《A》: 5
落機前我當無一回事唔提扮無嘢發生，反而係提出建議嘅人要獲得我嘅回答，我被迫回答—
「我要做一個成功嘅打工仔，你嘅大名會搞到我好似賣身先有能力立足，我哋可以做朋友。」
呢一番說話係咪好型，腳踏實地的我。
我玩得起係可以用時間陪佢一齊去玩人，用朋友嘅身份陪佢度過之後嘅日子，呢個名字其他人包括老闆都得唔到。
佢在意嘅係要搵一個人，唔會背叛佢，呢一點我會做到，因為我都想搵一個唔會離棄我嘅人。
佢一旦搵到會珍惜，即使佢冷淡都唔會見死不救，佢哋而家先知佢嘅重要性太遲嘞，佢情願揀我無名小卒、無能無力，都唔會揀佢哋再做朋友。
佢係一個好人，僅此而已，呢個世界，同我嘅世界上已經好足夠。
「咁不如你供養我？」
經過一程機，我無逆佢意，令佢食得安瞓得落，佢已經同我嘅戒心減到最低，鳩鳩哋嗰一面都開始出嚟。
如果佢同我鍾意嘅人一樣咁容易哄同服侍就好，希望下一個更好，阿瞞。
「你點解會咁依賴我？你仲有冇咁依賴過其他人？」
我好似對住一個小朋友咁，慢慢同佢建立關係，或者老闆唔係想要一個性格好嘅人陪佢，係有耐心嘅人，佢真係太慢熱，真係只適合一個人工作同生活。
佢鳩鳩哋嗰一面如下：
「無啊，你性格好。」
佢嘅笑容明顯帶有狡黠，佢份人少少地泄露情緒都好夠做，好彩佢係淡人，濃人分分鐘不斷輸送情緒，對住佢會仲攰，而家都係用腦啫...
人有腦要用好正常，全新、無皺嘅腦，畀我都唔要。
「即係易恰喇，聽得明喇，你行開喇我要執行李。」
係佢準備沖涼嘅時候，我都返自己間房休息，一出房門就見到企係𨋢門前嘅人，佢係睇住我出房門，咁等於坐實咗我被包養嘅事實。
考驗佢仲熟唔熟悉佢前度份人嘅時候到喇，我都有啲期待佢會點樣去我講廢話。
「有冇時間傾兩句？」
無聊嘅虛榮心作怪，我錯誤咁將自己放係屬於游亦然嘅位置，啱啱先植入嘅骨氣差啲消耗晒。
有咩人可以全無顧忌咁企係游亦然身邊呢？
年紀、閱歷使我唔得，即使係財力、背景相近嘅佢又唔得，好想仲有咩人得。
「你去問返我嘅持有人？」
有佢做我嘅持有人唔失禮，有人撐腰嘅感覺幾好，骨氣咁啱去到唔到腰骨度。
「好少見你呢個職業嘅從業員咁有職業道德。」
成功中年要睇唔起人嘅時候，諷刺感拉滿，本來好眉好貌變到面目可憎，難怪有人睇唔上眼。
以前覺得自己相貌外型中上，有同性別又見多識廣嘅人鑑定我食得起小白臉呢行飯，簡直係一個讚賞！
「咁受人錢財，替人消災好正常，做家人、朋友同情人都做唔到嘅嘢，就要靠我呢啲人～」
我除咗有臉皮厚嘅職業道德，仲會提供為人出氣嘅專業服務，雖然我知道嘅嘢唔多，但以我睇起上嚟面目可憎，應該早有過犯。
呢啲咁要面嘅人肯為咗游亦然嚟低頭，仲要安撫其他人必須遷就游亦然，唔洗諗佢一定係重犯。
「可唔可以幫我安排一個時間同佢食一餐飯。」
可能係佢眼中我太『得寵』，係用『正宮』嘅身份叫囂，完全無做員工、初入行新仔嘅保守態度，令佢向我低頭。
「佢三步不出閨門，我好難…」
初嚐甜頭嘅我完全壓唔住另類權力嘅壓制他人嘅成功感，睇佢笑話嘅諷刺感原封不動，甚至放大畀返佢。
我人微言輕，但佢嘅存在係其他人心目中有重量，而暫時呢一個空間，只有我可以幫到佢接觸到游亦然。
今次都教識咗我，唔好得罪任何一個人，即使地位、能力不亞於自己嘅人都唔可以惡意中傷，隨時有機會可以幫到手。
佢遞咗一間餐廳嘅卡片同佢張卡片畀我：
「呢間餐廳佢由細食到大，佢會想去食，呢排都係佢想聽嘅歌手駐場。
我可以唔出現食飯，就你去廁所嘅時候我出現，唔會賴落你度。」
睇到佢為咗見人可以咁卑微，食咗好多次檸檬？
又一或係，游亦然好抵觸再發生比發脾氣更嚴重嘅事？
我輕嘆一口氣問：
「想復合？」
得呢一樣嘢，我作為感情擋箭牌嘅身份唔可以幫，同埋我會失去游亦然嘅信任，我真心想同游亦然成為朋友，唔想因為呢啲無謂人同小事影響到。
係佢仲未答我之前，順便睇吓佢張卡片，文子淳Leroy，得罪業界大佬...
