《等那一天我們在操場上接吻》（2025新版）: 咖啡

40 咖啡


　　許愛悠推開鐵櫃的門，她穿著有點皺亂的校服，坐在櫃內寬廣的空間裡，修長的腰間伸起懶腰，舉起雙手打起呵欠。

　　「妳……」阿北問道「妳係入面做咩呢？」

　　「哼，」許愛悠撇了阿北一眼「訓覺呀。頭先個會悶到呢，嘩我差啲訓著，痴線。你地入到嚟又無端端係度打橋牌喎，粒聲唔出咁，我咪訓下先囉。」

　　阿北瞇起眼，那麼說許愛悠從一開始就已經在這裡了。他與林強、鄭雪蕾、郭允箏打了一整局橋牌，卻沒發現鐵櫃裡有人。





　　「咁，呃唔……」阿北嚥了嚥喉間「到底……學校對妳嘅處分係──」

　　「關你咩事呀？」許愛悠毫不客氣一下打斷了阿北的話。

　　「許大小姐……」

　　「你唔係想我俾人踢出校咩？我返屋企食完又訓，訓完又食咪幾好！仲要屈我晚晚打俾你，你夠膽開個通話紀錄俾大家睇下丫，睇下邊個打俾邊個多啲，超～！」

　　「……姐係呢──」





　　「哈囉～！強強！好耐無見啦！」許愛悠直接無視阿北「你幾好嘛，你做節目好正啊，我日日都有準時睇直播俾like架！」

　　「嘿嘿，多謝妳呀愛悠BB～」林強摸起頭，看來受寵若驚地說「我知愛悠BB妳有睇的話，我一定會更俾心機做架！」

　　「點呀師妹，成個寒假無見。之前無接妳電話，同妳講聲唔好意思。」

　　鄭雪蕾抬起臉：「唔緊要啦，我果陣都係想講粗口鬧妳姐。不過依家無所謂啦，可能我選會長贏面仲大過之前。」

　　許愛悠又望向范震升，有點猶疑地說：「我上學期……都未多謝你。或者我係你心目中唔代表啲咩，但始終都係你幫過我。多謝你，范震升同學。」





　　「我從來都係為我自己，」范震升望向程芳靈「或為芳靈而做，妳唔需要咁客氣。」
　
　　「不過我故幾好奇，原來林之年識咗你咁耐，我同佢拍咗成年幾拖都真心唔知。」許愛悠說。

　　「Ο κόσμος δεν θα καεί σε μια μέρα。世界唔會係一日內毀滅，係我教佢講。」

　　「啊哈，」許愛悠恍然大悟「我都奇怪佢點識咩希臘文嫁啦！原來又係執人口水尾嚟溝囡！啲男人真係信唔過。」

　　「……啊唔，許大小姐，姐係呢……」阿北吞吐著說。

　　「好啦～」許愛悠拍了拍手「咁我唔阻你地啦。今日學校對我嘅處分呢，其實係『禁止再參與任何社團活動』以及『除生理原因外，不可缺席任何上課日』，否則會有進一步處分咁話。我唔知你地個台算唔算社團活動，但為咗避嫌，我走先啦。」

