《A》: 3

去到外地，只有工作順利，公司事重要但唔多，游亦然講兩句就一錘定音，無咩需要我去準備。




係工作上猶如一隻小廢人，係私人生活上就精彩嘞...








由去到機場嗰一刻起，我就扮演緊被包養上位嘅男秘書，點解我意識到唔對路呢...




即係我上司都幾沉默寡言同唔太理人，居然會見到有人叫佢之後，主動繞住我隻手，再畀細細聲、勁溫柔咁同我講嘢時，我就知今次仆街了。








嗰堆人本來和善嘅臉色一秒變黑，我只有聽到耳邊超細聲嘅：『我加錢，你加油。』




呢一句之後，導致我一聽到佢口中講『Gaa』同音都起晒弶同雞皮。








有一個好social嘅人，愣一愣之後就用好熱情咁打招呼：




「好耐無見。」




如果我無認錯，我係行業報道見過呢堆人，個個都有頭有臉，不過我唔太記得佢哋嘅名。








我隔離嗰個，用一種前所未有嘅mean聲打斷佢刻意想營造出嚟嘅和睦氣氛：




「真係想見？




想點啊唔好打搞我。」








我細細力撫上佢繞係我度嘅手，雖然人哋都會同佢打招呼證明佢都唔簡單，但呢個時候得罪人唔著數，人在外地需要時可能要合作...




本來熱情嗰位收皮，變成另一個無乜情緒嘅人講嘢：




「今次我哋要合作，一齊爭贏，一贏做呢單嘢。」








呢個人嗰格好似游亦然，應該係好友同樣性格一鬧矛盾就反面無得救嗰種關係，呢類關係完結多數佢哋太清楚大家嘅死穴，一嘢插中就無機會返轉頭。




「唔會合作，無需要。」




果然佢唔mean唔切，直接強硬拒絕，而嗰個人都表現得好釋然，顯然佢被迫完成咗需要帶頭講出計劃嘅部分，本人唔滿意同唔接受，但只有昔日好友當面拒絕。








雖然一個人抗衡唔到大環境，佢應該都好欣慰佢哋都係思想意念同步同頻。




「你拎10%，同一班人拎到成個case嚟做，唔好鬥氣。」




又有另一個女人衝出嚟，佢明艷嘅臉龐中帶有陰狠，有一種『唔聽話就一齊死』嘅感覺，意思好明確無誤導成份。




「既然你哋都傾好，咁我坐享其成，唔干預你哋點做。」




我清清楚楚咁睇到，佢唔再繞我嘅手拎出手機—




『（老闆頭像）：DLLM。』




哇，佢睇上嚟無所謂，但內裡好燥底，屌老闆呢家嘢食花生好開心。




「你都要照拎你嘅方案出嚟，做吓樣都要，我哋唔插手，但要講得通，同我哋嘅方案差唔多嘅延續。」




對面嗰堆人即刻提出條件，睇嚟佢哋吃過虧，佢真係試過係大事面前棄賽。




我信佢夠薑，單係而家都係一個人頂，我咩作用都起唔到，佢加錢我都唔好意思，都無提供過服務。




「咁去到先講。」




佢拉我隻手想行開，點知終於有人問：




「唔介紹一下呢位係？」




佢望住問嗰個人，瞬間意識到佢同呢個人，先係加錢需要我去服務嘅正宗感情轇轕。




我第一次咁樣介入人哋感情，有啲驚。




「我嘅人。」




游亦然做大事嘅人，連講大話都真心型過人。




但唔係應該係我講嘅咩？




唔好加錢，我承認我做得唔夠好，學佢嘅坦然係要冒住被人打嘅風險，制唔過。




我呢個時候安靜係必須，直覺話俾我知呢個時候多口會出事，成堆人凝視完我哋又你眼望我眼咁。




最後係機場職員驅逐我哋，唔好企係度塞住晒，先可以脫離對峙嘅情況。




兩個人對一堆人無輸到，證明人可能矮啲唔緊，氣場有一米八就得呢句係Work。




啊我同佢都唔算矮，係單薄啲，係體格，人丁我就無資格幫人加添。




仲有我明明係被賦予正宮身份，喺呢班人眼中變二奶，游亦然係咪有出軌前科？