《艾莉菲斯物語》（異世界穿越）: 第七章、聖殿轉職
寧寧帶住樂希進入聖殿嘅一刻，我隱形漂浮喺佢哋上方，靜靜觀察。
聖殿嘅大門緩緩關上，隔絕咗馬利安城嘅喧囂聲，入面嘅氣氛好莊嚴，好似連空氣都帶有一種神聖嘅感覺。聖殿嘅正殿係一個好宏偉嘅空間，高大嘅白色石柱撐起咗拱形天花板，天花板上雕刻咗一幅巨大嘅壁畫，畫住一個女神，女神穿住白色長袍，手持一盞金色聖杯，佢嘅長髮喺壁畫中好似隨風飄動，散發出一種溫柔而神聖嘅氣質。
我喺度同讀者科普下啦，個女神係艾莉菲斯唯一正統信仰，佢係加爾安娜斯女神，傳說係佢創造艾莉菲斯，同埋祝福咗呢個世界，令萬物都有咗生機。(當然啦，艾莉菲斯其實係我創造嘅，不過唔緊要，加爾安娜斯都係我創造嘅。)
正殿嘅地面係白色大理石，上面刻咗一啲細小嘅符文，符文喺光線下散發出一陣陣微弱嘅金光。殿中央有一個圓形祭壇，祭壇上放咗一個金色嘅聖杯，聖杯散發出一陣溫暖嘅光芒，照亮咗整個正殿。正殿嘅兩側有幾排長椅，長椅上坐咗幾個祭司同聖職系學徒，佢哋都低頭祈禱，氣氛好安靜，只有低聲嘅禱告聲喺殿內迴盪。
寧寧帶住樂希沿住正殿嘅中央通道行去，樂希嘅大眼睛四處張望，細聲同寧寧講：「呢度…好莊嚴…我好似感受到一股好溫暖嘅力量…」寧寧笑咗笑，低聲講：「樂希大人，呢度係聖殿嘅正殿，係聖職系嘅核心地點。多得你，我今日都係第一次可以入嚟，會長甘霖大人喺正殿等緊你，你會同佢見面。」
喺正殿嘅祭壇前，有一個老人企咗喺到，佢係七聖賢之一，聖職系公會嘅會長甘霖。甘霖著住一條白色長袍，袍上繡咗金色嘅符文，佢嘅頭髮同長鬚都係銀白色，長長咁垂落喺胸前，佢嘅臉上滿係歲月嘅痕跡，但眼神好溫和，散發出一種好善祥嘅氣質。佢拎住一根木杖，杖頭鑲咗一顆白色寶石，寶石喺聖杯嘅光芒下微微發光。
甘霖見到寧寧同樂希走近，微笑住用一把溫和嘅聲音講：「寧寧，呢位就係樂希？老夫已經聽到守衛嘅通報，水晶球發出白光，已經好多年冇見過咁純粹嘅天賦。」寧寧點咗頭，低聲講：「係嘅，甘霖大人，佢係我喺法師公會見到嘅第一個聖職系新人。」
樂希有啲緊張咁低咗頭，細聲講：「甘霖……大人……我……我係樂希…..」甘霖笑咗笑，走近樂希，佢嘅步伐好緩慢，但每一步都好似帶有一種神聖嘅力量。佢伸出一隻佈滿皺紋嘅手，輕輕放喺樂希嘅頭上，講：「唔使緊張，樂希。老夫會幫你完成轉職。」
甘霖合上眼，佢嘅手掌開始散發出一陣溫暖嘅金光，金光慢慢擴散，將樂希整個包圍起來。樂希覺得一股好溫暖嘅力量流入佢嘅身體，佢嘅心好似被溫柔地撫慰，緊張嘅情緒即刻消失咗，取而代之係一種平靜同安心嘅感覺。佢嘅大眼睛望住甘霖，低聲講：「呢個……係咩……好溫暖……」
甘霖睜開眼，笑住講：「樂希，老夫幫你開啟咗天賦。你而家已經正式轉職成為祭司，聖職系嘅力量會隨住你嘅成長而增強。」樂希眨咗眨眼，細聲講：「吓，咁快？我……我唔係要試驗之類嘅咩？」
