《艾莉菲斯物語》（異世界穿越）: 第十六章、洞穴惡戰

戰鬥將會進入白熱化階段，擬態人突然跳開一段距離，佢嘅雙眼藍光同紅光同時發光，佢舉起法杖，施展分身術，瞬間變出三隻一模一樣嘅分身，計埋本體，四隻擬態人嘅笑臉同時露出詭異嘅笑容，八隻眼睛散發出陰冷嘅光芒。

寧寧即刻大喊：「避開！係分身術！等我嚟！」魔源組眾人同召喚物迅速退到戰場邊緣，俾足夠空間寧寧放大技。寧寧舉起法杖，魔力全力爆發，喊道：「水龍地獄！」佢嘅法杖散發出耀眼嘅藍光，戰場嘅地面突然震動，隨即無數高壓水柱從地上噴出，水柱如龍般咆哮，狠狠擊中擬態人同佢嘅分身！水柱嘅衝擊力極強，擬態人嘅乾草身體被沖散咗大半，兩個分身被直接擊潰，只剩一個分身同本體勉強站立。

擬態人同分身同時舉起法杖，發出低沉嘅吼聲，施展地獄火還擊！兩團巨大嘅黑色火焰從佢哋嘅法杖射出，火焰帶有一陣詭異嘅魔力波動，直撲魔源組！金剛即刻跳前，舉起巨盾硬接一團地獄火，火焰擊中巨盾，發出「轟」嘅一聲巨響，巨盾散發出微弱嘅金光，勉強擋住。

但另一團地獄火直接射向火人，火人走避不及，眼看就要被擊中，米亞即刻舉手將火人召回，火人化作一陣火焰消失，避過咗致命一擊。

已經分唔清楚邊隻係本體，一隻擬態人突然衝向羅基，佢嘅鐮刀舞動如風，化作一道道黑色殘影，瘋狂攻擊羅基！羅基用靈活嘅步伐同擬態人對打，雙手嘅短刀快速格擋同反擊，兩邊刀刃碰撞發出「叮叮」嘅聲音，但擬態人嘅力量同速度佔優，羅基嘅手臂同胸口被鐮刀劃出幾道血痕，擬態人嘅乾草身體亦被羅基嘅短刀刺中，乾草散落一地。





與此同時，另一隻擬態人用鐮刀猛劈月山，月山試圖撕咬反擊，但分身嘅攻擊太快，月山被一刀劈中，浴血倒地，發出一聲哀鳴。米亞想施法治療，但隻擬態人即刻轉頭盯上佢，鐮刀直撲米亞！金剛見狀，捨身跳到米亞前面，試圖用巨盾擋住，但擬態人嘅角度極為刁鑽，鐮刀避開巨盾，直接劈中金剛嘅右邊身體！刀刃劈穿咗金剛嘅盔甲，鮮血即刻流出，金剛咬緊牙，硬撐住冇倒下。

寧寧見羅基陷入苦戰，舉起法杖，施展一招強力水柱，一道高壓水流直射向同羅基纏鬥嘅擬態人！羅基同寧寧默契十足，靈活避開水柱，水柱直接擊中擬態人，將佢嘅乾草身體沖散，擬態人倒地不起。羅基唔敢怠慢，立即上前補刀，一刀刺穿擬態人嘅頭部，麻布破碎，藍光同紅光即刻熄滅，一隻擬態人被擊殺。但點知，另一邊嗰隻先係本體！羅基已經傷痕纍纍，胸口同手臂嘅傷口流血不止，佢再也撐唔住，倒地不起。

擬態人本體繼續嘗試攻擊米亞，金剛拖住受傷嘅身體，拼命保護米亞，巨盾硬接鐮刀，但佢嘅動作因傷勢變慢，勉強擋住。

好彩姬利安喺戰場邊緣努力嘗試多次，終於成功施展禁錮術，一陣藍色魔力鎖鏈從地面升起，將擬態人定喺原地，佢嘅鐮刀同法杖即刻停下，無法動彈。

寧寧魔力已經見底，佢喘住氣同米亞講：「米亞我冇魔啦......你掉支藥水過嚟，等我回魔放技收咗佢。」





「唔得啦，我禁錮唔到佢咁耐，冇時間俾你飲藥水。」姬利安吃力咁講。

寧寧於是同金剛講：「咁金剛……用聖盾烈炎收咗佢啦！」金剛點頭，咬緊牙，架好巨盾，盾牌開始吸收能量，散發出耀眼嘅金光，隨後射出一發金光閃閃嘅聖盾烈炎！

金色火焰如箭般射出，直擊擬態人，火焰瞬間將擬態人吞噬，乾草身體即刻燃燒，化作灰燼，藍光同紅光徹底熄滅。

戰鬥結束，魔源組眾人同召喚物都累到倒地，寧寧同米亞喘住氣，金剛半跪喺地，右邊身體血流不止，羅基同月山傷重倒地，姬利安亦停下咗跳舞，趴喺地上喘氣。

星光小隊即刻上前，樂希一邊講：「辛苦啦.....」佢一邊舉起手，連續施展治癒術，一陣陣白光包圍住金剛、羅基同月山，佢哋嘅傷口逐漸癒合，但樂希連續施法，魔力消耗極大，臉色顯得好蒼白。





米亞見月山傷勢已穩定，對月山講：「辛苦你啦，月山。」佢將傷重嘅月山召回，月山化作一陣藍光消失，米亞解釋：「只要傷勢穩定，召回嘅召喚物可以自動回復，月山休息一陣就會好。」

米亞喺袋中拎出兩支魔力藥水，俾咗一支寧寧，佢哋一齊飲藥水恢復魔力。米亞見樂希用咗咁多治癒術，臉色蒼白，於是又拎出一支魔力藥水俾佢，笑住講：「樂希，你用咗咁多魔力，辛苦你啦！飲支魔力藥水回復吓！」樂希細聲講：「多謝…米亞…」佢飲咗魔力藥水，臉色即刻好返啲。

魔源組同星光小隊喺洞窟內稍作休息，討論緊仲繼唔繼續打安邦尼斯，定暫時放棄任務返城重整。

點知呀，通常都係咁㗎啦，命運唔會俾你選擇，安邦尼斯自己出現咗！

下章再講啦！