　　「呃，啊……愛悠……」





　　許愛悠似乎沒有聽見阿北的叫喚，逕自往門外走向，鄭雪蕾卻閃身擋在許愛悠面前。

　　「咁又唔洗，」鄭雪蕾說「我地要今日要傾嘅，都差不多傾曬啦，行啦，小郭。喂，林強，范震升，你地兩個都係，行啦。」

　　鄭雪蕾領頭要其他人離開，林強意會過來，嗯嗯的跟著走，范震升倒是有點困惑：「唔，姐係……？」

　　「行啦，妖！」鄭雪蕾擺手說「程芳靈妳話下依條友啦！咩恢復正常，邊度有正常過。」

　　程芳靈雖然雙頰透紅，但竟也點了點頭，拉著范震升的手臂就走。

　　所有人離開工作室關上門，剩下許愛悠與阿北。

　　阿北望著許愛悠板起臉的側影：「嗯……姐係……」

　　「咩呀！？」許愛悠瞪起眼。





　　「妳啲反應可唔可以唔好咁老土──」

　　許愛悠聽見，倒是綻出認真惱怒的雙眼，訝異道：「嘩你條友！？你仲夠膽講你之前拍過拖！？what the fuck 真係曬我時間。」

　　許愛悠急步走向門前，似乎要奪門而出。阿北卻一把拉住她右手的手腕：

　　「唉！對唔住啦，係我錯！許大小姐！愛悠BB！愛悠……我、我唔係想笑妳咩公主咩又訓又食，我都係配合下鄭雪蕾，妳知佢份人──」

　　「你認錯仲要拎其他人嚟做藉口！？」許愛悠失笑地看著阿北。

　　「唔係！唉，」阿北低頭說「總之……我、我……對唔住啦！係我錯，我一直都好擔心妳，妳依家叫做無事就好……至少唔洗俾人踢出校。」

　　阿北仍然捉緊許愛悠的手腕，許愛悠總算呼了口氣，噘動嘴尖：「邊有咁易俾人踢出校丫，學你地個台話齋，我同小弦接吻唔係響學校入面，仲要未開學，嚴格嚟講學校管唔到，但我上學期可能都係太高調，所以俾佢地 ban 咗我玩社團活動，無得跳 dancing 呶。」





