁！」
「妳喊都好，都要有人解決依件事，妳就當我要玩一次英雄救美。」
「英咩雄呀！垃圾！你唔係呀！」許愛悠雙眼泛紅，抵拒著阿北的手臂「唔得呀！你、你……你係咪又唔聽我講呀！死仔北！打靶仔！唔準呀！」
「妳唔通叫我真係入嚟同妳跳完舞之後，就由得妳俾風紀捉住——」
「我唔理呀！」許愛悠揚起雙臂「你再嚟嘅，我出絕招嫁！」
「吓，絕招？」
「我——」
許愛悠抱起阿北的肩頭，吻向他的嘴唇。