《艾莉菲斯物語》（異世界穿越）: 第十二章、聯隊任務

第二朝，陽光灑入光影旅館201號房嘅大窗戶，星光小隊喺清晨嘅第一道光芒中起身。卡娜一如既往喺七點半將豐富嘅早餐送到房門口，四人喺享用完早餐後，收拾好裝備，準備出發去冒險者公會接新任務。

佢哋到達馬利安城冒險者公會時，公會大堂一如既往咁熱鬧，冒險者喺告示板前挑選任務，櫃檯後嘅職員忙碌咁處理登記。樂希細聲講：「我哋會唔會見到洛希娜...…我想邀請佢入隊……」阿偉話：「佢如果喺公會，我哋就邀請佢！」曉峰提議：「我哋先等一陣，如果唔見到佢，就先接新任務。」

四人喺公會大堂等咗一陣，觀察咗每個入來嘅冒險者，唔少冒險者依舊尊敬咁同樂希敬禮，但始終冇見到洛希娜嘅身影。

樂希失望咁講：「洛希娜……可能佢今日唔嚟公會……」阿偉攬住佢：「傻豬，唔使失望，我哋下次再見到佢再邀請佢啦！而家接任務先啦！」永誠帶頭行去counter：「走！我哋去接新任務！」

佢哋行到櫃檯，職員見到樂希嘅白光，又係好尊敬咁鞠躬，講：「聖職大人！歡迎您哋星光小隊！請問今日想接咩任務？」曉峰話：「我哋想接啲簡單嘅任務。」職員笑住講：「好！我推薦一個任務，喺馬利安城南邊嘅陽光海岸活捉20隻地龍，報酬係每隻地龍2卡索，總共40卡索。地龍係小型魔物，冇咩攻擊力，應該對您哋嚟講係一個簡單嘅任務。」永誠笑住講：「係咪我哋食過好好味嗰種地龍？聽落好簡單！我哋接！」職員遞咗一個大籃畀佢哋，講：「請用呢個籃裝地龍，捉完20隻就可以返來交任務！」





星光小隊接咗任務，離開馬利安城，向南邊嘅陽光海岸出發。陽光海岸有一片金色沙灘，陽光照喺沙灘上，閃閃發光，海浪輕輕拍打喺岸邊，遠處有幾隻鳥型魔物喺天空飛翔，氣氛好寧靜。沙灘邊嘅草地上，有好多地龍喺四處爬動。

地龍係小型魔物，體型大約大過一個網球少少，佢哋嘅身體係灰褐色，有四隻細小嘅腳，背上有個硬殼，殼上有細小嘅紋路，佢哋嘅眼睛好細，幾乎睇唔到，移動時好似一個波咁喺地上碌，數量好多，但一見到人就即刻四處逃走，好怕人。

永誠佢衝上前，想捉一隻地龍，但地龍一見到佢就即刻跑走，永誠追咗一陣都捉唔到，佢拎住大劍亂揮，當然冇擊中任何地龍。佢氣喘吁吁咁講：「點解咁快！捉唔到！」阿偉同曉峰亦試著捉，但地龍嘅動作好敏捷，佢哋四處逃竄，星光小隊追得好辛苦。樂希問：「地龍好似好驚人...…有冇方法令佢哋唔走？」樂希試用強化術強化隊內最敏捷嘅刺客曉峰，但強化曉峰都係追唔到速度好快嘅地龍。

之後樂希突然諗起咗自己嘅安撫術，佢舉起手，施展安撫術，一陣溫暖嘅白光散開，附近嘅地龍即刻停咗下來，佢哋嘅身體好似放鬆咗，乖乖停喺原地，唔再反抗。樂希驚喜咁講：「安撫術有用！佢哋唔走啦！」阿偉笑住講：「傻豬你好勁！咁我哋可以輕鬆捉佢哋！」佢哋即刻走過去，將地龍一隻隻捉起，放喺公會畀佢哋嘅大籃入面。喺安撫術嘅幫助下，佢哋好快就捉哂20隻地龍，完成咗任務。