　　「點都好啦……妳、妳無事就最好，我仲可以係學校見到妳。」

　　許愛悠擺了擺頭，用施虐者的語氣說：「噢～係呀？你想響學校見到我咩？我返屋企做公主唔好咩？」

　　「對唔住……」阿北再次低頭「係我錯，除咗對唔住之外我已經唔知講咩好……」

　　「嘿嘿，」許愛悠露齒而笑「你依家係『台長』喎，不如你直播跪係度公開道歉丫，大叫『我係打靶仔！許愛悠我對妳唔住！』」

　　阿北面有難色，抓緊許愛悠的手腕：「我唔係咩台長啦，真正嘅台長係鄭雪蕾，係佢出錢買設備同調動人手，我最多、最多都係用咗妳少少舞蹈社嘅人脈……」

　　「喂你唔好捉咁大力啦，痛呀。」

　　「啊對唔住……」

　　阿北放開許愛悠的手腕。許愛悠卻看了一眼阿北手腕上那老舊的鑰匙手鏈，反過來握起他的腕間：





　　「你……唔係為咗我，所以先搞咁多野咩？」

　　阿北呼了一口氣然後點頭：「係，無錯。因為……雖然妳依家叫做無事，但都係被處分，妳唔可以再參加社團？」

　　聽見阿北確實的回答，許愛悠呶起嘴尖笑說：「係呀，話係唔可以『參加任何社團校內或校外所有活動、會議、訓練』咁樣，仲要唔可以缺席上堂。」

　　「如果妳唔理照做呢？」

　　「話會有……」許愛悠想著道「進一步處分，咪姐係同楊希杰同方潔海要寫悔過書一樣。」

　　阿北沉著臉說：「咁姐係我地要繼續，推動校規修訂，直到妳無事為止。」

　　「你確定？」許愛悠沉吟著「你唔係為咗……咩咩？」

　　「咩呀？」阿北困惑地問。

　　「你果晚係電話同我講，話成功修訂校規之後，就可以同我係操場上面……咩囉。」

　　許愛悠靠近一步，端看著阿北的臉，似乎是在逼問又像是在審視他眼神的真偽。

　　阿北嚥了嚥喉間：「Kiss 姐，妳又唔洗講到咁曖昧嘅。定係……妳唔想？」

　　許愛悠動了動嘴尖，莞爾著說：「無呀，我無話唔想呀。不過，咁樣嘅話，我應該要幫你地手喎。」

　　阿北卻愣道：「等陣先，妳唔係有禁令──」

　　「起我講下嘅姐～」許愛悠握住阿北手腕的手滑下去，握起他的手心「你知女人火遮眼，咩都講得出嫁啦。」

　　阿北也握起許愛悠的手心，卻皺眉說：「唔係依個問題，而係俾學校捉到的話……」

　　「放心喎，」許愛悠說「我唔洗親自出面嫁，你都知我有幾多相熟師弟妹嫁啦。」

　　「唔係呢，」阿北認真道「我都係覺得妳先低調返──」

　　「咁唔通我就日日乖乖地上堂，等考公開試，見你、見強強，見雪蕾BB落曬場，我就咩都唔做呀？」

　　「咁但係，」阿北嘆了口氣說「唔係依個問題，而係訓導組嘅禁令，唔係講玩，妳只要一被篤灰──」

　　許愛悠又皺起眉頭說：「啊～～～！你明知我有能力應付到，而且……所有野都因我而起……」

　　許愛悠說著聲線又漸漸低下去，帶著隱約的悔疚，阿北卻說：「妳唔洗咁覺得嘅，正如我之前同妳講，鄭雪蕾、阿強、范震升佢地都有各自嘅目的。」

　　許愛悠突然把阿北的手握得更緊，阿北只覺得有點奇怪，她頓了片刻，才似下定決心地說：「阿北，我所講嘅『因我而起』係指──」

　　這時候，工作室的門卻打開了。

　　「我今次同意阿北所講，許愛悠，妳暫先唔好再參與行動。」

　　阿北與許愛悠往門外看去，林強、鄭雪蕾、郭允箏、范震升、程芳靈，所有人仍然還在。

　　「呃，你地……」阿北愕然道「唔係走咗咩？」

　　「我頭先只係話『行啦』，無話『走啦』，」鄭雪蕾重新步進工作室，大言不慚地說「你地依依揖揖我無興趣理，但許愛悠，今次嘅情況，唔適合妳去處理。」

　　阿北與許愛悠面面相襯，然後許愛悠難得困窘地說：「但我只係想幫大家──」

　　「依家唔再係妳一個人話要『校規修訂』嘅任性，」鄭雪蕾指著許愛悠，義正嚴詞地道「仲會影響我同楊希曦嘅會長選舉，風紀委針對校內手機使用、對校園電視台廣播嘅態度，仲有風紀當值嘅權力，童軍係學校嘅權力。不論所有嘅起因係妳，定妳身邊個條友為咗救妳，刻意拉曬所有人落水，事實就係……依家唔再係妳一個人嘅事。仲有，妳覺得唔岩聽我都要講：妳有禁令在身，對我地嚟講隨時係弱點。」

　　許愛悠沉著臉，卻無法反駁。

　　阿北牽緊許愛悠的手：「妳乖啦，當係抖下又好，準備公開試都好，淨底嘅野交俾我地。呃啊──！等陣先、點、點解呀！！啊！」

　　許愛悠帶著不忿的表情，揮打著阿北的肩背，像要發洩積累以久的怒氣：

　　「一日都係你死仔北！！聖誕跳舞抱到我咁實！搞到俾小弦見到！！最衰都係你呀！頭先訓導主任應該要見埋你！點解唔係罰你呀！垃圾！」

　　「喂、嘩！！妳、妳自己無份跳嫁咩，喂，妳冷靜啲──！！」


█ 


　　「依個處分好正常呀，我地都已經係應屆畢業生，扣埋復活節長假、咩陸運會水運會、最後考試周，我地得番大概4個月時間係學校，依個時間點仲要許愛悠休學，無必要又會受非議，佢依家唔可以參加社團活動，又唔可以缺席，就校方角度睇，係最佳規勸。」