好彩我都背靠咗一個大佬啫，唔驚。
「想解開誤會。」
係佢下定決心、唔知有冇痛改前非嘅時候，佢真心咗，我覺得佢等咗我呢個機會好耐，佢唔敢敷衍我同游亦然。
「我遲啲覆你。」
我決定為難自己有機會得罪大佬呢件事上努力下，順便試探一下自己大佬條底線係臉定底橫度。
我又返返入去人哋間房度，游亦然啱啱沖完涼係床邊發吽哣，發現佢好鍾意發吽哣，但其他人行過去搵佢嗰陣係好疑惑、甚至唔鍾意佢發吽哣...
以前嘅佢唔會發吽哣，好有動力？
屌你哋班仆街仲敢嫌棄佢...
佢死氣沉沉咁咪係你哋造成，佢唔係受咗打擊，會躺平？
「做咩？」
想幫佢吹乾個頭，濕頭髮版本嘅佢望住我會驚，佢有一種變咗個人嘅感覺，由無人看管之後直接放棄偽裝。
開始明白老闆點解要人全天候睇住佢嘅原因，好似換咗個人，漸漸每分失去咗靈魂。
「頭先因為你係走廊被人為難，返唔到入房。」
我開玩笑咁講返發生咩事，呢個版本嘅佢接受笑話嘅程度好高，比我更無底線。
「人哋為難完你，到你為難我？」
估到條友把口衰我好多，只係平日扮無辜無事發生，如果遇到有事發生，一定係情緒炸彈。
「你咁聰明，你無諗過自行解決？」
我唔避忌提起與我無關嘅事，可能提一提佢覺得煩到人唔好意思，就會揀去處理。
比較傾向認為佢會處理咗啲人，啲人造成事，從根源解決問題。
「我無嘢需要解決，呢啲小麻煩，又唔會搞著我，由佢。」
佢尷尬動搖，係咪之前啲人係老闆嘅旨意下唔敢同佢講？
「唔係，唔想呃你，你唔好嬲。
有人叫我帶你去食飯，我中間去廁所，佢同你傾兩句，我無應承。
你想唔想去？」
我遞出餐廳嘅卡片，佢無拎只係認真望餐廳名，然後擺手要我收起。
明顯睇得出佢由失去靈魂，回憶起過去而喚醒返本尊，百感交集嘅佢，似返個人。
「可以嘅，今次無預約到又會有人請，當我唔知應承佢。」
雖然都覺得佢好容易會應承，但又好似快得滯，佢都等咗好耐？
呢個係機會定落台階，兩者嘅分別會係佢係揀對待定對峙嘅態度面對佢前度。
最後同老闆講返，大家集思廣益應該係我令到佢尷尬覺得係自己嘅問題，但我無推落佢度令佢更為內疚，加上嗰餐廳真係佢嘅兒時回憶，所以就催動到佢改變主意肯去見面溝通。
「你唔係唔鍾意佢哋咩？我自己幫你預約...」
我扮嘢扭屎忽花，當係畀佢機會走數又好、反口又好，到時候見面又鬧唔愉快時，佢可能會瀨我逼佢見面，然後睇我唔順眼炒我...
總之我面面俱圓畀晒機會佢，佢繼續實牙實齒嘅係佢自己揀嘅無得瀨。
「畀個機會你對少我一陣唔高興？」
換佢開我玩笑，但我突然心酸，佢會因為我被煩擾覺得唔好意思所以應承同人見面。
咁之前嘅佢應該係一個更隨和、願意兩脇插刀嘅人，呢一啲人再i都好多朋友，不過就會引嚟好多壞人吸血...
本來覆緊人去食飯，我唔繼續打字。
「唔想你委屈自己。」
好真心，呢幾日我嘅眼界同能力都得到開拓，佢無因為我無經驗就隨便貶低我，反而不斷提點，鼓勵我問問題，仲會解答我無問嘅問題。
佢最多係生活白癡，唔識叫外賣、唔識食魚食骨，唔識煮嘢食其他等等。
但絕對無當人係白癡戲弄，其他同我差唔多嘅人問佢嘢，除咗公司同職業立場唔答得嘅問題，佢通通都會答。
佢係一個對所有人都好嘅人，只要個人無機心想係佢身上得到啲咩，佢就會好好哋對你。
明明好多人都對佢背地裡指指點點，但又要問佢意見同幫手，我覺得佢好受委屈。
「係有啲，最難受唔係而家，已經過去，而家唔畀佢哋痛快嘅係我。」
佢好似知道我終於知道佢嘅委屈，佢解話時輕笑一下轉移視線，畀佢知道我難過令佢會開心，我可以。
希望佢真係唔會畀文子淳唔痛快，狠狠咁虐佢，要佢食飯食到背脊骨落、食唔安瞓唔落，成世行路都仆街！
嬲到『你好』、『Hi』咩都唔打—
『聽晚八點，佢話一齊食飯。』
結果當晚瞓唔落嘅人係我，第二朝差啲仆街嗰個都係我。
我偷偷地用游亦然手機—
『（老闆頭像）：DLLM。』