《艾莉菲斯物語》（異世界穿越）: 第十章、平原危機
嗨讀者們，Welcome back.
星光小隊離開馬利安城後，沿住一條小路向波利波利大平原前進。波利波利大平原位於馬利安城西面，行咗大約十分鐘，佢哋終於到咗平原嘅邊緣。
平原好廣闊，綠草如茵，遠處有幾座低矮嘅山丘，微風吹過，草浪翻滾，陽光灑落喺草地上，顯得好寧靜。
但我知道，呢個地方唔係表面咁和平，特別係對新手冒險者嚟講，隨時會有危險。
佢哋行入平原唔遠，就見到咗幾隻史萊姆喺草地上蠕動。史萊姆係一團綠色嘅膠狀生物，體型大約同一個籃球差不多，表面有啲黏液滴落，移動時發出「咕嘰咕嘰」嘅聲音。永誠即刻衝上前，大喊：「我嚟啦！」佢一劍劈落一隻史萊姆，史萊姆被劈成兩半，但隨即又合併起來，發出一陣尖銳嘅叫聲。
附近嘅另外幾隻史萊姆即刻被驚動，全部向星光小隊衝過來。阿偉即刻舉起盾牌，擋喺隊友前面，講：「我嚟坦傷！你哋攻擊！」
永誠繼續用大劍劈砍，但史萊姆嘅身體好似完全唔怕物理攻擊，每次劈開都會即刻合併。曉峰喺後排用短刀潛行，試圖刺向史萊姆嘅核心，但史萊姆嘅黏液好滑，佢嘅短刀好難命中核心。
史萊姆開始反擊，佢哋噴出黏液攻擊，黏液好似酸液咁，燒傷永誠嘅手臂，永誠痛得大叫：「好痛！點解咁難打！」樂希見到隊友受傷，就話：「我來幫你哋！」佢舉起手，施展治癒術，一陣溫暖嘅白光包圍住永誠，永誠手臂嘅燒傷即刻癒合，佢驚喜咁講：「樂希，你好勁！傷口即刻好返！」樂希又施展強化術，幫阿偉提升防禦，阿偉嘅盾牌好似多咗一層保護，擋住史萊姆嘅黏液攻擊。
但史萊姆嘅數量太多，已經有5至6隻圍住咗佢哋，佢哋嘅攻擊好密集，星光小隊完全唔熟悉戰鬥，顯得好吃力。阿偉一邊擋傷一邊講：「點解咁難打！我哋要點樣先可以殺咗佢哋！」
樂希試用聖光彈攻擊，佢舉起手，一顆白色光球射向一隻史萊姆，但光球擊中史萊姆後，完全冇對佢造成傷害，史萊姆依然蠕動咁攻擊。樂希細聲講：「吓……明明打中咗……」
我喺半空現身，笑住講：「樂希，聖光彈只係傷害到不死生物，例如骷髏或者亡靈之類！史萊姆係元素系魔物，聖光彈對佢哋冇用！你哋要直接攻擊史萊姆嘅核心，先可以殺咗佢哋！」
樂希話：「我明喇……咁我專心幫隊友恢復...…」喺樂希嘅支援下，星光小隊幾經辛苦，終於擊敗咗圍攻佢哋嘅5-6隻史萊姆。
佢哋慢慢熟悉戰鬥，永誠同曉峰好唔容易刺中史萊姆嘅核心，每擊敗一隻史萊姆，佢哋就收集咗一個綠色嘅核心，然後佢哋又搵啲落單嘅史萊姆圍攻，最後總共收集咗10個核心，完成咗任務要求。
但四人都已經傷痕纍纍，永誠同曉峰嘅手臂同腿部有燒傷，阿偉嘅盾牌被黏液腐蝕咗一角，樂希一直用治癒術幫隊友恢復，但佢嘅魔力消耗好大，顯得好疲憊。
