《艾莉菲斯物語》（異世界穿越）: 第六章、柔和白光

馬利安城嘅下午依然好熱鬧，光影旅館嘅窗外傳來街道嘅喧囂聲，攤販嘅叫賣聲同馬車嘅車輪聲混雜喺一齊。喺203號房入面，樂希四人喺討論完職業選擇後，決定唔再等，立即出發去搵職業公會。

曉峰拎出咗我之前畀佢嘅地圖，攤開喺小木枱上，指住地圖上一個標記講：「根據地圖，法師職業公會喺馬利安城嘅東南方角落，離我哋而家嘅位置大概要行十五分鐘。我覺得我哋應該先去法師公會試吓有冇魔法天賦，因為如果真係有魔法天賦嘅話，會對隊伍有好大幫助。」阿偉點咗頭，攬住樂希講：「好，聽曉峰嘅，先去法師公會。」樂希細聲講：「嗯…如果我有魔法天賦，我都想試吓…」永誠笑住講：「如果我係法師，我要丟火球！好型！」

佢哋四人離開光影旅館，沿住馬利安城嘅街道向東南方行。曉峰拎住地圖帶路，佢嘅方向感一如既往咁好，沿路仲同隊友講解地圖上嘅其他地標，例如冒險者公會喺城中心、戰士公會喺城北、騎士公會喺城西。馬利安城嘅街道依然好熱鬧，攤販嘅叫賣聲不絕於耳，路人同馬車川流不息，巡邏嘅衛兵唔少，畀人一種好安全嘅感覺。

行咗大約十五分鐘，佢哋終於到咗法師職業公會嘅位置，但眼前嘅景象同馬利安城嘅熱鬧形成咗強烈對比。法師公會係一棟兩層高嘅石樓，建築風格好古老，外牆爬滿咗青苔，門口嘅木牌寫住「法師職業公會」，但個牌好似好耐冇人清理，上面蓋咗一層灰塵。公會門口冷冷清清，連一個人都冇，門前嘅街道亦好少人經過，靜得有啲詭異。喺馬利安城嘅喧囂中，呢度好似一個與世隔絕嘅角落。

樂希四處張望，細聲講：「點解…呢度咁冷清…同馬利安城其他地方差咁遠…」阿偉話：「可能真係因為法師太少啦......」永誠推咗推門，講：「入去睇吓啦！既然嚟咗，就試吓有冇魔法天賦！」曉峰點咗頭，拎住地圖同筆記本，跟住隊友一齊入去。





我喺半空望住佢哋，心諗：緊係冷清啦，艾莉菲斯嘅法師本來就少得可憐，啲法師多數都去哂迷夢城，馬利安城嘅法師公會當然係門可羅雀。法師同祭司喺呢個世界係好稀有嘅存在，普通人一世可能都未必見過一個真正嘅法系職業。

公會大堂好昏暗，陽光透過幾個小窗灑入來，但光線好微弱，牆上嘅燭台點咗幾支蠟燭，勉強照亮咗空間。大堂中央放咗一個紫色嘅水晶球，喺燭光下散發出一陣陣幽幽嘅光芒。水晶球旁邊有一張木凳，上面坐住一個守衛，佢係一個中年男人，穿住簡單嘅皮甲，個樣好似好無聊咁，手肘撐喺膝頭上，托住腮望住水晶球發呆。

大堂嘅角落有一條樓梯通往二樓，但樓梯口用鐵鏈封咗，上面掛咗一塊牌寫住「非公會成員禁止入內」。

我喺半空現身，繼續以小天使形象出現，白袍嘅金色羽毛真係勁靚，我同佢哋講：「歡迎嚟到法師職業公會！點解呢度咁冷清？因為艾莉菲斯嘅法師同祭司好少，馬利安城嘅法師公會更加係幾年都未必有新人加入。你哋見到嘅呢個紫色水晶球，係七聖賢之一嘅莫耶研法嘅神器。莫耶係一個魔導士，which is艾莉菲斯最強嘅法系職業之一，呢個水晶球係佢用來測試魔法天賦嘅工具。普通人掂咗水晶球係0反應呀，但有魔法天賦嘅人掂就會變唔同嘅色。」講完我又隱返形。

佢哋四個聽完我嘅講解，對望咗一眼，眼神中既有期待又有緊張。永誠第一個走上前，笑住講：「我試先！」佢伸手掂咗水晶球，但水晶球完全冇反應，依然係紫色，幽幽咁發光。永誠失望咁講：「吓…點解冇反應…」曉峰推咗推眼鏡，走上前講：「我試吓。」佢掂咗水晶球，依然冇反應，佢低聲講：「睇嚟我都冇魔法天賦…」阿偉放開樂希，走上前試。佢掂咗水晶球，水晶球仲係紫色，毫無變化。阿偉聳咗聳肩，笑住講：「唓，反正我想做騎士。」





樂希有啲緊張咁走上前，佢嘅手微微顫抖，細聲講：「我..…我會唔會都係冇反應…..」佢伸出手，輕輕掂咗水晶球。喺佢手指掂到水晶球嘅一瞬間，水晶球突然發出一陣好柔和嘅白光，白光好似月光咁溫暖，瞬間照亮咗整個大堂。樂希嚇咗一跳，縮咗手，細聲講：「吓…..點解會發光…..」

原本坐喺木凳上嘅守衛即刻企咗起身，佢嘅表情好似見到鬼咁，驚訝咁講：「吓…水晶球發光？！我…...我喺呢度守咗幾年，從來冇見過水晶球有反應！」佢望住樂希，眼神中充滿咗震驚同好奇，然後講：「呢位大人，敢問大名？」

