《艾莉菲斯物語》（異世界穿越）: 第十一章、孤單弓手

上章講到星光小隊喺波利波利大平原同史萊姆戰鬥，幾經辛苦完成任務，但隨後遇到火靈狐同哥布林嘅襲擊，陷入危機，最後有一位冒險者射出一片箭雨幫佢哋脫困。呢一章，我會帶你哋見見呢位救星，並講述佢同星光小隊嘅互動。準備好未？一齊嚟睇吓！

星光小隊喺波利波利大平原被哥布林小兵圍攻，傷痕纍纍，樂希嘅魔力幾乎耗盡，補血都補唔切，情況好危險。喺哥布林即將圍住佢哋嘅一刻，一片箭雨從樹林中射出，箭矢精準咁擊中哥布林嘅手臂同腿部，哥布林發出尖叫，連忙向後走避，星光小隊趁機拉開距離，終於脫離咗哥布林嘅追擊。

四人氣喘吁吁咁停低，轉頭望向箭雨嘅方向，一個少女從樹林中走出。少女睇落大約15、16歲，同星光小隊差唔多年紀，佢有一頭金色長髮，長髮散落及肩，眼睛係藍色，充滿咗活力，佢穿住一條綠色短袍，手持一把長弓，腰上綁住一個裝滿箭矢嘅箭筒，佢嘅樣子好清爽，但眼神中帶有一絲憂傷。

少女見到星光小隊，特別係樂希身上嘅白光，佢即刻露出尊敬嘅表情，深深鞠咗一躬，講：「聖職大人！我係弓手洛希娜，喺附近採集草藥整藥水，見到您同您嘅同伴俾哥布林追，就出手幫忙！能夠幫到聖職大人係我嘅榮幸！」

樂希臉紅住講：「洛希娜...…多謝你救我哋。但唔使叫我聖職大人，我係樂希，你救咗我哋，我先要多謝你。」阿偉笑住講：「洛希娜，多謝你！我係阿偉，如果唔係你，我哋可能走唔甩！」永誠笑住講：「你嘅箭術好勁！我係永誠，星光小隊嘅隊長！」曉峰點咗頭，低聲講：「多謝你，我係曉峰。請問我哋點樣返馬利安城？」





洛希娜笑咗笑，講：「我咁啱都要返去啦，我帶你哋返馬利安城啦，你哋向西邊跑咗好遠，馬利安城喺東邊，跟我來！」佢嘅聲音好溫柔，但語氣中帶有一絲距離感。星光小隊跟住洛希娜一齊返馬利安城，途中好彩冇再遇到會主動攻擊嘅魔物，洛希娜喺前頭帶路，佢嘅步伐好穩，但佢好少講嘢，只係專心帶路。

返到馬利安城，洛希娜陪佢哋去咗冒險者公會交任務。喺公會櫃檯，職員見到樂希嘅白光，又係好尊敬咁鞠躬，講：「聖職大人！歡迎您返來！您嘅任務完成得好快！」星光小隊交出10個史萊姆核心，職員檢查後，笑住講：「任務完成！報酬係100卡索，請收好！」阿偉收咗報酬，笑住講：「第一次任務完成！雖然好驚險……」

交完任務，樂希細聲講：「洛希娜，多謝你救咗我哋…我哋想請你食飯，答謝你……可以嗎？」阿偉點咗頭，講：「係呀！你救咗我哋，唔請你食飯我哋會唔好意思！」

「呀，唔使啦，冒險者本來就應該互相幫忙，我都有喺旅途入面受過其他冒險者幫助啦。」洛希娜禮貌咁婉拒。

樂希話：「但係，受咗人幫忙想答謝都係冒險者之間嘅情誼呀。」





「真係唔使啦，聖職大人。」

「咁......我係祭司，我用聖職身分邀請你同我哋一齊食飯，同埋要求你叫我樂希。」樂希認真咁同洛希娜講。

洛希娜笑咗笑：「你講到咁我真係冇辦法拒絕...…好啦，我同你哋去食飯！」佢嘅笑容好溫暖，但佢嘅眼神中依然有一絲掩藏嘅憂傷。

佢哋一行人去咗露珠餐廳對面嘅沙年餐廳，呢間餐廳係一間單層木屋，外觀好樸素，但入面嘅氣氛好熱鬧，餐廳老闆牡桂一見到樂希嘅白光，即刻露出驚喜嘅表情，深深鞠咗一躬，講：「聖職大人！歡迎蒞臨沙年餐廳！我係老闆牡桂，能夠招待您係我嘅榮幸！請跟我來，我即刻為您同您嘅同伴安排獨立房間！」

