《艾莉菲斯物語》（異世界穿越）: 第五章、馬利安城
嗨，讀者們，我哋繼續講故事。
馬車終於到咗馬利安城嘅入口，車夫停咗車，示意佢哋四個落車。
我將自己變做隱形，漂浮喺佢哋上方，一路觀察住佢哋嘅反應。
佢哋四個戰戰兢兢咁踏出馬車，馬利安城嘅熱鬧景象即刻映入眼簾。
都講埋俾你哋知下，馬利安城真係好熱鬧！城門入口嘅街道車水馬龍，馬車同行人川流不息，街道兩邊嘅攤檔一個接一個，攤主們熱情咁叫賣，空氣中瀰漫住燒烤食物嘅香味同人群嘅喧鬧聲。雖然人多，但城內嘅氣氛好和平，路人之間偶爾會互相點頭打招呼，衛兵喺街道兩端巡邏，畀人一種好安全嘅感覺。呢啲都係拜艾莉菲斯嚴格嘅法律同和平嘅政治形勢所賜。
街道兩邊嘅攤檔五花八門，有啲賣一串串烤肉，肉串上嘅醬汁喺炭火上滋滋作響，散發出一陣陣香味，但肉嘅種類我就唔講啦，佢哋四個都唔知係咩動物嘅肉，呵呵。有啲攤檔賣飾物，攤主展示咗一堆用魔物素材做嘅項鍊同手環，上面鑲咗五顏六色嘅晶石，喺陽光下閃閃發光。仲有啲攤檔賣書，咩魔物指南呀、馬利安城完全攻略呀、如何烹調史萊姆......都有。
樂希四處張望，佢嘅大眼睛充滿咗好奇，細聲講：「嘩……呢度真係好熱鬧……」阿偉搭住佢膊頭：「係呀，傻豬，感覺好似去咗一個中世紀嘅節日咁。」永誠望住一串烤肉講：「嗰啲肉聞落好香……不如我哋一陣買啲試吓？」曉峰推咗推眼鏡，低聲講：「我哋要先搵地方住，仲要諗吓點樣轉職同開始冒險，唔好急住食嘢先。」
我喺半空望住佢哋，覺得佢哋四個真係幾可愛，呵呵。
佢哋沿住街道行咗一陣，終於喺街道中段搵到咗一間旅館，招牌上寫住「光影旅館」。旅館嘅外觀好溫馨，係一棟三層高嘅木石建築，外牆爬滿咗藤蔓，門口有幾盆鮮花，陽光透過藤蔓灑落喺地上，形成光影交錯嘅圖案，難怪叫光影旅館。門口嘅木牌寫住：「有不同房型，月租有折扣，包每天早餐。」
佢哋四個推門入去，旅館大堂好簡單，但幾乾淨，木地板上有一張舊地毯，櫃檯後面站住一個中年婦人，佢熱情咁打招呼：「歡迎光臨光影旅館！係咪新嚟嘅冒險者？我係光影旅館老闆娘卡娜，你哋係咪要四人房？一晚3卡索，如果租一個月仲有折扣，只收25卡索，仲每日都包埋早餐！」
曉峰同隊友對望一眼，點咗點頭，講：「好，我哋就租一個月。」阿偉從我畀佢嘅小布袋拎出25卡索，畀咗卡娜。卡娜收咗錢，拎出一條鎖匙，笑住講：「你哋間房喺二樓，203號房，跟我上黎啦！」佢哋四個跟住卡娜上咗二樓，沿住一條窄窄嘅走廊行到203號房。
卡娜打開門，房間嘅空間唔算大，但幾溫馨。房內有一張雙人床同兩張單人床，床單係淺藍色，乾乾淨淨，仲有淡淡嘅草木香。房間嘅牆上掛咗一幅畫，畫住一片星空，樂希見到即刻呆咗一呆，估計係諗起咗曦嵐（幅畫係我喺佢哋入去前先加上去嘅，我諗樂希會鍾意，呵呵我人真好，呀唔係，我神真好。」）。房內有一個小木桌同四張木椅，仲有一個衣櫃同一個小窗，窗外可以見到馬利安城嘅街道，熱鬧嘅聲音從窗外傳入來。另外仲有獨立嘅廁所同埋簡單廚房。
卡娜將鎖匙交低畀曉峰，笑住講：「希望你哋住得舒服，有咩需要就同我講！早餐我每朝七點半會準時放喺房門外，但如果十點都未見你哋拎走，我就會收走啦！」講完，佢就笑住走咗。
房門關上後，佢哋四個分咗床位。樂希同阿偉當然係瞓雙人床，永誠同曉峰就一人一張單人床，分別喺雙人床嘅左右。永誠坐喺自己嘅單人床上，伸咗個懶腰，講：「終於有地方住啦！好舒服！」曉峰坐喺小木桌旁，拎出筆記本同地圖，低聲講：「我哋而家要諗吓下一步。上帝話過，要喺艾莉菲斯做冒險者，先要轉職，轉咗職先可以去冒險者公會登記同接任務。所以我哋要諗吓，想做咩職業。」
樂希坐喺雙人床上，細聲講：「我…我未諗到想做咩…」阿偉攬住佢，含情脈脈咁講：「我想做騎士，可以負責坦傷，咁就可以保護你。」永誠就話：「我都諗好咗！我想做戰士，可以帶大家衝鋒殺敵，好型咁，哈哈！」曉峰手放喺下巴思考，然後講：「嗯，你哋嘅選擇都幾好。我覺得一個隊伍最好係唔同嘅職業，咁樣可以互補。我而家考慮做刺客或者弓手，因為呢啲職業都係輸出型，可以喺後排支援。但係…」佢停咗一停，望住隊友，繼續講：「上帝講過，法師同祭司係好稀有嘅職業，而且佢話我哋四個之中應該會有人有魔法天賦。如果真係有魔法天賦嘅話，嗰個人一定要做法系職業，因為太稀有，會對隊伍有好大幫助。」樂希點咗點頭，細聲講：「嗯…如果我有魔法天賦，我都可以試吓做法師…不過我仲未有頭緒…」永誠笑住講：「如果我有魔法天賦，我都想做法師！拎住法杖，丟火球咁，聽落好型！」曉峰笑佢：「你又唔想做戰士喇咩？」
我喺半空望住佢哋，覺得佢哋嘅討論真係幾有趣。曉峰嘅分析好有條理，永誠嘅熱血、阿偉嘅溫柔同樂希嘅可愛都好符合佢哋喺《星空之願》中嘅性格。
你問我點解知道《星空之願》？因為我係上帝囉，我都有睇上一個故，建議未睇嘅讀者去睇一睇先，咁就更加了解佢哋四個啦。
四人喺光影旅館嘅溫馨房間討論未來嘅職業選擇，令到我好期待佢哋嘅冒險旅程！
讀者們，你哋覺得四人入面邊個會有魔法天賦？係咪好期待佢哋喺職業公會嘅測試？下章繼續同你哋講！