　　尤天勇坐在學生會會議室的坐置內，喝著今天第三杯的 Mimi 手沖咖啡。

　　Mimi 坐在旁邊，邊整理著文件邊說：「但『唔可以參加社團活動』依一點，到底要點樣定義……」

　　「咁就睇要許愛悠佢夠唔夠膽試水溫，依家唔淨係『社團』，而係『任何社團活動』，字面上就算阿北搞個橋牌比賽，佢走去玩，嚴格定義睇都可以當佢觸犯禁令。」

　　「結論就係，許愛悠必須退下前線，佢嘅工作會由阿北同鄭雪蕾接手，但係……以佢嘅性格，佢真係會甘願退居幕後咩？」Mimi 帶著懷疑的語氣說。

　　尤天勇笑說：「Doris 佢份人……甘願就肯定佢唔甘願，但問題係事態發展到咁，即使佢係許愛悠，佢又可以點插手？」

　　尤天勇拿起手機，下課後又是「全人類愛與勇氣無死角校園電視台」的節目首播時段，是日重點節目是「赤皇」馬群陽的賽前準備，以及緊接下來的籃球隊校外比賽情況分析。

　　電視台甚至找來了友校的體育隊員作簡單採訪。有校外人脈的，大抵是經常跟其他學校作問答比賽的鄭雪蕾。現時電視台的節目內容已不限於針對風紀或童軍的煽動短片，或對校內各大小事件的清談議論，甚至涉及到體育比賽。

　　下一輪的節目又會是什麼呢？就連尤天勇也不禁好奇。交響樂團 live 演奏會？舞蹈社美女們的性感演出？廚藝學會的烹飪教室？

　　抑或，是下任會長的選戰？

　　尤天勇又不禁想，如果上學期出手的是阿北，而不是出身自學生會、終究習慣傳統活動規劃的許愛悠，十二大社團的形勢會否已完全天翻地覆？

　　「我地學生會，係咪應該都要表態？」Mimi 又問。

　　尤天勇搖頭：「我地學生會從來只係中間人，負責場地審批。校園電視台有專用工作室，佢地拍片直播，又唔需要場地，唔洗同我地申請，又無抵觸到學生會守則，我地有咩可以表態？」

　　Mimi 也用筆竿撐起下唇：「啊……我記得，前會長林之年，佢有接受過校園電視台訪問，雖然都係問啲無聊野，但我記得果段訪問，算係比較多人提及嘅校園電視台訪問。」

　　「哈哈，」尤天勇呷了一口咖啡「咁睇不如我都去接受訪問，做下形象工程都好。」

　　「咁不如我上鏡賣埋咖啡豆啦，學生會秘書手沖咖啡～」Mimi 調侃說。

　　「講笑姐，不過都係唔好，我話曬都係前風紀，咁樣又好似背叛咗各位前同事。妳話係咪呀，師妹？」

　　楊希曦坐在會議室桌子的另一端，面前放著已經冷了的咖啡，她一口也沒有喝過。

　　當尤天勇與 Mimi 互相貪嘴，她卻一句話也說不出來。

　　「雖然依家唔係正式會議，」楊希曦用端正的坐姿說「我都代表風紀委員會，感謝師兄你保持中立。」

　　尤天勇轉身過來，對楊希曦說：「如果風紀委真係要將校園電視台嘅問題，提升到由校規修訂去處理，妳應該知道後果可能一發不可收拾。」

　　楊希曦嘗試挽起微笑，可是她只覺得嘴角甚是疲累：「依個係風紀委嘅集體決定。」

　　「當上學期許愛悠宣稱要推動校規修訂，」尤天勇說「我就決定我任內其中之一嘅目標，就係要阻佢成功。依家許愛悠嘅影響可能大不如前，但如果有其他人去幫佢，可能會用更意想不到嘅方式去推動校規修訂。講句真心說話，我可能仲熟悉許愛悠，有辦法阻到佢，但如果係成間學校嘅民意，我只不過係學生會會長，亦都一樣要認輸。」

　　楊希曦望向馬克杯中深棕色的咖啡，她知道那是 Mimi 的手沖精品，出於禮貌她應該至少喝上一口，卻始終沒有意欲。

　　「我明白，但就算十二大社團通過動議，之後仲要全校公投，我相信師兄你唔需要擔心。」

　　「可能……」尤天勇推了推桌上的手機「阿北佢選擇網絡廣播，就係為公投做準備。」

　　楊希曦驀然回想，那天那場突如其來的滂沱暴雨，阿北最後轉身離開，撐著黑傘隻身走進雨中的背影。

　　如果不是她將林強在橋牌學會的罪證送向學生會；
　　如果不是她知道籃球隊乙隊中向來都有衝突的狀況，要學弟們爆料；
　　如果不是她擔任初階女童軍的時候，就知道何子晉迷戀許愛悠；

