《等那一天我們在操場上接吻》（2025新版）: 手心
46 手心
阿北看著前方，那在黑暗中斑駁岩巉的牆身。
空無一物的牆上，卻似浮現了崩裂纏繞的幻相。
楊希杰與方潔海的接吻事件，是一切的肇因。
因為兩人在操場的角落接吻，被拍下照片放到網絡上，再被學校訓導處分；兩人進一步拒絕處分，而被即時開除開藉，在兩人被帶離學校那天的早上，兩人突然衝出操場，在操場中央接吻，那令整所學校震呆的場面。
許愛悠是因為這件事而公開表示要校規修訂，同時推倒十二大社團的高牆。有了她，才有了以後的一切。
阿北交握住許愛悠放在他胸前的手心，說道：
「妳嘅意思係……係妳令到楊希杰同方潔海被踢出校？」
許愛悠始終從後緊抱住阿北，她在他頸間搖起頭；「唔係……我無預到個結果係會係咁。我無諗到……佢地兩個會連第一次嘅處分都拒絕埋。」
是她。許愛悠，因為要推動校規修訂，所以才來找曾經身為十二大社團的他，軟硬兼施逼使他參與在內。
然後，有了萬聖節的精靈之夜，有了聖誕節的校園祭。
對了。萬聖誕那天晚上。許愛悠曾經慌亂地給過他一個擁抱，以及一句未有解釋的道歉。
「所以……」阿北握住許愛悠的手心說「妳並唔係因為佢地接吻，而推動校規修訂；事實，係相反……」
許愛悠輕柔地呼吸著，那在吹拂的夜風中彷彿帶著沙啞。
「嗯……」許愛悠在他背後說「我、我……係我利用咗佢地兩個、即使我、我……知道佢地要俾人踢出校、我……我仍然繼續，因為，依個真係一個機會、一個機會，我可以改變到我一直想改變嘅校規、甚至認證社團制度……」
「純粹……因為係咁？」阿北問道。
許愛悠艱難地吐息著：「可能、可能……我唔知，我、我知道咁講好傻，但係，當我同林之年分咗手之後，當我離開學生會之後。我更加想證明、我……我唔需要學生會依個制度，都做到我想做嘅野。可能、我果陣好想證明俾林之年睇，我就算無咗佢，都有能力做到我想到嘅野。就算我唔接受佢為我而造票，就算我唔需要佢為我而擔心難過，我、我……我都可以做到……」
許愛悠的手握得更緊，聲線愈來愈幽微，阿北閉上了眼。
如果從一開始就是許愛悠。那麼之後的所有，鄭雪蕾、郭允箏、范震升、程芳靈、楊希曦、何子晉。甚至尤天勇，Mimi，馬群陽……
「點解妳依家要同我講。」阿北問道「其實我唔需要知，我只係因為妳──」
許愛悠又搖了搖頭，打斷了阿北的話：「唔係，你一定要知。阿北，你一定要知。」
「但係──」
「如果有一個人要為所有野負責，果個人就係我。如果件事發展到依家而有任何後果，全部都係我應得。」
許愛悠的聲線傳進夜裡，阿北仍然閉著眼。
從上學期至今的各種惡鬥，各種爭拗，各種喜怒哀樂，各種失望與驚喜。
當鄭雪蕾在操場上悲泣；當郭允箏承受鄭雪蕾的那一巴掌；當程芳靈在歐研中孤獨地等待范震升；當 Mimi 在更衣室中發難；當范震升必須窩在細小的圖書館裡。
甚至到今天，他為她推動校規修訂。校內的手機使用與校園電視台爭議、楊希曦與鄭雪蕾所代表的不同陣營的對立。
當陸運會跨欄事故發生後，楊希曦與他對質。
──當你決意要做一件事，就必然會引發其他結果──
阿北想起在聖誕舞會的時候，他曾經想過代替她而犧牲。
他仍然記得她那激動而錯愕的表情，那時的她連聲咒罵，那時的她堅持抗拒。
也許從那時候起，她就決定要孤身背負這所有。
「原來……」阿北說「林之年果日同妳講嘅，就係依一件事。」