甘霖哈哈笑咗起來，佢嘅笑聲好溫和：「試驗？樂希，老夫一眼就可以睇穿人嘅內心本質。你嘅內心純潔無暇，充滿咗善良同溫柔，聖職系嘅力量最鍾意你咁嘅人，唔需要試驗。老夫見過唔少聖職系嘅新人，但你嘅天賦係老夫見過最純粹嘅一個。樂希，努力行善，用你嘅力量幫助更多人，願加爾安娜斯大人與你同在。」
樂希聽完，臉紅咗紅，低聲講：「多謝……甘霖大人...…我會努力嘅...…」甘霖點咗頭，講：「好，寧寧，你帶樂希去訓練場搵溫妮啦。老夫會喺正殿祈禱，祝福你嘅旅程，樂希。」寧寧喺一邊回應：「知道，甘霖大人。樂希大人，你跟我過嚟訓練場啦，溫妮會教你聖職系嘅基本法術。」
寧寧同樂希向甘霖行咗一禮，然後寧寧帶住樂希離開正殿，沿住一條走廊行去聖殿嘅訓練場，貼心嘅甘霖知道寧寧其實都唔識路，仲派咗一個學徒帶住佢哋。
訓練場係一個露天嘅庭院，四周圍繞住白色石牆，牆上爬滿咗藤蔓，庭院中央有一片草地，草地上畫咗一啲符文陣，陣中間有一個木製假人，用來練法術。訓練場嘅氣氛好寧靜，只有微風吹過嘅聲音同遠處正殿傳來嘅誦經聲。
喺訓練場入口，站住一個中年女人，佢係訓練導師溫妮，職業係神官。溫妮著住一條白色長袍，袍上有銀色符文，佢嘅頭髮係啡色，扎成一個低馬尾，佢嘅樣子好和藹，但一見到樂希同寧寧，佢即刻變得好興奮，熱情咁跑過來，攬住樂希，笑住講：「新人！新人！好可愛嘅新人！你就係樂希大人？我係神官溫妮，負責訓練新人！好耐冇新人啦，我好開心！樂希，你真係好可愛！好似個小天使咁！」
樂希被溫妮嘅熱情嚇咗一跳，臉紅到耳根，細聲講：「溫妮...…大人……多謝……但唔好咁啦......」溫妮完全冇理會樂希嘅靦腆，繼續攬住佢，笑住講：「點會唔可愛！你係我見過最可愛嘅新人！你叫我溫妮得㗎啦！我哋聖職系終於有新血啦！我會好好教你！樂希，你會好快學識聖職系嘅法術！」
寧寧喺一邊忍唔住笑咗出來，講：「溫妮，冷靜少少啦！樂希大人會唔習慣…」溫妮同寧寧係朋友，佢笑住講：「寧寧，我點冷靜得落！我哋聖職系好多年冇新人，仲要係咁可愛嘅小朋友！我開心到想喊！」寧寧無奈咁搖頭「好啦好啦，你教佢法術時唔好太激動，樂希大人會學得好快嘅。」
「但我唔係小朋友呀.....」樂希無奈咁講。溫妮完全冇理佢。
之後溫妮就開始教樂希，教嘅過程我都覺得悶，同埋溫妮實在太多嘢講......所以我就唔講啦~我任性我驕傲！總知，簡單總結，溫妮驚嘆樂希嘅天賦，樂希喺兩個鐘入面，已經學哂四種祭司要識嘅基本法術，包括治癒術、強化術、照明術同埋聖光彈，仲額外學多咗招安撫術。至於每招有咩用，到時佢哋實戰你哋就知，其實都係字面意思。
至於阿偉、永誠、曉峰，都成功轉職，阿偉做咗騎士、永誠做咗戰士，曉峰本來想做弓手，因為可以遠程輸出，但佢點會識用弓呢，所以做咗刺客。過程我都係唔講啦，好鬼悶。