　　如果不是她注意到許愛悠與殷詠弦的關係，於聖誕晚會的時候，引導殷詠弦去看許愛悠與阿北共舞的親密身影；

　　又如果，她不是楊希杰的親姐……

　　但現在想這些事情已是毫無意義。

　　「師兄，」楊希曦握緊馬克杯說「你對我參選會長仲有無信心。」

　　尤天勇頓了一頓，確切地說：「我講過，我睇人好準。」

　　「既然係咁，雖然學生唔會就校園電視台表態，但我相信以下依件事，師兄仍然可以幫手。」

　　楊希曦舉起馬克杯，將那苦味充沛又層次豐富的咖啡一飲而盡。Mimi 看著也不禁皺起眉頭。

　　尤天勇卻意會過來：「妳嘅意思係，我上學期應承過妳嘅……」

　　「活動場地分配權。」楊希曦說。


█ 


　　當許愛悠從洗手間回來後，卻發現阿北仍站在校園電視台的工作室門外。

　　許愛悠見他呆站著，卻不覺噗哧一笑：「其他人呢？」

　　「走曬啦，鄭雪蕾叫我鎖門嘛。」阿北看著許愛悠說。

　　「係咪架？」許愛悠笑著推了推工作室嚴實的大門「一陣又突然成班人衝出嚟。」

　　「妳仲好講，」阿北沒好氣地說「到底妳點解會走咗入去鐵櫃度訓覺。」

　　許愛悠還是一副老樣子惡作劇的表情：「我地 Dancing 好耐之前有幫校園電視台表演過啦，我自己都有好奇參觀過工作室，你地個低年級解題節目，一睇就知係依個工作室入面拍。我頭先聽完訓導主任個處分之後，就即刻嚟搵你地，睇下你地會唔會係度，門又無鎖我咪直接入去，突然就聽到腳步聲……我點知會係咩人入嚟，咪匿入個櫃度先。跟住，眼訓咪訓囉。」

