《艾莉菲斯物語》（異世界穿越）: 第九章、死靈法師

露珠餐廳嘅晚宴結束後，樂希、阿偉、永誠同曉峰沿住馬利安城嘅街道返光影旅館。

夜晚嘅馬利安城依然有唔少行人，街道兩旁嘅燈籠同店舖嘅燈火將城內照得好溫暖。樂希身上嘅白光喺夜晚顯得更加耀眼，路過嘅市民一見到佢，又係停下腳步敬禮、甚至跪地祈禱，樂希好唔習慣咁低住頭急步行。

佢哋行咗幾分鐘，終於返到光影旅館。旅館老闆娘卡娜一見到佢哋入門，原本笑住想同佢哋打招呼，但一見到樂希身上嘅白光，佢即刻露出驚喜嘅表情，深深鞠咗一躬，講：「聖職大人！歡迎您返來！哦……原來你轉咗職做祭師！之前畀您住普通房間真係太失禮！請您同您嘅同伴跟我來，我即刻安排最高級嘅豪華套房畀您哋！」

樂希話：「唔使咁麻煩啦……我哋住原本嘅房間就夠……」但卡娜即刻搖頭，講：「聖職大人！您嘅身份喺艾莉菲斯好尊貴，點可以住普通房間！我堅持要換最高級嘅豪華套房畀您哋，唔使加錢！請跟我來！」佢嘅語氣好堅定，樂希佢哋完全唔知點樣拒絕，只好同隊友對望咗一眼，跟住卡娜上樓。

卡娜帶住佢哋去咗二樓嘅201號房，安排其他員工將佢哋嘅行李搬哂過嚟。推開門嘅一刻，四人都呆咗一呆。201號房係一間豪華套房，空間比原本嘅203號房大咗一倍，房內嘅地板鋪咗一張厚厚嘅紅色地毯，中央有一張超大嘅雙人床，床單係白色絲綢，上面繡咗金色嘅花紋，仲有兩張單人床，床頭櫃上放咗一盞精緻嘅燈籠。房間嘅牆上掛咗幾幅畫，分別畫住馬利安城、迷夢城同聖水城，仲有一個大窗戶，可以見到馬利安城嘅夜景。房內有一張圓形木桌同四張軟椅，仲有一個獨立嘅浴室同一個小廚房，浴室入面甚至有個小型浴缸。





卡娜笑住講：「聖職大人，呢間201號房係我哋旅館最高級嘅套房，希望您同您嘅同伴住得舒服！如果有咩需要，隨時搵我！」講完，佢又鞠咗一躬，笑住離開咗房間。

四人坐喺房間嘅圓形木桌旁，喺溫暖嘅燈光下開始傾計。樂希細聲講：「我真係好唔慣咁受尊敬……喺聖殿已經好多人叫我大人……喺街上又有好多市民敬禮，連餐廳同旅館都免費招待我哋。我覺得，我只係普通人……」佢嘅語氣中帶有一絲不安，佢嘅大眼睛望住隊友，顯得好無助。

阿偉攬住樂希，低聲講：「傻豬，你唔係普通人，你係好稀有嘅祭司，大家都好尊敬你，因為你嘅力量可以幫好多人。你唔使覺得唔好意思，慢慢習慣就得，我會一直喺你身邊。」

永誠笑住講：「係呀！樂希，我哋會幫你適應，你唔使怕！」

曉峰點咗頭，低聲講：「喺艾莉菲斯，聖職系嘅身份係一種榮譽，但亦係一種責任。我哋會一齊面對。」





樂希聽完隊友嘅話，終於露出咗一個細小嘅笑容：「多謝你哋。有你哋喺我身邊，我覺得安心好多。我會努力適應，同你哋一齊冒險。」

四人喺豪華套房嘅溫暖燈光下傾咗一陣，然後各自休息，樂希喺雙人床上攬住阿偉，訓得好冧，準備迎接第二朝嘅冒險。

第二朝，樂希四人喺清晨嘅第一道光芒中起身。卡娜好準時咁喺七點半將早餐送到房門口，佢今次準備咗好豐富嘅早餐：一籃熱氣騰騰嘅麵包、一盤烤地龍肉腸、一罐蜂蜜、一盤煎卡奇獸蛋、一壺甘心花茶同四杯布諾奇歐奶。

