《艾莉菲斯物語》（異世界穿越）: 第三章、虛無空間
唔知過咗幾耐，我同阿偉、永誠、曉峰醒咗…
但一醒就覺得好怪，我望咗望四周，發現我哋四個唔喺帳篷入面，而係喺一個全白嘅空間！四周係白茫茫嘅一片，無天無地，連影子都無，好似係無邊無際咁。
我心跳即刻快咗，細聲問佢哋：「喂…呢度係咩地方…我哋唔係喺西貢結界咩…」
永誠同曉峰都醒咗，永誠坐起身，望咗望四周，講：「吓…點解咁怪？呢度係邊？我哋啱啱唔係喺帳篷入面訓咩？」曉峰推咗推眼鏡，佢平時好冷靜，但今次都好似有啲緊張，低聲講：「我都唔知…呢度完全無任何特徵，似係一個獨立空間…」
我哋四個企咗起身，望住呢個全白嘅空間，心入面都好不安。
我哋正想再講啲咩，突然前面出現咗一個人影……睇服飾佢係一個......嗯......天使？
佢係睇落大約10歲左右嘅男仔，著住一身天使服飾，白袍上面有啲金色嘅羽毛裝飾，背後仲有對細細嘅翼，頭頭有個浮空嘅光環，佢漂浮喺半空，望住我哋笑。
佢嘅樣好可愛，五官精緻，眼睛大到好似會發光，但佢出現得咁突然，我哋四個都嚇咗一跳。
我即刻縮咗去阿偉後面，細聲講：「你…你係邊個…」阿偉伸手保護住我，但我知道佢都好緊張。
永誠同曉峰都企咗喺我哋前面，曉峰低聲講：「你係咩人……」
嗰個男仔笑咗笑，佢把聲好特別，講嘢好似有回音咁，又好似係直接同你個腦對話咁：「唔使驚唔使驚！我係上帝，歡迎你哋嚟到呢個空間！」
佢講完，攤開雙手，佢對翼輕輕震咗震，身上嘅金色羽毛好似發咗啲光。
我哋四個聽到「上帝」兩個字，即刻呆咗，面面相覷。
永誠話：「吓……上帝？我點睇你最多都係天使啫......上帝點會係一個細路……」
嗰個自稱上帝嘅天使笑咗笑：「我知你哋好多問題，唔使咁緊張，我慢慢同你哋解釋。我係上帝，我鍾意變咩形象都得，只係呢個小天使形象好似親切啲。」
說罷，他的形象立即變成聖經中耶穌的形象，但是卻裸著上身，露出一身健碩的肌肉。
「嗱，你哋睇，我變做肌肉耶穌又得。」
然後他又變成哥哥的形象，連聲線都跟哥哥一樣。
「我變做你阿哥又得，張樂希。」
看到這樣神奇的事，我們也不得不承認眼前的可能真的是那個無所不能的存在。
「我諗都只可以先信你係上帝，咁可唔可以請你解釋下我哋嘅處境。」曉峰語氣也變得恭敬了點。
上帝變回一開始那個天使形象，然後慢慢說：「你哋唔使咁拘謹，照平時咁講嘢就得。嗱，你哋行山嘅時候唔小心入咗西貢結界，呢個結界會連咗過嚟我呢個空間，我會叫呢個空間做虛無。」
「原來西貢真係有結界......咁上帝，我哋點先可以返去？」阿偉問。
上帝停咗一停，又講：「入咗結界，通常都係會死，，但我覺得你哋幾有意思，所以會俾一個考驗你哋。你哋即將會穿越，去一個全新嘅世界，你哋只要喺嗰個世界達成一啲條件，我就會送你哋返去原本嘅世界！」
我哋四個聽到「穿越」兩個字，又呆咗。我細聲講：「穿越？係咪…穿越去另一個世界咁？」
阿偉攬緊我，講：「吓，你講真定假？我哋只係中三學生，點解要穿越？」
永誠都講：「係呀！我哋只係想露營同行山，點解會變成咁？」
曉峰低聲講：「我比較關心，會穿越去點嘅世界，同埋有咩條件先可以返去.....」
上帝漂浮喺半空，笑住講：「你哋唔使咁擔心！你哋可以當今次穿越係一個打機嘅新手模式，我唔會好似一般穿越故事咁咩指引都唔俾你哋，相反我會俾足夠指引你哋，直至你哋可以獨立為止！」佢講完，攤開手，佢嘅白袍閃咗啲金光。
見我哋冇回應，上帝又繼續講：「好啦，我而家由你哋即將去嘅世界開始介紹......你哋會去嘅世界叫做艾莉菲斯，比起你哋身處嘅世界落後，冇咁多科技嘢，最常見嘅交通工具係馬車。個世界呢係類似RPG咁，有冒險者、有魔物、有冒險者公會，你哋可以做成隊伍去接任務討伐魔物，你哋都可以轉職成唔同嘅職業，每個職業都有自己嘅技能。」
「真係好似打機咁喎......咁係咪可以學魔法？」永誠好像有啲興奮咁問。
上帝又繼續講：「艾莉菲斯係有魔法嘅，都有法師系嘅職業，但魔法係非常稀有嘅嘢，所以法師人數都好少，你哋做唔做到法師，就睇你哋嘅天賦啦。」
「咁我哋嘅目標係咩？」曉峰務實咁問。
「艾莉菲斯入面，最有貢獻嘅冒險者係可以成為『聖賢』，而家艾莉菲斯入面已經有七聖賢，你哋至要任何一個人成為『聖賢』，我就會將你哋四個一齊傳送返哂現實世界，同埋我都會確保現實時間唔會過得太耐，減低對你哋喺現實世界嘅影響。至於要點成為『聖賢』，就要靠你哋自己摸索啦。」
「如果我哋喺異世界入面受傷、或者死咗......」我問佢。
「只要你哋成功傳送返嚟，所有喺異世界受到嘅傷都會消失。舉個極端啲嘅例，我當你哋三個受傷變哂植物人，只要樂希你一個達成目標，我都會將你四個毫髮無傷咁傳送返嚟。」
「咁如果死咗......」
「死咗就真係死咗，你現實都會死。」
我哋四個對望一眼，眼神都好驚。
「或者咁諗你哋會開心啲，本身你哋入咗呢個西貢結界，都係九死一生，今次俾你哋穿越，其實係一個生還嘅機會。」上帝笑說。
「咁其實我哋都冇得揀啦。」曉峰無奈咁講。
上帝笑咗笑：「係呀！好啦，咁我哋即刻開始穿越啦，唔使擔心，穿越初期，只要你哋有咩問題，我都會隨時出現指引你哋！」
佢一揮手，佢嘅白袍同翅膀發出好強嘅金光，全白嘅空間突然震咗震，我哋四個覺得眼前一黑，就咁暈咗過去。