「係……」許愛悠點著頭「你都知道，我一直無換舊手機，鏡頭有漏光……林之年有問訓導主任拎過啲相嚟睇，一睇就知係我影。」
阿北記得那時候她林之年步出禮堂，當她跟著出去時，那若有所思的複雜表情。
「咁佢點講？」
許愛悠貼緊阿北的身體，她永遠會記得那天晚上的舞會，阿北抱住著她起舞的畫面，她永遠永遠都不會忘記。
「林之年話『小悠，我真心希望妳相信自己做嘅野』」
「愛悠，」阿北說「咁妳依家仲信唔信妳做嘅野。」
「我真係唔知，」許愛悠把臉在阿北的頸間埋得更深「阿北，你所鍾意嘅我，你所想要去拯救嘅我；唔係因為有咩理念、理想，而不知不覺影響身邊所有人嘅女神──我只係，由頭到尾，從頭到尾，都只係一個任性嘅女仔。聖誕舞會嘅時候，其實你講得好岩，我一直想搵到一個人，叫我『停啦』，『唔好再落去喇』。唔止係咁，我可能、可能……比你講嘅更惡劣，只係因為我一個人嘅執著，就令到咁多人難過，引發咁多衝突，我亦……我亦根本無資格講咩平等、正義、愛與勇氣……我甚至無資格去講咩挑戰制度同框架，如果我話制度會產生問題，咁可能我嘅任性，同制度一樣咁惡劣……」
阿北聽著許愛悠變得粗重的鼻息，變得哽咽的聲線。
「我可能……比你地任何一個人，都無資格講『相信』。甚至尤天勇，佢都係為咗堅守林之年所教佢嘅野：甚至楊希曦，佢只係用佢代表嘅制度入面應有嘅手段，而我唔係，阿北。我只係，為咗我自己嘅任性，我完全無諗過任何後果，我從來唔理個世界、其他人會變成點。我利用過你地每一個人、林強、小弦、芳靈、何子晉。仲有你，阿北，我真係好鍾意你，我係講真，依一刻我好鍾意好鍾意你，但我亦從無諗過你會為我做咁多，你會為咗我不惜一切。對唔住，阿北……或者、或者……我依刻所擁有嘅野，其實已經比我該有嘅更多。或者、我唔想見到你、變成另一個我、我、我──」
「愛悠。」
「嗯……」許愛悠輕輕應著。
阿北張開眼，在許愛悠的環抱下轉身，望向她那皎白像無血色的臉，她的雙眼從未如此深邃過，瞳孔隱沒著即將入缺的月相。
阿北輕撫著她微溫的額頭，她緩緩地閉上了眼，阿北抱起她的身驅，讓她靠在他的肩上。
聖誕晚會的時候，他說過，她也許只是想有一個人，來勸她放棄所有的行動，來阻止她的任性。
但又也許不只如此，最佳的解答其實更簡單；比所有的對話與行動，還要更簡單。
在失落、無助、懺悔、脆弱的盡頭；在懷疑、否定、放棄、幻滅的往後。
阿北始終沒有放開許愛悠的手心。
「其實，」他說「妳啲鬆餅真係好好食，我係認真，真係好好食。」
許愛悠雙眼驟怔，混雜著不解與錯愕，可是就在一瞬之間，她終於明白了什麼。
她咬著抖著的嘴唇，幽冷的雙眼突然充滿了輝映漫溢的流光，如月夜般滿盈的淚水從她眼角細流而出。
「痴線……」許愛悠低下頭掩起自己的雙眼，雙手輕敲起阿北的胸口，低泣著說「你條痴線佬，你知唔知自己講緊啲乜呀……」
「雖然妳話啲麵粉過咗期，」阿北抱緊許愛悠說「雖然個樣係有啲奇怪，但我真係好鍾意佢咬落去嘅味道；仲有，妳之前整嘅肉醬意粉又係，雖然唔知點解乾濕分離咁款，啲肉醬又雞又豬又牛，但食落去又出奇地好味。」
「乜野呀，」許愛悠破涕為笑，猛打著阿北的肩頭「邊有乾濕分離呀，痴線……」
「仲有，妳仲唔記得妳上次整個『舊』蔥油餅呀，Well，佢真係『一舊』蔥油餅，但唔知點解我食下食下又食曬；仲有個堆 Tiramisu，嘩，份子料理咁嘅樣，但又好食喎；然後個碟螢光咖哩，入面又蟹柳又魚蛋，打邊爐咩，但又食到我停唔到──」