「呀......我？我叫樂希。」樂希被稱呼為呢位大人，有啲唔好意思。

「樂希大人，同埋你嘅朋友請等等！我…我要即刻通報公會！」佢急急忙忙跑上二樓，沿住樓梯消失咗。

我喺半空笑咗笑，心諗：當然會發光啦，樂希有魔法天賦，而且係好罕見嘅聖職系天賦。喺艾莉菲斯，聖職系天賦可能比其他魔法天賦更加稀有，通常只會喺好少數善良嘅人身上出現。樂希嘅白光代表佢有成為祭司嘅潛質，祭司喺艾莉菲斯係好珍貴嘅存在，因為佢哋可以補血、療傷同上buff，對任何冒險隊伍都係無可替代嘅支援。





阿偉攬住樂希，驚喜咁講：「傻豬！你真係有魔法天賦！仲係白光，好似好勁！」永誠亦好興奮咁講：「樂希，啱啱個大叔仲叫你大人，好型呀！」曉峰推咗推眼鏡，低聲講：「睇佢反應，我估呢度嘅人都對法系職業好敬畏？」

「係，叻仔，你冇估錯，因為太稀有，一般人都對法系職業好敬畏，特別係樂希你即將成為嘅聖職；就算係其他法系職業，一般都好尊敬聖職.....不過你冇辦法隱藏身份，你到時就知點解。」我忍唔住搭咗句嘴。

喺呢個時候，樓梯傳來腳步聲，一個年輕女人從二樓走咗落嚟。佢著住一條藍色長袍，袍上繡咗一啲銀色嘅符文，長袍隨住佢嘅步伐微微飄動，佢嘅頭髮係深紫色，扎成一個高馬尾，個樣好冷靜，但眼神中帶有一絲好奇。佢一見到水晶球嘅白光，即刻停咗腳步，望住樂希四人。

佢自我介紹講：「我叫寧寧，係今日法師公會當值嘅人。我嘅職業係元素使，專修水系魔法。守衛話水晶球有反應，我一開始仲唔信…」佢走近水晶球，細心觀察咗一陣，然後望住樂希講：「你就係樂希大人？你嘅白光好特別…喺艾莉菲斯，聖職系天賦好稀有，馬利安城已經好多年冇出現過…..除咗我自己掂嗰次......我從未見過水晶球再發光，仲要係代表聖職嘅白光。」

寧寧停咗一停，繼續講：「樂希大人，我想帶你去聖殿，聖殿係祭司嘅專屬地點，入面有更詳細嘅測試，可以確認你嘅天賦同幫你正式轉職。聖殿喺法師公會附近，行大概五分鐘路程就到。」佢望住阿偉、永誠同曉峰，講：「但聖殿唔係個個入得，只有聖職系嘅人同公會某啲成員先可以入去，你哋三位要喺聖殿門口等一陣。」

阿偉攬住樂希，有啲擔心咁講：「吓，我哋唔可以一齊入去？咁邊個保護我樂希大人？」寧寧笑住講：「唔使擔心，聖殿好安全，入面只有祭司同聖職系嘅學徒。我會全程陪住樂希大人，處理完啲程序就會出返嚟。」樂希細聲講：「阿偉……唔使擔心..….」阿偉雖然仲係有啲唔放心，但見樂希點咗頭，最終都放開咗手。

寧寧帶住樂希一行人離開法師公會，沿住街道向聖殿嘅方向行去，佢哋要行大約五分鐘路程。阿偉、永誠同曉峰跟喺後面，喺聖殿門口停咗下來。聖殿嘅外觀好莊嚴，係一棟白色石樓，門前有兩根高大嘅石柱，柱上雕刻咗一啲符文，雖然冇寫住係聖殿，但一睇就知好神聖。門口有兩個守衛，手持長矛，表情嚴肅。

寧寧同守衛點咗頭，然後帶住樂希入咗聖殿。阿偉、永誠同曉峰留喺門口等候。阿偉坐喺聖殿門前嘅石階上，低聲講：「寧寧會唔會係咩隱藏大魔王嚟.....樂希會唔會有事......」永誠拍咗拍佢膊頭，笑住講：「你唔好FF咁多啦！樂希可以做聖職，係我哋隊伍嘅希望！」曉峰拎出筆記本，低聲講：「嗯，同埋上帝都冇阻止，樂希唔會有危險，我哋等佢出返嚟嘅時間，可以諗吓下一步。既然樂希有聖職系天賦，應該會轉職做祭司，我哋要配合佢嘅職業，選擇最適合嘅隊伍配置……」





我喺半空現身，同佢哋三個講：「我建議你哋都去轉職先，樂希冇咁快出到嚟，佢轉完職，入面會隨即教佢祭司嘅基本法術，就算係樂希咁有天賦，我諗都要幾個鐘，你哋物理系職業轉職好快好簡單，去完再返嚟等樂希啦，唔好浪費時間。同埋我係上帝，我可以無限分身，我會睇住佢，如果佢早咗出嚟我咪帶佢搵你哋囉。」

「總覺得我哋物理系職業有啲被睇唔起咁......」永誠不滿咁細聲講。

「冇計，呢度係艾莉菲斯......哈哈。」我趕咗佢哋去轉職，然後飛入聖殿睇住樂希，再分身跟住佢哋。

我真係好貼心，費事讀者你哋覺得拖劇情啦，佢哋喺到等咁浪費時間。好啦下章繼續~