曉峰話：「任務完成啦，我哋快啲返城啦……」阿偉點頭講：「好，走啦！好攰啦......」樂希細聲講：「我會幫你哋恢復咗先。」佢又施展咗一次治癒術，幫隊友癒合傷口，但佢嘅臉色顯得好蒼白，魔力消耗咗好多。
佢哋準備離開波利波利大平原，但喺走嘅時候，突然聽到一陣低吼聲，一隻火靈狐從草叢中撲出！火靈狐係一隻中階魔物，體型同普通狐狸差不多，但全身毛髮好似火焰咁燃燒，散發出熾熱嘅氣息，佢嘅眼睛係紅色，目露兇光。
火靈狐一見到星光小隊，即刻張開嘴，一個火球向佢哋襲來！阿偉即刻舉起盾牌，擋住火球，但火球嘅熱力燒咗佢嘅手臂，佢痛得大叫：「嘩，好熱！坦唔住。」
我喺半空現身，大喊：「快啲走！呢隻係中階魔物火靈狐！物理攻擊對佢無效，換言之，你哋而家冇任何有效攻擊手段對付佢！火靈狐係波利波利大平原上其中一種最致命嘅魔物，因為好少法師，冇乜人可以傷害到佢！跑呀！」
星光小隊即刻轉身逃跑，火靈狐喺後面追，佢又噴出幾個火球，點燃咗附近嘅草地，星光小隊只好一直跑。
我喺半空跟住佢哋，一邊講：「跑快啲呀！火靈狐嘅火球攻擊好強，如果被擊中，可能會即刻燒傷甚至致命！但火球只係佢最基本嘅招式，佢仲有勁啲嘅招......」佢哋四人一直跑，慌不擇路下被逼向西邊逃走，遠離咗東面嘅馬利安城。
火靈狐追咗一陣後，終於停咗下來，返咗草叢，但星光小隊已經唔知去咗邊。佢哋氣喘吁吁咁停低，曉峰話：「我哋好似係向住城嘅相反方向逃走...…」阿偉低聲講：「我哋要搵路返去...…」
但喺呢個時候，一波未平一波又起，佢哋突然聽到一陣低吼聲，幾隻哥布林小兵從附近嘅樹林衝出！星光小隊唔小心走入咗哥布林嘅營地範圍，哥布林小兵係綠色皮膚嘅小型魔物，佢哋拎住生鏽嘅短劍同木棒，眼神兇惡，向星光小隊進攻。
阿偉即刻舉起盾牌，擋住一隻哥布林嘅短劍，講：「又嚟......」永誠用大劍劈向一隻哥布林，但哥布林嘅動作好敏捷，輕易避開咗。曉峰用短刀潛行，刺中一隻哥布林嘅手臂，但傷害不大。哥布林嘅數量太多，已經有5隻圍住咗佢哋。
我喺半空叫佢哋：「哥布林都係中階魔物，而且團體性好強！我建議你哋逃走！一陣其他哥布林會衝過來幫手，情況會更加危險！」
星光小隊一邊打一邊退，但哥布林嘅攻擊好兇猛，阿偉嘅手臂被短劍劃傷，永誠嘅腿部被木棒打中，曉峰嘅潛行被哥布林發現，差啲被圍攻。樂希一直用治癒術幫隊友恢復，但傷口太多，佢補血都補唔切，再加上魔力已幾乎見底，佢話：「死啦...…我補唔切，同埋好似冇魔力啦...…」
星光小隊傷痕纍纍，且戰且退，但哥布林嘅追擊好緊，佢哋完全擺脫唔到，情況好危險。
我喺半空望住佢哋，差啲諗住出手幫佢哋㗎喇，因為我應承過佢哋冒險初期會提供協助嘛，佢哋咁快死咗點算，個故事咪好快完。
呀，但係，有個冒險者咁啱經過見到佢哋，佢向哥布林群射出一片箭雨，哥布林連忙向後走避，星光小隊都趁機成功拉開距離。
之後......下章再講~