《等那一天我們在操場上接吻》（2025新版）: Interlude：The Wind is Blowing／風が吹いている

Interlude：The Wind is Blowing／風が吹いている


　　想不到，先碰到的會是林之年。

　　「阿北！嘩，真係好耐無見啦，起碼都有兩三年。」

　　那是一個充滿暑氣的晚上，白天的烈日徹底燒炙整個城市，入城後累積的熱力不但沒有消散，更似乎要在黑夜裡爆發。

　　林之年穿著方便行動的T恤以及牛仔褲，社會的歷練沒有磨損他的帥氣，反正令他的輪廓更為分明。





　　他的手臂上綁著一道隨夜風飄盪的黃絲帶。阿北微笑道：「係呀，真係好耐無見啦，我就估到你一定會係度，但我無估到咁快就撞到你。」

　　林之年身上冒著汗，也稍為有點氣喘，他似乎剛負責過一些粗活，可能是物資組的成員。他的微笑仍然掩藏不了擔憂：

　　「聽講一間陣……可能會有清場行動，當然我唔知係咪只係放風，但我地都要準備定。你自己一個嚟？」

　　阿北望向在街頭上跑動、組織以及指揮，設置各種指示及救護站的人群。一夜之間，這城市似乎已天翻地覆。

　　「唔知算唔算自己一個，我知佢地都係度，但我唔知確切位置。繞盈好似去準備防守；范震升同芳靈應該都係度，佢地多數負責現場翻譯同媒體文宣組；鄭雪蕾好似有話要係外國趕返嚟，但你知啦，佢同小郭都係有錢人……比較神秘。」





　　「你個位好兄弟呢？徐強？黃強？」

　　「哈哈，」阿北笑說「你係講林強？佢地上曬裝，好似去左守路口喎。」

　　林之年皺了皺眉梢：「咁你叫佢一定要小心，無人知會發生咩事……」

　　「放心啦，講著草阿強一定係第一，佢朋友多fans多，方便call馬姐。」

　　林之年與阿北站在公路中心，眼前的商業區似乎一片平靜如常，街上呼號的群眾惚恍在經歷著平行時空下的仲夏之夢。





　　「小悠呢……佢依家點呀？」

　　阿北吸了一口溫熱的港口海風：「佢呀，佢……你知道佢個人架啦，成日冇嚟搭霎，我都唔肯定佢依排係邊。」

　　林之年沉默過後拍了拍阿北的肩：「我當日有睇，你同佢既畫面仲瀝瀝再目。我真心祝福你地兩個。」

　　阿北沒有回答，被林之年的話勾起了那天的回憶。對了，那天一樣是仲夏，一樣是陽光燦爛的晴天。

　　——到我真正唔會再亂咁走、會永遠係你身邊既時候，個世界可能已經變曬——

　　「係行過嚟果陣，」阿北說「我唔知成日諗起楊希曦，佢曾經同我講過類似咁既野：『係因為我地揀左其中一邊，兩者先會衝突』。」

　　「楊希曦？」林之年想著說「等我諗下先，好似係……當年同你地打對台果個女仔？」





　　「係，」阿北點頭：「唔知點解，我耐唔耐就諗番起佢依番說話，我係度諗……今次我地既選擇，又會帶嚟幾大既衝突。」

　　「至少，」林之年搭起阿北的肩頭「你願意去選擇。」

　　「哈哈，當年既經歷教識左我，我地係行動選擇之前，一早已經選擇左。」

　　林之年也陪著笑起來：「我相信如果佢係度嘅話，或者好高興聽到你咁講。」

　　阿北沒有回答，夜已漸深，可是公路的人潮有增無減，氣氛也漸趨緊張。

　　「我去做野先，」林之年對阿北說「今晚自己小心。」

　　「你都係，大家咁話。」阿北拍了拍林之年的肩頭。

　　林之年向他揮手，轉向走進人群當中。





　　阿北走在燥動的人群之間，又想起那天操場上他所看見的畫面。只是今天晚上的人群、比那天還要多十倍、一百倍，每個人臉都是帶著各自的熱血、惶惑、不忿、堅毅、奮勇。氣氛似乎愈來愈緊張，但也這難怪，據說今天晚上就已經是「底線」了。

　　港口兩岸的風吹拂著他身上的汗水，阿北看著那像被人群的情緒點亮了的夜空。

　　妳成日都話，妳對我有信心，我地一定會再見。

　　依家，妳又會唔會同我一樣響依度？