四人坐喺圓形木桌上享用早餐，食完之後，四人收拾好裝備，出發去冒險者公會。冒險者公會位於馬利安城嘅中心，佢哋沿住街道行咗十幾分鐘，終於到咗公會嘅大門。

冒險者公會係一棟三層高嘅石樓，門口嘅木牌寫住「馬利安城冒險者公會」，大門兩側有兩個衛兵守住，門前嘅廣場好熱鬧，唔少冒險者喺度交談或準備出發。大堂入面更加熱鬧，牆上貼滿咗任務告示，櫃檯後面有幾個職員忙碌咁處理登記，冒險者嘅笑聲同交談聲充滿咗空間。





四人一入公會，樂希身上嘅白光即刻吸引咗所有人嘅注意，公會大堂嘅冒險者都停下咗交談，轉頭望住佢哋，眼神中充滿咗驚訝同敬畏。有啲冒險者低聲講：「聖職大人……」「係祭司！好稀有…」仲有啲冒險者直接走過來，向樂希敬禮，講：「聖職大人！您係咪新加入嘅冒險者？我哋隊伍好需要祭司！如果您有興趣，請加入我哋！」「聖職大人！我哋隊伍可以畀您好多報酬！回復藥水好貴，有您喺隊入面會安全好多！」樂希被一堆邀請嚇咗一跳，細聲婉拒：「唔……多謝你哋……但我已經有隊伍...…」

佢哋四人行到櫃檯前，職員一見到樂希嘅白光，亦露出驚喜嘅表情，講：「聖職大人！歡迎您同您嘅同伴嚟到馬利安城冒險者公會！請問您係咪想登記隊伍？」曉峰點頭：「係，我哋想登記隊伍同接任務。」職員笑住講：「當然可以！請畀我哋隊名同隊長嘅名字。」樂希細聲講：「隊名，不如叫星光小隊。我覺得，好似好有希望咁……」阿偉笑住講：「好呀，星光小隊好聽！就用呢個名！」永誠同曉峰都點頭表示贊成。

職員笑住講：「星光小隊，好嘅名字！咁隊長係咪聖職大人您？」樂希即刻搖頭，細聲講：「唔係我……我提議永誠做隊長，因為永誠成日都係帶隊嗰個……」永誠話：「樂希，既然你咁講，我就做啦！我會帶好星光小隊！」

職員喺登記簿上寫咗「星光小隊」同「隊長：永誠（騎士），隊員：樂希（祭師）、正偉（戰士）、曉峰（刺客）」，然後笑住講：「星光小隊正式登記完成！請問您哋想接咩任務？」

曉峰話：「我哋係新人，想接啲簡單嘅任務試吓。」職員點咗頭，從牆上嘅告示板拎咗一張任務單：「呢個係討伐史萊姆嘅任務，喺馬利安城出面嘅波利波利大平原有啲史萊姆破壞農田，報酬係每隻史萊姆10卡索，任務要求討伐10隻史萊姆。史萊姆係比較弱嘅魔物，對新人嚟講係一個相對簡單嘅任務。」

永誠笑住講：「好呀，就討伐史萊姆！聽落好簡單！我會帶隊衝鋒！」其他人都同意，終是星光小隊接咗呢個任務。

職員提醒佢哋：「雖然史萊姆係算弱小嘅魔物，但千祈唔好調以輕心，因為佢哋好有群體意識，見到同伴被攻擊就會蜂涌而上。同埋波利波利大平原好大，有好多唔同嘅魔物，要小心唔好離開城門太遠，因為遠嘅地方就會有更多更強嘅魔物。」

