《艾莉菲斯物語》（異世界穿越）: 第四章、世界背景

嗨，各位讀者，我係上帝，因為樂希講講吓故事就暈低咗，唯有由我接手講落去，不過我講仲好啦，話哂我都有上帝視角，我講一定最清晰。

佢點解暈咗？你睇落去咪知，都未講到嗰度。

點解我會知道你哋係讀者？因為我係上帝嘛，我可以突破第四面牆都好基本啦。

好啦樂希講到邊到。呀佢講到我將佢地送咗過嚟艾莉菲斯。

我一揮手，將佢哋四個傳送咗過嚟。穿越嘅過程對人類嚟講總係有啲震撼，佢哋嘅意識會短暫失去，我將佢四個傳送咗喺一架馬車上面，然後等佢哋起身。





馬車正喺一條泥路行駛，車輪碌過地面嘅聲音同馬蹄聲混雜，馬車外係一片田野，遠處有幾座低矮嘅山丘同稀疏嘅樹林。呢架馬車係我特意安排嘅，佢哋即將去嘅地方係馬利安城，艾莉菲斯嘅第三大城。

馬車嘅車夫係一個我創造嘅普通NPC，佢唔會同佢哋講任何嘢，只會負責將佢哋送到馬利安城嘅入口。馬車後面嘅空間有啲迫，四個少年坐喺一堆乾草上，然後終於醒返，佢哋嘅表情都都充滿咗不安同疑惑。

我坐到佢哋中間，繼續以小天使嘅形象出現，望住佢哋，笑咗笑。我知道佢哋而家一定有好多問題，唔等佢哋發問，我就開始講嘢。

我對佢哋揮咗揮手，金色嘅羽毛喺白袍上閃咗閃：「歡迎嚟到艾莉菲斯！你哋因為穿越嘅過程對身體有啲衝擊所以暈咗，所以我等咗你哋一陣。」

阿偉攬緊樂希，佢嘅眼神充滿咗保護嘅意味。佢四個入面最聰明嘅曉峰立即追問我：「你話係新手模式，會有指引，咁而家係點？我哋去緊邊度？要做啲咩？關於呢個世界有冇多啲資料。」





我漂浮喺佢哋面前，攤開雙手，白袍嘅金光閃咗閃，笑住講：「好啦好啦，我慢慢講，而家同你哋補充多啲艾莉菲斯嘅設定！首先，你哋而家喺一架馬車後面，呢架馬車會帶你哋去馬利安城。馬利安城係艾莉菲斯嘅第三大城，僅次於王都聖水城同魔法之城迷夢城。馬利安城係一個好熱鬧嘅地方，有好多冒險者、商人同普通居民，治安都好好，又有冒險者公會同埋唔同職業嘅公會，你哋可以喺嗰度開始你哋嘅冒險旅程。」

我停咗一停，望住佢哋嘅反應，佢哋都認真咁聽我講，果然係一班好學生。我繼續講：「艾莉菲斯嘅人類活動範圍，其實只係成個世界嘅十分一左右。呢個世界好大，但好多地方都係未探索嘅，未探索嘅地方多數被魔物佔據，好多都係未知嘅魔物，十分危險。所以人類通常只會喺已知嘅城市同村落活動，例如馬利安城、聖水城同迷夢城呢啲地方。」講完我再變咗張地圖塞俾曉峰。

曉峰點咗點頭，低聲講：「即係話，我哋最好唔好亂咁去未探索嘅地方？」

「聰明！」我笑咗笑，對曉峰比咗個讚，「未探索嘅地方好危險，特別係你哋而家仲係新手，等你哋喺艾莉菲斯適應咗，變強咗，再考慮去冒險啦！」

永誠插嘴講：「咁而家艾莉菲斯係點嘅狀態？有冇戰爭之類嘅？」





我搖咗搖頭：「問得好，永誠。艾莉菲斯理論上係有一個魔王，但魔王已經好多年冇喺人類嘅視線出現，所以而家嘅艾莉菲斯算係一個相當和平嘅狀態。人類同魔物之間偶爾會有小規模嘅衝突，但大規模嘅戰爭已經好耐冇發生過。你哋而家喺馬利安城開始冒險，係好安全嘅。至於政治形勢方面都好穩定，我都講過有王都，所以艾莉菲斯係有國王嘅，所有唔同嘅城，都由國王任命咗城主負責管理，城主想推出任何政策都要國王批准，所以基本上都唔會有城主亂咁嚟。艾莉菲斯有類似你哋世界嘅法律、審判、坐監機制，因為刑罰都幾重、執法都幾嚴，犯罪率好低。」

