《艾莉菲斯物語》(異世界穿越): 第十三章、洞穴初戰
星光小隊同魔源組一齊離開馬利安城,向波利波利大平原南方嘅羅森洞穴出發。羅森洞穴位於一個山壁入面,行咗大約一個鐘,佢哋終於到達洞穴入口。洞口好窄,只能容納兩個人並排進入,入口周圍長滿咗青苔,隱隱散發出一陣陰冷嘅氣息。寧寧轉頭講:「樂希,你哋跟緊我哋,羅森洞穴入面好黑,仲有唔少危險魔物,要小心!」
佢哋進入洞穴後,陽光即刻被隔絕,洞內一片漆黑,只能聽到水滴從洞頂滴落嘅聲音,空氣中瀰漫住一陣潮濕嘅氣味。樂希細聲講:「好黑……我有啲驚…」阿偉攬住佢,低聲講:「傻豬,唔使驚,我哋會保護你!」寧寧轉頭講:「樂希,你會唔會有照明嘅法術?如果有光,我哋會安全啲。」
樂希點咗頭,細聲講:「呀,好似有,我試吓……」佢舉起手,施展照明術,一顆白色光球從佢手中升起,散發出柔和嘅白光,照亮咗洞穴嘅四周。洞內嘅石壁佈滿咗青苔,地上有啲水窪,遠處嘅通道顯得好狹窄,隱約可以聽到一啲低吼聲。寧寧笑住講:「樂希,照明術好幫得手!多謝你!有光我哋會安全好多!」樂希話:「唔使客氣……」
兩隊人沿住通道前進,星光小隊緊跟喺魔源組後面。行咗唔遠,突然聽到一陣「吱吱」嘅尖叫聲,一群飛奇亞從洞頂撲落!飛奇亞係類似洞穴蝙蝠嘅魔物,體型同普通蝙蝠差不多,但翅膀尖銳,眼睛係紅色,佢哋嘅嘴巴有尖銳嘅牙齒,可以吸人血,數量好多,足足有幾十隻。永誠即刻舉起大劍揮舞,但飛奇亞嘅速度好快,佢嘅大劍完全劈唔中。
寧寧冷靜咁講:「係飛奇亞!交畀我!」佢舉起法杖,施展一招水龍卷,一陣巨大嘅水流從法杖前方捲起,形成一個龍捲風,將所有飛奇亞捲入其中,飛奇亞發出尖叫,隨即被水流沖散,全部秒殺!
星光小隊目瞪口呆,永誠驚訝咁講:「嘩,一招就秒咗,寧寧你好勁!」阿偉講:「真係厲害。」寧寧笑住講:「小意思!飛奇亞好怕水魔法,喺羅森洞穴算係比較弱嘅魔物。」
佢哋繼續前進,行咗一陣,突然聽到一陣「嘶嘶」聲,一隻加卜里從前方嘅通道撲出!加卜里外形好似一朵巨大嘅食人花,佢嘅花瓣係深紫色,花蕊中長咗好多尖銳嘅牙齒,佢有幾條藤蔓撐住身體,動作好敏捷,佢一見到星光小隊同魔源組,即刻張開花瓣,噴出一陣酸液!金剛即刻舉起佢嘅金光閃閃嘅巨盾,擋喺所有人前面,酸液全部擊中巨盾,發出「滋滋」嘅腐蝕聲,但巨盾毫髮無損。
金剛沉聲講:「係加卜里,你哋企喺我後面。」米亞嘅召喚獸月山即刻撲上前,用狼爪同加卜里肉搏,月山嘅爪撕裂咗加卜里嘅藤蔓,但加卜里嘅藤蔓即刻反擊,試圖綁住月山。寧寧舉起法杖,連續施展水光彈,幾顆水球擊中加卜里嘅花蕊,牽制咗佢嘅動作。羅基趁機從腰間抽出幾把飛刀,俐落咁射出,飛刀精準擊中加卜里嘅花蕊,加卜里發出一陣尖叫,隨即倒地不起。
米亞輕鬆咁哼住歌走上前,喺加卜里口中收集咗一個紫色嘅毒囊,笑住講:「加卜里嘅毒囊係整魔力藥水嘅重要材料!今次有收穫!」寧寧笑住講:「米亞,你成日都掛住整藥水。」
星光小隊喺一邊睇得目瞪口呆,樂希細聲講:「你哋好強……我哋完全幫唔到手...…」寧寧笑住講:「樂希,唔好咁講,你嘅照明術已經好幫得手!同埋仲未見到安邦尼斯,你哋之後會有機會幫手嘅!」
佢哋繼續深入洞穴,行咗唔遠,突然聽到一陣詭異嘅低語聲,一隊五至六隻魔甘斯摩從通道嘅黑暗中走出。魔甘斯摩係好似木偶咁嘅類人魔物,佢哋嘅身體好似係用木頭雕成,關節僵硬,但動作好敏捷,佢哋嘅眼睛係紅色,散發出一陣詭異嘅光芒。米亞即刻舉起手,施放一個力場,一個藍色光罩包圍咗所有人,魔甘斯摩嘅低語聲即刻被隔絕。米亞講:「魔甘斯摩識得催眠術!被催眠就好難解除,但喺我嘅力場入面就安全!」
寧寧皺住眉講:「魔甘斯摩,我搞唔掂,佢哋唔怕水魔法。」羅基即刻抽出飛刀,連續射出,但魔甘斯摩身型細小又敏捷,飛刀好難命中,佢哋喺力場外四處移動,試圖用催眠術攻擊。月山想撲出去,但被米亞阻止:「月山,唔好!一離開力場,你就會被催眠!」
金剛沉聲問:「寧寧,要唔要我出手?」寧寧搖頭:「唔好,金剛,你留力等安邦尼斯!」
米亞怪笑一聲:「哈,咁啫要係我出手啦?」佢舉起手,召喚出另一隻召喚獸,一隻全身著火嘅元素生物,佢叫火人。火人嘅身體係火焰構成,佢一出現,洞穴即刻被照得更光亮,散發出一陣熾熱嘅氣息。米亞話:「火人,交俾你!魔甘斯摩好怕火!」火人即刻施放火風暴,一陣火焰龍捲風席捲而出,魔甘斯摩慌忙走避,發出尖叫。佢哋試圖反擊,射出一啲魔法飛彈,但飛彈全部被金剛嘅大盾吸過去,擊中盾牌,發出「砰砰」嘅聲音。
羅基趁魔甘斯摩分神走避火焰,用飛刀精準擊中兩隻魔甘斯摩,佢哋即刻倒地。其餘魔甘斯摩被火人嘅火焰燒中,發出慘叫,隨即被燒死。米亞從袋中拎出一支魔力藥水飲咗,抱怨講:「同時召兩隻召喚獸要用好多魔力架……」羅基笑住講:「你扮咩?你成日都召三四隻出黎陪你玩!」米亞臉紅咗紅,講:「喂!你咪爆啦!」魔源組同星光小隊笑成一團,氣氛好輕鬆。
樂希細聲講:「你哋好勁……我哋好似真係完全幫唔到手...…」寧寧笑住講:「樂希,都話唔好咁講!一陣打安邦尼斯你嘅補血同支援會好重要!」
星光小隊同魔源組繼續前進,深入羅森洞穴,準備面對安邦尼斯。下章再講!