《艾莉菲斯物語》（異世界穿越）: 第十七章、安邦尼斯

羅森洞穴內嘅戰鬥氣氛未散，魔源組同星光小隊剛擊敗擬態人，正喺洞窟內休息，突然一陣低沉嘅吼聲響起，安邦尼斯出現咗！

安邦尼斯係一隻類似野豬嘅中階魔物，佢嘅體型比大象細少少、比河馬大少少，身上嘅毛係灰黑色，長滿咗硬毛，佢嘅雙眼係血紅色，兩顆巨大嘅獠牙閃住寒光，背上有幾條尖刺，散發出一陣兇猛嘅氣息。安邦尼斯攻擊模式單一，主要用衝撞同獠牙攻擊，速度算慢，但佢嘅攻擊力極高，被擊中非死即重傷，而且血多皮厚，討伐佢需要持久戰。

寧寧即刻站起，舉起法杖講：「安邦尼斯嚟咗！準備應戰！佢攻擊唔難避，但唔好鬆懈，俾佢打中唔死都重傷！」

魔源組眾人迅速進入戰鬥狀態，星光小隊亦準備好支援。羅基作為主力輸出，一邊靈活避開安邦尼斯嘅衝撞，一邊用雙短刀狂砍安邦尼斯嘅側腹，刀刃每次刺入都帶出一陣血花。

寧寧喺外圍間唔中施展水光彈同高壓水柱輸出，水光彈擊中安邦尼斯嘅背部，高壓水柱則直衝佢嘅頭部。





姬利安喺戰場邊緣跳起加攻擊嘅戰舞，每一步都散發魔力波動，為隊友提升攻擊力。

樂希喺安全距離不時為羅基施展強化術，一陣白光包圍羅基，幫佢提升力量同速度，令佢嘅短刀攻擊更加迅猛。

安邦尼斯嘅衝撞同獠牙攻擊雖然兇猛，但羅基同寧寧都避得輕鬆，戰鬥節奏逐漸穩定。

打咗一陣，寧寧見安邦尼斯嘅血量下降太慢，皺眉講：「打得太慢...…米亞，諗諗計！」姬利安即刻講：「米亞，召摩其出嚟啦！安邦尼斯咁厚血，摩其可以幫手！」

摩其係一條類似毒蛇嘅召喚生物，佢可以令目標中毒持續扣血。米亞點頭，舉手召喚出一條細長嘅毒蛇，摩其嘅身體係暗紫色，眼睛係綠色，散發出一陣毒氣，佢一出現即刻撲向安邦尼斯，咬中佢嘅後腿，毒液即刻生效，安邦尼斯嘅血量開始持續下降。





寧寧又再話：「米亞，我諗起，其實要持續輸出最快嘅，你不如再召埋浩浩！」

米亞一臉唔情願：「唔想...…浩浩成日駁嘴好煩！」姬利安笑住講：「佢駁嘴你咪威脅召回佢囉！佢最鐘意出嚟玩㗎啦！」寧寧亦講：「係囉！唔係打到天光都打唔完！」

米亞無奈咁點頭，舉手召喚出浩浩。浩浩係一隻類人召喚生物，外形似半精靈，身形睇落好似小學男仔，佢嘅膚色係淺綠色，有精靈耳，雙手拎住兩把匕首，佢一出場即刻串串貢：「米亞！召我出嚟有咩好玩...…吓？打安邦尼斯？無聊！我唔制！」

姬利安即刻講：「浩浩，米亞話今日你串佢一句，佢就即刻收返你！你最好乖乖地追住隻安邦尼斯斬！」

浩浩一聽，沒趣咁撇咗撇嘴，照做咁追住安邦尼斯，用匕首猛刺佢嘅後腿。加強咗攻力後，安邦尼斯嘅血量下降得更快，佢傷痕纍纍，速度再減慢，動作變得更加遲緩。





羅基見狀，對永誠同曉峰講：「永誠，曉峰，你哋一齊打，當練習吓！安邦尼斯攻擊後有停頓，你哋要睇準時機偷斬幾下，然後散開再等機會，唔可以太貪刀！」

永誠同曉峰點頭，學得好快，佢哋一邊避開安邦尼斯嘅衝撞，一邊喺停頓時用大劍同短刀攻擊，每次都擊中佢嘅側腹，雖然傷害唔大，但穩定輸出。

阿偉同金剛喺戰場邊緣觀戰，阿偉冇份打，悶悶不樂咁坐喺一邊。金剛見狀，走過去拍咗拍佢嘅肩，講：「阿偉，安邦尼斯呢類魔物攻擊力太高，坦傷唔明智，所以冇我哋坦克嘅事。但唔使灰心，我哋做坦就係要保護隊友，唔係想出頭做英雄。你揀咗做坦，就係有想保護人嘅心。」

阿偉聽完，眼眶有啲濕潤，感動咁講：「金剛……多謝你鼓勵，我明白啦。」佢再也唔悶悶不樂，重新振作起來。

金剛笑咗笑，繼續同阿偉分享做坦嘅心得：「做坦要鍛鍊身體，增加肉體強度，仲要學會點樣喺戰場上調整位置，吸引敵人嘅注意力，保護隊友。等你實力再強啲，就可以同我一樣，用巨盾硬接敵人嘅大招！」阿偉聽得入神，獲益良多，點頭講：「我會努力嘅！」

戰場上，安邦尼斯嘅血量已經低過一半，佢嘅動作越來越慢，傷痕纍纍，終於露出破綻。寧寧舉起法杖，施展一發水神怒擊，水流如炮彈般射出，炸開安邦尼斯嘅頭部！安邦尼斯發出一聲哀鳴，終於倒下，血紅雙眼失去光芒，巨大嘅身體轟然倒地。

羅基上前，割下安邦尼斯嘅兩顆獠牙作為任務完成證明。米亞亦走過去，割下安邦尼斯嘅心臟，笑住講：「安邦尼斯嘅心臟係整藥水嘅好材料！」

戰鬥結束，眾人稍作休息後，離開羅森洞穴，返到馬利安城冒險者公會交任務。





喺寧寧嘅堅持下，星光小隊原本唔肯收報酬，但最終都分到100卡索。

兩隊人一齊去露珠餐廳食晚飯，氣氛好開心，笑聲同交談聲充滿咗餐廳。

飯後解散，星光小隊返到光影旅館，因為太攰，好快就訓咗。

我都講故事講到好攰，所以決定下章再講。

咩呀，冇話上帝唔可以攰㗎嘛？