《艾莉菲斯物語》（異世界穿越）: 第十四章、迷霧森林

晚安讀者們，上章講到星光小隊同魔源組喺羅森洞穴內遇到飛奇亞、加卜里同魔甘斯摩，魔源組展現強大實力解決魔物，而星光小隊暫時幫唔上手。

知道大家都想知佢哋跟住喺羅森洞穴發生咩事，但我作為上帝一向都比較跳脫~ 我想帶大家轉個鏡頭，睇吓同一時間阿夢喺到做緊咩。

鏡頭一轉，我帶大家去到魔法之城迷夢城北面嘅迷霧森林。迷霧森林好似佢嘅名咁，終年被濃霧籠罩，樹木高大茂密，陽光幾乎穿透唔到，地面佈滿咗青苔同落葉，空氣中瀰漫住一陣陰冷嘅魔力波動，隱隱傳來一啲低吼聲，顯得神秘又危險。

阿夢喺呢片森林入面，正追擊一隻半魔。阿夢拎住佢嘅魔杖，魔杖散發住不祥嘅紫光，佢身邊跟住一隻噬靈獸、一隻夢魘同埋幾隻骷髏。

唉，又要解釋下。噬靈獸係一團黑色霧氣構成嘅魔物，佢嘅眼睛會發紅光，散發出一陣陣低吼聲，佢可以吸食生物嘅靈魂，令生物失去意識，一但被吸食靈魂，該生物就會只剩一個軀殼，直至噬靈獸被消滅為至；夢魘呢，就係一匹黑色嘅馬形魔物，佢嘅眼睛同馬蹄散發出紫色火焰，奔跑時留下一陣紫色霧氣，夢魘擅長幻術，可以令人神智崩潰；骷髏就係骷髏囉，得副骨架，手持生鏽嘅短劍同骨弓等唔同武器，關節移動時發出「咔咔」嘅聲音。





阿夢嘅死靈軍團將半魔逼到咗一個死角，半魔背靠一塊巨石，無路可退。半魔莎莉係一隻女性半魔，佢嘅外貌好妖艷，佢有一頭深紫色嘅長髮，長髮散落喺肩上，微微捲曲，佢嘅眼睛係金色，散發出一陣魅惑嘅光芒，佢嘅皮膚好白，幾乎透明，身上穿住一條黑色長袍，長袍上繡咗一啲紅色符文，佢嘅耳朵尖長，雙手嘅指甲係紫色，散發出一陣陰冷嘅氣息。

莎莉望住阿夢，眼神中帶有一絲複雜嘅情緒。阿夢平淡咁講：「莎莉，收手啦。」

莎莉嘅聲音好低沉，帶有一絲怒氣：「阿夢，你唔好迫我同你打！」

阿夢嘅深紫色眼睛直視莎莉：「呢句應該係我講。你應該知自己唔夠我打。」

莎莉咬緊牙，不屑咁講：「咁你咪殺咗我！」





阿夢嘅表情有一絲無奈，佢低聲講：「你知我唔想。不過，你再繼續執迷不悟嘅話，我總有一日要落手。」

莎莉突然舉起手，施展一招邪惡光波，一陣速度好快嘅黑色光波向阿夢襲來！

但阿夢反應更快，佢冷靜咁一揚手，光波即刻灰飛煙滅，連一絲痕跡都冇留低。

莎莉見狀，眼神一閃，即刻用影遁逃走，佢嘅身影化作一陣黑影，消失喺迷霧森林嘅濃霧中。阿夢雖然實力強大，但佢冇活捉莎莉嘅技能，又因為故念舊情唔想殺佢，所以又被莎莉走甩咗。佢無奈咁搖咗搖頭，揚手收起召喚出嚟嘅死靈軍團，噬靈獸、骷髏同夢魘即刻化作黑霧消失，只留低一隻骷髏跟住佢，幫佢拎住法杖。

阿夢嘅深紫色眼睛望向莎莉消失嘅方向，低聲自言自語：「莎莉……你點解要咁……」佢轉身，沿住迷霧森林嘅小路行返迷夢城，但喺行嘅過程中，佢察覺到有人暗暗跟住佢。





阿夢嘅感知好敏銳，佢停下腳步，轉頭對住一個方向，冷聲講：「出嚟啦。」

那人知道自己被發現，無奈咁現身。一個睇落六、七歲左右嘅小女孩從濃霧中走出，佢有一頭金色雙馬尾，著住一條白色連衣裙，眼睛係藍色，佢嘅樣子好可愛，但散發出一陣詭異嘅魔力波動。

阿夢一望就知來者何人，佢眼神冷漠咁講：「七聖賢之一，幻術師馬莉娜娜，有何貴幹？」

馬莉娜娜以小女孩嘅形象笑咗笑，講：「阿夢，你果然一眼就認出我，唔好咁冷淡啦！我有啲嘢想同你合作。」

阿夢聽都未聽合作內容就拒絕：「你用真身見我先啦，咁冇誠意。」

馬莉娜娜嘅小女孩形象笑咗笑，用好天真嘅聲線講：「咁太危險啦！連亞當都唔夠你打，我點敢用真身見你？」

阿夢嘅深紫色眼睛毫無波動，佢講：「咁既然你唔信我，就冇必要合作。」

佢揚手射出一發黑暗彈，一團黑色能量擊中馬莉娜娜嘅小女孩幻象，幻象即刻破碎，化作一陣光點消散。





馬莉娜娜嘅聲音從空氣中傳來，佢幻化成一個老太婆嘅形象，佝僂嘅身軀，著住一條破舊嘅黑色斗篷，佢嘆咗口氣話：「果然係個好危險嘅人物，呵呵。」老太婆隨即消失喺濃霧中。

阿夢嘅表情依然冷淡，佢轉身繼續行向迷夢城，骷髏拎住魔杖跟喺佢身後，佢嘅背影喺濃霧中顯得好孤獨。

見讀者們都一頭霧水，我又偷偷講少少啦，作者應該唔會介意嘅，阿夢係艾莉菲斯物語入面好重要嘅角色，佢XXXXXXXXX……