牡桂帶佢哋去咗一間獨立房間，房間好簡單，但好溫馨，有一張長方形木桌，桌上鋪咗一塊藍色桌布，牆上掛咗一幅畫，畫住加爾安娜絲女神。佢哋五人坐低後，牡桂笑住講：「聖職大人同您嘅同伴請稍等，我即刻安排美食俾您哋！今晚嘅晚餐係我嘅招待，無論如何都唔可以收您嘅錢！」樂希細聲講：「唔使...…」但牡桂已經笑住離開咗房間。





唔使一陣，店員端咗好多美食入房間，桌上擺滿咗唔同嘅美食，同埋一盤星輝果。星光小隊同洛希娜一齊喺溫暖嘅燈光下食飯，佢哋一邊食一邊傾計。永誠笑住講：「洛希娜，你嘅箭術好勁！你一個人喺平原採草藥，唔怕危險？」洛希娜笑咗笑，講：「我習慣咗...…波利波利大平原我好熟，平時都會好小心避開魔物。」阿偉講：「你救咗我哋，真係多謝你！之後有咩需要幫手，隨時搵我哋！」樂希細聲講：「洛希娜，你好似好熟悉呢個地方。你一個人冒險會唔會好孤單？」

洛希娜笑住回應：「唔會啦，我習慣一個人……不過見到你哋星光小隊一齊冒險，我都覺得好開心...…」佢嘅笑容好溫暖，但敏銳嘅樂希同曉峰都覺得佢嘅笑容背後好似有啲唔開心嘅情緒。洛希娜喺傾計中好少講自己嘅事，每次話題轉到佢嘅背景，佢都會笑住轉開話題，例如講：「啲星輝果真係好甜！你哋食咗未？」

我隱形喺餐桌一邊望住佢哋，不如趁機喺呢度同讀者劇透吓~

洛希娜本身係「水光小隊」嘅一員，水光小隊計埋洛希娜有4個成員，洛希娜係年紀最細嘅，隊入面另外兩個大哥哥同一個姐姐都好照顧佢。但之前佢哋接咗一個去瑪利安納雪原討伐冰奇諾獸嘅中階任務，不幸遇到咗雪原嘅傳說級魔物雪魔女，其他三個成員為咗保護洛希娜而戰死，洛希娜僥倖逃走，被路過嘅死靈法師阿夢救下。自此之後，洛希娜就冇再覺得開心，就算同人交流，每日都係扮開心，佢唔願意再加入任何新隊伍，因為佢對自己冇能力救下隊友，連隊友嘅屍體都運唔返來而感到好自責。

食完飯，洛希娜同星光小隊喺沙年餐廳門口分開，佢笑住講：「多謝你哋請我食飯！今日同你哋一齊好開心！如果有緣再見！」講完，佢向樂希鞠咗一躬，轉身離開，佢嘅背影顯得好孤單。

星光小隊返到光影旅館，喺佢哋嘅豪華套房休息。夜晚，佢哋喺阿偉同樂希嘅雙人床上傾計，準備訓覺。

樂希話：「我覺得洛希娜好似好唔開心。佢雖然成日笑，但佢嘅笑容好似好勉強……我好擔心佢……」

曉峰點頭同意：「我都有呢個感覺。佢好少講自己嘅事，每次我哋問，佢都轉開話題，可能有啲唔開心嘅經歷。」





「係咩？洛希娜救咗我哋，又咁好人，如果佢真係唔開心，我哋要幫佢！」阿偉話。

「係呀！佢嘅箭術咁勁，如果佢加入我哋小隊，一定好幫手！」永誠笑住講。

樂希望住天花板講：「如果再見到洛希娜，我想邀請佢加入星光小隊，我想幫佢……佢一個人冒險，應該好孤單。」

「傻豬，你真係好善良！我都贊成！」阿偉又再攬緊樂希。

「我同意。佢係弓手，可以補足我哋遠程輸出嘅短板。加上佢一個人冒險，確實好孤單，如果佢加入我哋小隊，有人陪住佢，可能會幫到佢開心啲。」曉峰分析。

「好！下次見到洛希娜，我哋邀請佢入隊！星光小隊會多一個好隊友！」隊長永誠話。

四人喺溫暖嘅燈光下傾完計，然後各自休息，為第二日嘅冒險做好準備。





到底洛希娜之後同星光小隊會有咩交集？佢會唔會加入星光小隊？下章再講！