曉峰打斷我：「呀上帝，唔好意思你可唔可以變支筆俾我記錄低。」

「我最欣賞呢啲認真聽書嘅好學生。呢度當然冇原子筆，得呢啲筆，不過我已經施咗魔法，你支筆永遠都有墨，你放心寫啦。」我隨手一揮，一支羽毛筆喺佢手上出現。

「順帶一提，而家嘅女國王，叫做艾莉絲，佢同時都係現今七聖賢其中一個，職業係聖騎士；至於馬利安城現任城主就係杜林伯爵，佢職業係獵人。」

「仲有咩職業㗎？」樂希問。

「職業系統有少少複雜，仲有分一轉同二轉嘅，不過而家你哋只可以轉做一轉職業，我就講住一轉職業先啦。最常見嘅職業係物理職業，有戰士、騎士、刺客、弓手：戰士就多數負責衝鋒，可以用嘅武器類型好多；騎士多數負責坦傷，拎盾牌同直劍或穿者長槍；刺客就拎短刀負責暗殺；弓手就拎弓箭遠程輸出。另外仲有魔法系同聖職系職業，不過真係好稀有，因為艾莉菲斯絕大部分人係冇魔法天賦，一轉就只有法師同祭司，法師就可以二轉成唔同嘅魔法流派分支；祭司就係你哋打機嘅奶媽，負責補血、上buff、療傷，但就冇乜攻擊手段。」

曉峰將地圖背面寫得密密麻麻，我見狀變咗一本筆記本俾佢，然後將佢寫喺地圖背面嘅字變哂落筆記本到，佢驚訝到嘩咗一聲。

跟住就到阿偉問：「咁我哋去到馬利安城要做啲咩？」





我笑住講：「你哋到咗馬利安城之後，可以按自己喜好，想去唔同嘅一轉職業公會登記轉職先，不過要諗清楚，因為登記咗職業就基本上改唔到。之後，你哋可以去冒險者公會登記，成為正式嘅冒險者，同埋可以四個組咗隊先。公會會有任務俾冒險者隊伍接，多數都係討伐魔物同收集素材呢啲。你哋可以一邊做任務一邊提升自己嘅能力，慢慢摸索點樣成為『聖賢』。我之前講過，只要你哋有任何一個人成為『聖賢』，我會即刻送你哋四個返現實世界！」

我見佢哋暫時冇問題，就變咗一個小布袋，喺我手中出現，發出金光：「呢個小布袋入面有500卡索，卡索係艾莉菲斯嘅主要貨幣。王都聖水城入面多數用另一種貨幣叫『洛尼』，但喺馬利安城用卡索就夠。500卡索夠你哋喺馬利安城乜都唔做都可以用一個月，例如住旅館、買食物同基本裝備都夠用。」

我將小布袋拋畀阿偉，阿偉接住，個袋發出清脆嘅金屬聲，佢低頭望咗望，講：「多謝…….」

「你哋到咗馬利安城之後，可以去旅館租間房先，一次過租一個月應該會平啲，大概20卡索就夠，呀同埋提下你哋，法系職業雖然稀有，但我知道你哋四個之中，應該會有人有魔法天賦，你哋揀職業嘅時候唔好浪費咗！」我好心提一提佢哋。

呢個時候馬車都差唔多到馬利安城。我停咗一停，望住佢哋，笑咗笑：「好啦，我講咗咁多，你哋應該有個大概嘅概念啦！馬車好快會到馬利安城嘅入口，到時你哋就正式開始你哋嘅冒險旅程！我會喺初期繼續幫你哋，如果有咩問題，隨時喺心入面叫我，我會出現嘅！」

講完，我喺半空揮咗揮手，白袍嘅金光閃咗閃，然後慢慢消失喺馬車上方。

馬車繼續行駛，車輪嘅聲音同馬蹄聲喺田野間迴響，馬利安城嘅城門已經喺遠處隱約可見。





四個少年嘅冒險，即將喺艾莉菲斯嘅第三大城正式開始。讀者們，係咪好期待呢？