　　電視台工作室為方便記者及採訪工作，工作時段確實不會上鎖。阿北只像聽見鬼故事般半信半疑，心想她更有可能是故意躲起來，等他取笑她的時候，才突然現身。

　　不過阿北決定讓許愛悠盡情發洩她的鬼腦筋，她之前請了一個禮拜假，直到今天才回校聽候發落，應該早悶得發慌了吧。

　　「咁妳走未呀？定妳想係度坐多陣？」

　　「走啦～留係度做乜姐，我又無得玩社團活動。」

　　現在已經是下午四時多，新學期才剛開始，社團活動或是練習也方興未艾，除了走廊尚有幾位當值的風紀，以及跑道上仍在練習田徑隊員外，整個校園倒是空曠得愜意恬靜。

　　阿北與許愛悠從廊間步出操場，準備立春的晚霞散發著淡淡的玟紅色。許愛悠抬起頭，深深吸了一口氣，她說：

　　「我好似好耐都未試過咁無野做啦。」

　　「我記得妳話妳中一就開始跳 Dancing，仲有玩過田徑隊、泳隊同交響樂團。我睇妳由入學開始就無停過。」阿北說。

　　「哈哈，」許愛悠邊走邊說「妳咁講又真係，又要讀書，又要參加社團，之後仲要拍拖仲入咗學生會，頂，我仲要有半年唔知做乜走咗去考琴，真係無乜點停過。」

　　兩人並肩在操場上走著，今天難得沒有任何體育校隊練習，兩人細碎的腳步聲在乍暖還寒的微風中迴盪，深綠色的塑膠地面像開闊的荒草地。

　　「我真係想象唔到，」阿北苦笑說「直到上學期妳嚟搵我為止，我都係返學等放學，得閒就玩下橋牌，咁就六年啦。」

　　許愛悠轉頭對阿北莞爾嬌笑：「無所謂啦，其實望番轉頭咁忙都唔知為乜，我同你咪又一樣，點都好都係得六年。」

　　阿北也笑了說：「妳咁講好唔似妳，睇嚟妳終於覺悟前非。」

　　「你地都唔俾我落場，」許愛悠帶著笑意問「我仲可以做得咩喎，無架啦，唯有享受下寧靜嘅校園生活。」

　　說著許愛悠又舉起雙臂伸起懶腰，阿北仍然不知道她那清爽的微笑下，有多少分是實話。

　　「……愛悠？」

　　阿北陪許愛悠走著，她卻突然停下步來。

　　許愛悠站在操場正中央，佇立在足球場框線的圓圈上。

　　她抬起頭，若有所思地細看新舊校舍的走廊。

　　「原來我係第一次……從依個角度去睇依間學校。」

　　阿北回步，走到許愛悠身邊，也一樣跟她環顧著整個校園，無人的走廊，粉白的外牆，完全功能性的沉悶建構，一列又一列閉上深綠色大門的班房。

　　「竟然？」

　　許愛悠見阿北陪著她抬頭，卻拉了拉他的衣袖：「喂死仔北，有樣野……我同你講，你唔好介意。」

　　「嗯？」阿北望看許愛悠折射著淡紅色晚霞的瞳孔。

　　「之前你咪問我，點解我咁鍾意去天台嘅……其實，令我有依個習慣嘅，係林之年。」

　　許愛悠的指頭夾著阿北長袖襯衫的衣袖，阿北倒聳了聳肩：「哈，我真係唔會介意喎，你地之前係情侶嘛。」

　　許愛悠挽起釋懷似的微笑：「林之年份人成日懶係詩情畫意咁，佢由岩岩同我拍拖開始，就成日約我去天台，除咗夠靜俾我地兩個傾計之外，仲話果度可以昅實學生會、教員室同半間學校，可以觀察到好多野喎。」

　　阿北「啊」了一聲終於明白，確實從那天台的位置，可以看到學生會辦公室：「咁妳最後觀察啲咩？」

　　許愛悠輕輕搖了搖頭：「無喎～果度確實係可以望到學生會，但你又無偷聽器，可以睇到啲咩姐？可能林之年勁過我啦，佢睇到我睇唔到嘅野。不過……上到去俯瞰成間學校，又確實係幾好 feel，一個人諗野幾舒服。」

　　阿北攤開手，示意空無一人而寬廣的操場：「依度都得架，依家咪無人囉，成間學校俾妳睇曬。」

　　「操場唔同啦，」許愛悠放開阿北的衣袖「操場……係我眼中，係學校真正嘅舞台。我一直希望所有活動，都可以係操場上面搞，開學禮、畢業禮、校園祭、甚至聖誕舞會……每個人唔會分身份、成績、操行、班別、年級，可以自由自在，你話如果學校係咁幾好玩呢。」

　　阿北又看了一眼各有六層高的新舊翼校舍：「咁證明……楊希杰同方潔海無揀錯，我同妳應該都無揀錯。」

　　許愛悠挪動腳步，面對阿北；阿北也正面看著許愛悠那雙閃爍的虹膜。

　　「其實……你依家咀我都得架，咁咪完咗件事囉。」

　　許愛悠柔聲說著，她黑長直髮下的雙頰難得泛起紅霞，但阿北不肯定那是她真正的羞紅，或是天色的點染。

　　「依家？我唔係唔想，但仲有風紀當緊值，我一咀落去，許同學，妳就可以提早畢業。」

　　「都差四個月姐，」許愛悠咯咯笑說「我上唔上堂，公開試都係照考架啦。」

　　「妳終於要放棄『校規修訂』？」阿北踏前一步。

　　許愛悠也踏前一步，稍低下頭說：「可能……係我突然開始驚會失敗，咁我地嘅約定就唔可以實現。」

　　阿北想握起許愛悠的手，可是他不知道那會否影響到許愛悠現有的處分。他只是說：

　　「我知咁講好唔似我，」阿北說「但我覺得點都要試一次。正如鄭雪蕾所講，依家已經唔係妳，亦唔止係我地兩個人嘅事。」

　　許愛悠輕抿微笑著的嘴唇，細想片刻就說：「好啦，我地都係快啲走啦，再咁你眼望我眼，我驚真係忍唔住。」

　　「我都係，真係好危險，走啦。」阿北也搖頭苦笑。

　　許愛悠朝校門口走去，阿北也跟上，卻不覺又停下腳步，抬頭再次環顧許愛悠眼裡的風景。