《艾莉菲斯物語》（異世界穿越）: 第十五章、意外強敵

好啦呢一章，我哋又返返嚟羅森洞穴呢邊，佢哋將會遇到一個強大嘅敵人！

星光小隊同魔源組喺羅森洞穴內繼續深入，樂希嘅照明術照亮咗狹窄嘅通道，洞內嘅石壁佈滿青苔，地上嘅水窪反射住微弱嘅白光，遠處嘅低吼聲越來越清晰。

寧寧同月山喺前頭帶路，佢嘅法杖散發出一陣微弱嘅藍光，金剛舉住巨盾緊跟喺後，星光小隊喺中間，羅基、米亞同火人喺隊尾殿後。

佢哋行咗一陣，通道突然開闊，進入一個較大嘅洞窟，洞窟中央站住一隻擬態人。

擬態人嘅外形好似一個稻草人，佢嘅身體係用乾草同破布組成，頭部用一塊破舊嘅麻布包裹，麻布上畫咗一張詭異嘅笑臉，麻布眼睛位置有洞，佢嘅一邊眼睛發出詭異嘅藍光，另一邊發出紅光，散發出一陣陰冷嘅氣息。佢左手拎住一把鋒利嘅黑色鐮刀，右手拎住一把法杖，法杖頂端鑲咗一顆黑色寶石，散發出一陣微弱嘅魔力波動。





擬態人一見到星光小隊同魔源組，佢嘅雙眼即刻亮起，但佢冇主動攻擊，只係守住咗前路，佢嘅笑臉顯得好詭異。

寧寧停下腳步，皺眉講：「運氣真差……竟然有隻擬態人喺到。」羅基低聲講：「記得上次我哋打擬態人，打到好狼狽…」米亞無奈咁搖頭講：「呢隻難搞，要召埋佢...…」

佢舉起手，召喚出一隻新嘅召喚獸，係一隻貓形生物，睇落同普通貓冇分別，佢有一身純白嘅毛，眼睛係藍色，頸上戴住一個小鈴鐺，散發住一陣強大嘅魔力波動。

貓形生物一出現，即刻用一陣清脆嘅聲音講：「貓靈姬利安華麗登場！」佢一見到月山同火人，隨即用清脆嘅聲音同佢哋打招呼：「月山！火人！你哋好！」月山即刻走近，用頭輕輕撞咗姬利安一下，示意友好，火人因為全身火焰唔掂得姬利安，就揮咗揮手示意。姬利安又轉頭同金剛同寧寧打招呼：「金剛！寧寧！好耐唔見！」佢刻意無視咗羅基，因為羅基曾講過唔鐘意貓，姬利安一直記恨。

隨後，佢一轉向前方見到擬態人，就抱怨：「米亞！平時又唔見你召我出黎，召親我就打呢啲難搞嘅怪，搞錯呀！」米亞吐咗吐舌頭：「乖啦，最多下次食下午茶召埋你！」姬利安聽到下午茶，藍色眼睛即刻亮起：「要皇家諾曼餐室嘅高級下午茶先好叫我！」米亞笑住講：「得啦！」





金剛轉頭對星光小隊講：「你哋留喺原地！擬態人只會攻擊進入佢領地嘅人，你哋喺呢個距離好安全！」寧寧補充：「擬態人係中高階魔物，比我哋嘅任務目標安邦尼斯更難打！佢魔法攻擊同物理攻擊都識，速度唔慢，冇明顯弱點，我哋四個要一齊打！但喺戰鬥時我哋分身唔到保護你哋，所以你哋要留喺到，呢個距離都超過咗佢嘅施法範圍，樂希，你一陣唔使放技能，費事吸引佢注意力，唔使擔心我哋！」

樂希點頭，細聲講：「好……我哋會留喺原地...…但我而家可以幫吓你哋……」佢舉起手，再補多一個照明術，洞窟即刻變得更光亮，隨後佢又施展強化術，一陣白光包圍住寧寧、羅基、金剛、米亞同佢嘅召喚物月山、火人同姬利安，幫佢哋提升咗防禦同力量。寧寧笑住講：「樂希，多謝你嘅強化術！準備好啦，魔源組！」羅基、金剛同米亞齊聲講：「好！」

魔源組四人同佢哋嘅召喚物一齊踏出去，大戰一觸即發！金剛、月山同羅基上前同擬態人近戰，羅基今次冇用飛刀，佢從腰間抽出兩把短刀，雙手握住，靈活咁攻擊擬態人嘅側翼；金剛舉起巨盾，硬接擬態人嘅攻擊；月山用狼爪同大口撕咬擬態人嘅乾草身體。

寧寧喺外圍用之前嘅水光彈牽制，一顆顆水球擊中擬態人，試圖減慢佢嘅動作；火人則喺另一邊施放火焰彈，一團團火焰擊中擬態人嘅身體，燒中佢嘅乾草，冒出一陣黑煙。

米亞喺後排用法術治療月山，幫月山癒合被擬態人攻擊嘅傷口，同時佢喺戰場範圍放咗一個力場，一個藍色光罩籠罩住戰場。





姬利安喺戰場邊緣，用兩隻後腳企起，開始跳舞，佢嘅動作好優雅，但每跳一步，就有一陣魔力波動傳出，似係幫隊友上buff嘅魔法舞，魔源組嘅隊員同召喚物嘅動作即刻變得更快、更有力。

擬態人唔係等閒之輩，佢一手用鐮刀瘋狂劈向近戰三人組，金剛用巨盾硬接，羅基同月山靈活閃避，但鐮刀嘅攻擊範圍好大，逼得佢哋要不停移動；佢嘅另一手用魔杖連續射出光波，黑色光波喺洞窟內四處飛射，寧寧、米亞同火人喺外圍要不停走位避開，火焰彈同水光彈不時被光波抵消。至於姬利安所在位置，就唔知點解完全冇光波飛埋去，所以佢就好安心跳舞。

洞窟內嘅戰鬥場面好激烈。我哋下章繼續講。