喺佢哋準備離開冒險者公會嘅時候，喺門口遇到咗一個睇落10歲左右嘅男孩，佢係死靈法師阿夢，佢身邊跟住一隻骷髏，骷髏幫佢拎住一把魔杖，魔杖散發住不祥嘅紫光。阿夢著住一條黑色長袍，袍上繡咗一啲紫色符文，佢有一頭灰白色短髮，眼睛係深紫色，佢嘅氣息好沉穩，雖然五官精緻得得意意咁，但臉上完全冇笑容，散發出一股生人勿近嘅氣場，同埋唔屬於佢呢個年齡嘅成熟。





公會嘅冒險者一見到阿夢，即刻走遠咗，眼神中充滿咗恐懼，議論紛紛：「係嗰個死靈法師，好可怕…….」「竟然見到阿夢大人...…佢嘅力量好詭異，我哋走遠啲...…」

但星光小隊唔知阿夢嘅身份，冇避開佢，樂希見到其他人避開佢，甚至主動同阿夢打招呼，佢話：「你好……我叫樂希......你係咪冒險者？」

阿夢嘅深紫色眼睛望住樂希，見到佢身上嘅白光，佢嘅眼神中閃過一絲驚喜，但佢嘅表情依然好冷靜：「我係阿夢，死靈法師，你係祭司？從來冇見過新人祭司......」佢伸出一隻細小嘅手，同樂希握咗手，佢嘅手好冰冷，但樂希完全冇避開，細聲講：「嗯...…我琴日先轉職做祭司...…」阿夢嘅深紫色眼睛直望住樂希：「你嘅白光好溫暖，希望你嘅冒險順利，有緣再見。」講完，阿夢同佢嘅骷髏一齊走入公會，佢嘅背影散發出一種孤獨嘅氣息。

星光小隊離開冒險者公會，沿住街道向馬利安城外嘅波利波利大平原出發，準備完成佢哋嘅第一個任務——討伐史萊姆。

去到城門附近少啲人嘅角落，我喺半空現身，同佢哋講：「星光小隊，我同你哋講解吓阿夢嘅身份！死靈法師係極稀有嘅二轉職業，喺艾莉菲斯嘅歷史上，只有三名死靈法師嘅記錄。第一個係傳說中加爾安娜絲女神嘅信徒，半神古力格斯，佢係艾莉菲斯嘅傳奇人物。第二個係半精靈杜爾，但佢已經失蹤咗近十年，外界都覺得佢可能已經死咗。而第三個，就係阿夢。阿夢雖然只有10歲，但佢嘅天賦好可怕，已經幾乎完全掌握咗死靈力量，艾莉菲斯嘅人都好害怕死靈嘅力量，所以見到佢會避開。仲有一件事，阿夢因為一啲原因同七聖賢之一嘅狂戰士亞當交過手，結果打成平手，亞當戰後對阿夢嘅評價係......」

「係咩？點解你講講下唔講？」樂希嘟起小嘴，不滿咁望住我。

「因為我知你會嘟嘴催促我講，好得意，哈哈。好啦唔玩你啦，亞當同所有人講，自己已經用盡全力戰鬥，但佢感覺到阿夢係有留手，佢話如果阿夢全力戰鬥，佢大概死咗五次。」





「吓，呢個亞當係七聖賢應該實力都唔弱......」曉峰難以置信咁講。

「冇錯，亞當曾經單挑傳說級魔物冥燈龍，仲斬咗佢個龍頭落嚟。」

佢哋都嚇到呆咗，然後我就消失咗了。

佢哋四人喺市民嘅注視下，走出了城門，向波利波利大平原前進。

呀，我呢章唔小心講長咗。下章先繼續。Bye讀者們。