阿北訴說著許愛悠造過給他的每一道菜，每一份既失敗又成功的午餐。
每一次他總不斷抱怨那些食物的特異外觀，但又每一次都吃得一滴不漏。
阿北一邊說著，許愛悠的心壓縮地陣痛，被包覆的雙手緊握顛動，不斷抽泣卻又忍不住一路傻笑。
她的手，她的心，從未如此沉重，又從未如此輕盈，恍惚不再屬於自己。
「你條死仔，到底點解、到底點解……你要咁對我……」
阿北緊抱住哭著的她，撫著她的背，模仿起許愛悠平常的神態：
「關妳咩事呀，超～我揀嘅。」
許愛悠終於放聲痛哭。
那抑壓了整整大半年──不，可能是從她離開林之年、離開學生會的時候，就累積下來的淚水。
她驟然失去了所有的信念與堅持，她再沒有值得相信的事物，她由此至終都是孤身一人。
但她又終於找到真正的解答，她曾經以為正確的答案，竟全都是虛無的選項，真正的圓滿卻原來就在那些微不足道的瞬間。
那些只是日常又像是奇蹟，只是偶然又像是注定的瞬間。
阿北抱住許愛悠慟哭著的身體，聽著那來自她身體最深處，源源不絕的哭聲。
「許愛悠，」阿北再次說道「如果妳話依一切係妳應得嘅，咁樣嘅話，我阿北點都唔會放過妳。」
許愛悠抬起頭，抱向阿北肩上，把沾著淚溫的臉頰旁在他的臉旁，用乾啞的聲線笑著說：
「我都係呀，打靶仔，如果你放過我嘅話，我依一世都唔會放過你。」
阿北抹去許愛悠臉上的淚水：「我咪同妳講過，我最怕見到女人喊。」
「唔係丫，OK 呀。」許愛悠擺出任性的笑臉說「我得閒無事會喊多幾次，等你習慣下嫁啦。」
許愛悠抱住阿北的頸間，阿北用指頭抹淨她漸漸住止的淚水。
「咁依家……又點呢？」
「唔……」許愛悠呶了呶嘴尖「今次應該無紀彤師姐突然衝出嚟，拉開我地兩個。」
阿北抹著許愛悠的髮梢：「妳真係唔等到去操場？」
「如果……」許愛悠握起阿北的手「真係去唔到，咁點算呀？」
「但學期仲未結束，」阿北再次扣起許愛悠的指間「係我地畢業之前，雪蕾BB、小郭，我同阿強都仲繼續有機會改變到校規，可以取消妳嘅處分，可以等我地終於係操場上面接吻。」
許愛悠猶有淚光的眼廉低垂下來：「你應該知道，對我嚟講其實已經唔重要。」
「正正係咁，」阿北說「對我嚟先更加重要，更加需要由我，去陪妳繼續行落去。」
許愛悠嫣然嬌笑，那像孩子般清爽的笑聲：「死仔北，話唔定我最大嘅報應，就係你呀。」
阿北抱住許愛悠的腰：「我 hea 咗五半年，可能上天係派妳用愛與勇氣嚟懲罰我。」
「哈哈，」許愛悠不禁笑著，但還是低下了頭「但我講真嫁，阿北。我多謝你仲堅持去幫我，但其實我真係無所謂啦。真係嫁，而且……」
阿北見許愛悠欲言之止：「嗯？」
「都係無野啦，」許愛悠挽起美滿的微笑「點呀，今晚係我攬住你訓，定你攬住我訓呀？」
阿北本來想要追問，但見她難得又破涕為笑，又說：「吓？妳今晚係度訓？咁范震升呢？」
許愛悠搖了搖頭說：「我唔知呀，頭先我吹完頭髮行出嚟，見到佢拎住本書走咗出去，我先入嚟嫁咋。」
「唔係……妳駛走佢嫁咩？」阿北意外地說。
「唔係呀。」許愛悠也瞪大眼晴意外地說「從來都唔係，佢連手機都無，我點俾暗示佢。」
「咁芳靈佢依家……」
「我去吹頭髮之前，佢話好似要去廚房拎熱水……」
阿北與許愛悠默然對望，然後又像突然明白了什麼。
「睇嚟，」阿北說道「我地要向來兩位師弟妹學習下。」
「真係，」許愛悠偷笑說「佢地先真係什麼鬼也不怕。」