曉峰滿意咁講：「任務完成，今次好順利，多得樂希嘅安撫術。」阿偉笑住講：「你真係我哋嘅王牌！」永誠笑住講：「捉地龍真係簡單！不過之前食過地龍肉，捉佢哋嘅時候都有少少餓……」





星光小隊帶住裝滿地龍嘅大籃，返馬利安城交任務。喺冒險者公會，職員檢查咗籃入面嘅20隻地龍，笑住講：「聖職大人同您嘅同伴好快手！任務完成，報酬係40卡索，請收好！」阿偉收咗報酬，笑住講：「又完成一個任務！今次冇咁驚險！」

交完任務時，仲係下午時間，太陽依然高掛喺天上，時間仲有好多，佢哋簡單食咗啲麵包補充體力。然後，永誠提議：「而家先下午！我哋再接多個任務啦！」曉峰點頭：「好。」樂希細聲講：「希望...…今次可以見到洛希娜...…」不過佢哋當日都冇見到洛希娜。

不過喺佢哋準備去告示板揀任務嘅時候，佢哋就見到另一個人。

元素使寧寧同幾個隊友走入咗冒險者公會。寧寧一見到樂希，笑住講：「樂希大人！好耐唔見！你同你嘅隊友喺呢度？真係好！我今日唔使喺法師公會當值，打算同隊友接一個中階任務，但隊入面冇補師。如果有你幫手，應該會好順利！呢個任務係可以兩隊一齊接，雖然去嘅地方有少少危險，但我應承我哋會保護你同你嘅隊友，你哋想唔想一齊？」

樂希細聲講：「寧寧……如果有你哋喺度，我哋應該可以試吓……不過唔使叫我大人，叫我樂希就得。」阿偉點咗頭，講：「寧寧，多謝你上次喺聖殿帶住樂希轉職！我哋可以一齊試吓中階任務！」永誠笑住講：「好！同寧寧一齊，應該好順利！」曉峰低聲講：「請多指教。」





寧寧隨即介紹佢嘅隊員：「好，樂希！我哋小隊叫魔源組，全部都係二轉職業！我係隊長寧寧，元素使。呢位係米亞，召喚師。」米亞係一個細粒嘅女士，佢有一頭銀色短髮，眼睛係綠色，佢身邊跟住一隻狼型召喚獸，名叫月山，月山嘅毛係藍色，散發出一陣陣微弱嘅魔力波動。米亞笑住講：「祭師大人……呀唔係，樂希！你好，我係召喚師米亞，月山係我嘅召喚獸！」

寧寧繼續講：「呢位係羅基，游俠。」羅基係一個三十出頭嘅男士，佢有一頭棕色短髮，眼睛係灰色，佢一身輕裝，腰間掛咗好多飛刀同短刀，佢嘅樣子好沉穩：「你好，我係羅基，好榮幸同你哋一齊行動！」

寧寧最後講：「呢位係金剛，守護者。」金剛係一個皮膚黝黑、一身肌肉嘅大叔，佢有一頭黑色短髮，眼睛係棕色，佢拎住一個金光閃閃嘅超大型盾牌，盾牌上刻咗一啲符文，散發出一陣陣魔力。金剛表情好認真：「我係金剛，我會負責保護大家嘅安全。」

之後樂希佢哋都逐一介紹自己。

「好！既然你哋同意，我哋一齊去接任務！今次任務係去羅森洞穴討伐一隻安邦尼斯，報酬係480卡索！有我哋魔源組同星光小隊合作，任務一定會好順利！」寧寧興奮咁講。

等我同讀者科普下先，羅森洞穴位於波利波利大平原南方嘅一個山壁內，入面冇乜光，有唔少危險魔物出沒，環境好陰暗。而安邦尼斯就係一隻類似野豬嘅中階魔物，雖然攻擊模式單一，速度都唔算好快，但佢嘅攻擊力好高，被擊中非死即重傷，而且血多皮厚，討伐佢基本上係一場持久戰。

我好期待星光小隊同魔源組嘅合作，不過要等下章啦~